ສ.ເກົາຫລີ ຢຸດໂຄສະນາຊວນເຊື່ອ ຕໍ່ຕ້ານ ສປປ ເກົາຫລີ
ລັດຖະບານ ສ.ເກົາຫລີ ຢຸດການກະຈາຍສຽງໂຄສະນາຊວນເຊື່ອຕໍ່ຕ້ານ ສປປ ເກົາຫລີ ຕາມຊາຍແດນ ເພື່ອສ້າງບັນຍາກາດອັນດີກ່ອນການພົບປະຫາລືຄັ້ງສຳຄັນລະຫວ່າງຜູ້ນຳຂອງສອງປະເທດ ໃນວັນທີ 27 ເມສານີ້.
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ປະເທດ ສ.ເກົາຫລີ ໃນວັນທີ 23 ເມສາວ່າ: ກະຊວງປ້ອງກັນປະເທດຂອງ ສ.ເກົາຫລີ ອອກຖະແຫລງການໃນວັນທີ 23 ເມສາ ຢຸດການກະຈາຍສຽງໂຄສະນາຊວນເຊື່ອຕໍ່ຕ້ານ ສປປ ເກົາຫລີ ຜ່ານເຄື່ອງສຽງຫລາຍຈຸດຕາມຊາຍແດນ ເພື່ອສ້າງ “ບັນຍາກາດມິດຕະພາບ” ກ່ອນການພົບປະຫາລືຄັ້ງສຳຄັນ ລະຫວ່າງປະທານາທິບໍດີ ມຸນ ແຈອິນ ກັບທ່ານ ກິມ ຈົງອິນ ໃນວັນທີ 27 ເມສານີ້ ແລະ ສະແດງຄວາມຫວັງວ່າ ສປປ ເກົາຫລີ ຈະປະຕິບັດເຊັ່ນດຽວກັນ.
(3rd LD) S. Korea halts propaganda broadcasts along border with N. Korea: ministry https://t.co/Py5aP5IOTM
— Yonhap News Agency (@YonhapNews) April 23, 2018
ທັງນີ້, ການກະຈາຍສຽງໂຄສະນາຊວນເຊື່ອຕາມຊາຍແດນເປັນກົນລະຍຸດທີ່ສອງເກົາຫລີໃຊ້ເປັນ “ສົງຄາມຈິດວິທະຍາ” ຫລື “ສົງຄາມປະສາດ” ຕໍ່ກັນນັບແຕ່ສົງຄາມເກົາຫລີເກີດຂຶ້ນໃນປີ 1950. ຂະນະທີ່ແຫລ່ງຂ່າວດ້ານຄວາມໝັ້ນຄົງຂອງກອງທັບ ສ.ເກົາຫລີ ເປີດເຜີຍຕໍ່ສຳນັກຂ່າວຍອນຮັບວ່າ: “ມີຄວາມເປັນໄປໄດ້ສູງ” ທີ່ ສ.ເກົາຫລີ ແລະ ອາເມລິກາ ຈະຢຸດພາລະກິດຊ້ອມຮົບຮ່ວມກັນໃນວັນທີ່ຜູ້ນຳ ສ.ເກົາຫລີ ແລະ ສປປ ເກົາຫລີ ປະຊຸມຮ່ວມກັນ.
