UN ຫວັງບັນດາປະເທດຮັບປາກຊ່ວຍຊີຣີ ບໍ່ຕໍ່າກວ່າ 8.000 ລ້ານໂດລາສະຫະລັດ
ສະຫະປະຊາຊາດ (UN) ຫວັງວ່າ ກອງປະຊຸມລັດຖະມົນຕີ ແລະ ອົງການຄວາມຊ່ວຍເຫລືອນາໆຊາດ ທີ່ນະຄອນຫລວງບຣຸກແຊນຂອງແບນຊິກໃນປັດຈຸບັນນີ້ຈະຮັບປາກຈັດສັນການຊ່ວຍເຫລືອຊີຣີບໍ່ຕໍ່າກວ່າ 8.000 ລ້ານໂດລາສະຫະລັດ.
ສຳນັກງານເພື່ອການປະສານງານດ້ານມະນຸດສະທຳແຫ່ງ UN ລະບຸວ່າ: ຈຳນວນເງິນດັ່ງກ່າວເປັນຈຳນວນເງິນທີ່ຕ້ອງໃຊ້ຊ່ວຍເຫລືອຊາວຊີຣີພັດຖິ່ນໃນປະເທດ ແລະ ຊາວຊີຣີທີ່ລີ້ໄພຕາມປະເທດເພື່ອນບ້ານ ໂດຍສະເພາະເມືອງອິດລິບ ທາງຕາເວັນຕົກສຽງເໜືອຂອງຊີຣີທີ່ຕິດກັບຕວກກີ ແລະ ຢູ່ໃນການຍຶດຄອງຂອງຝ່າຍຕໍ່ຕ້ານ ແລະ ຝ່າຍຕິດອາວຸດ. ສະຖານະການໜ້າເປັນຫ່ວງ ເພາະຜູ້ຄົນໜີການສູ້ຮົບຫລັ່ງໄຫລເຂົ້າມາຈົນມີປະຊາກອນສູງເຖິງ 2,5 ລ້ານຄົນແລ້ວ ຫວັງວ່າກອງປະຊຸມຈະຮັບປາກຈັດສັນເງິນຊ່ວຍເຫລືອຕາມທີ່ຕ້ອງການ ເພາະປີຜ່ານມາ UN ລະດົມເງິນໄດ້ພຽງເຄິ່ງໜຶ່ງຂອງຈຳນວນຕ້ອງໃຊ້.
UN ລະບຸວ່າ: ສົງຄາມຊີຣີທີ່ເກີດຂຶ້ນນັບແຕ່ເດືອນມີນາ 2011 ເຮັດໃຫ້ມີຜູ້ພັດຖິ່ນໃນປະເທດປະມານ 6,1 ລ້ານຄົນ, ອົບພະຍົບອອກນອກປະເທດໄປແລ້ວຫລາຍກວ່າ 5 ລ້ານຄົນ, ມີຜູ້ຕ້ອງການຄວາມຊ່ວຍເຫລືອ 13 ລ້ານຄົນ ເກືອບເຄິ່ງໜຶ່ງເປັນເດັກນ້ອຍ.
