ກະຊວງ ຜທ ຫາລືການຜັນຂະຫຍາຍຍຸດທະສາດສະຖິຕິແບບຍືນຍົງ.

ເມື່ອທ້າຍອາທິດຜ່ານມາ, ສູນສະຖິຕິແຫ່ງຊາດກະຊວງແຜນການ ແລະ ການ ລົງທຶນ, ໄດ້ຈັດກອງປະຊຸມປືກສາຫາລືການຜັນຂະຫຍາຍກົດໝາຍວ່າດ້ວຍສະຖິຕິ (ສະບັບປັບປຸງ) ແລະ ຍຸດທະສາດພັດທະນາລະບົບສະຖິຕິແຫ່ງຊາດແບບຍືນຍົງ (2016-2025) ແລະ ວິໄສທັດ 2030 ເພື່ອເຮັດໃຫ້ທຸກພາກສ່ວນມີຄວາມເຂົ້າໃຈ ແລະ ເປັນເອກະພາບໃນການຈັດຕັ້ງປະຕິບັດວຽກງານດັ່ງກ່າວໃນທົ່ວປະເທດ ແລະ ພ້ອມທັງເປັນການລະດົມຄວາມຄິດເຫັນເຂົ້າໃສ່ການຜັນຂະຫຍາຍກົດໝາຍ, ຍຸດທະສາດ ແລະ ວິໄສທັດຂອງວຽກງານສະຖິຕິ ໄດ້ເປັນນິຕິກຳລຸ່ມກົດໝາຍ ເປັນຕົ້ນແມ່ນດຳລັດວ່າດ້ວຍການຈັດຕັ້ງ ແລະ ການ ເຄື່ອນໄຫວຂອງລະບົບການຈັດຕັ້ງສະຖິຕິແຫ່ງຊາດ, ຄຳສັ່ງແນະນຳກ່ຽວກັບການຈັດຕັ້ງສະຖິຕິສາຍຂວາງ, ບົດແນະນຳກ່ຽວກັບການນຳໃຊ້ລະຫັດສາລະບານຂະແໜງການເສດຖະກິດ ແລະ ລະຫັດອາຊີບ (ແຮງງານ), ບົດແນະນຳ ໄລຍະລາຍງານສະຖິຕິ ແລະ ໄລຍະການເຜີຍແຜ່ຂໍ້ມູນສະຖິຕິທາງການ, ເພື່ອໃຫ້ບັນດານິຕິກໍາເຫລົ່ານັ້ນ, ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ, ສາມາດເຊື່ອມໂຍງເຂົ້າໃນແຜນແມ່ບົດຂອງບັນດາຂະແໜງການ ແລະ ທ້ອງຖິ່ນ ໃນການພັດທະນາຕົວຊີ້ບອກຂໍ້ມູນສະຖິຕິທາງການໃນແຕ່ລະລະດັບທັງພາຍໃນ ແລະ ສາກົນ.

ກອງປະຊຸມດັ່ງກ່າວ, ໂດຍການເປັນປະທານຂອງທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ມີບັນດາຮອງລັດຖະມົນຕີ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມ.