ທີມຊາດຍິງ ຮຸ່ນອາຍຸ 16 ປີ ຝຶກຊ້ອມ ກຽມເຂົ້າຮ່ວມບານເຕະຊີງແຊ້ມອາຊຽນ
ທີມຊາດຍິງ ຮຸ່ນອາຍຸ16 ປີ ຝຶກຊ້ອມເພື່ອກຽມຄວາມພ້ອມເຂົ້າຮ່ວມການແຂ່ງຂັນບານເຕະຍິງ ຊີງແຊ້ມອາຊຽນ ຮຸ່ນອາຍຸ 16 ປີ ຫລື AFF U-16 GIRLS’ CHAMPIONSHIP 2018 ຢູ່ທີ່ເມືອງປາເລມບັງ ປະເທດອິນໂດເນເຊຍ ໃນລະຫວ່າງວັນທີ 1-13 ພຶດສະພາ 2018.
ທ່ານ ນາງ ພອນທິບ ແສງມະນີ ຫົວຫນ້າຄູຝຶກ ກ່າວວ່າ: ພາຍຫລັງທີ່ໄດ້ຖືກສະຫະພັນບານເຕະແຫ່ງຊາດລາວ ແຕ່ງຕັ້ງເປັນຫົວຫນ້າຄູຝຶກ ກໍໄດ້ນຳພາບັນດາຄະນະຄູຝຶກຄັດເລືອກນັກກິລາມາແຕ່ຕົ້ນເດືອນມີນາ ເຊິ່ງມີນັກກິລາເຂົ້າຮ່ວມຄັດເລືອກ 70 ກວ່າຄົນ ຫລັງຈາກນັ້ນໄດ້ຄັດຈ້ອນນັກກິລາຈຳນວນຫນຶ່ງທີ່ມີພື້ນຖານທັກສະການເຕະບານເຂົ້ານອນສູນເກັບຕົວຝຶກຊ້ອມ ໂດຍມີນັກກິລາຈາກຕ່າງແຂວງທີ່ຖືກຄັດເລືອກປະກອບມີ ແຂວງສະຫວັນນະເຂດ, ໄຊສົມບູນ, ຈຳປາສັກ ແລະ ແຂວງຫົວພັນ ເຊິ່ງທາງສະຫະພັນບານເຕະແຫ່ງຊາດລາວ ກໍໄດ້ປະສານຫາກະຊວງສຶກສາທິການ ແລະ ກິລາ ຂໍອະນຸມັດໃຫ້ບັນດານັກກິລາພາຍໃນນະຄອນຫລວງ ແລະ ຕ່າງແຂວງ ໄດ້ເຂົ້າໂຮງຮຽນຢູ່ໂຮງຮຽນ ມສ ບໍ່ນາງົວ ເພື່ອບໍ່ໃຫ້ນັກກິລາປະລະໃນການຮ່ຳຮຽນ ເຊິ່ງມີລົດຮັບສົ່ງໄປໂຮງຮຽນໃນແຕ່ລະມື້, ນັກກິລາໃນປັດຈຸບັນຍັງເຫລືອ 26 ຄົນ ຈະຕັດໃຫ້ເຫລືອ 23 ຄົນສຸດທ້າຍ ໃນວັນຈັນ 23 ເມສານີ້ ກ່ອນອອກເດີນທາງແຂ່ງຂັນອຸ່ນເຄື່ອງຢູ່ທີ່ທົນບູລີ ປະເທດໄທ ໃນລະຫວ່າງວັນທີ 24-29 ເມສາ 2018. ການແຂ່ງຂັນບານເຕະຍິງ ຊີງແຊ້ມອາຊຽນ ຮຸ່ນອາຍຸ 16 ປີ ມີທີມເຂົ້າຮ່ວມທັງຫມົດ 9 ປະເທດ ແບ່ງອອກເປັນ 2 ກຸ່ມ ຄື: ກຸ່ມ ເອ : ຟີລິບປິນ, ມຽນມາ, ຫວຽດນາມ, ມາເລເຊຍ ແລະ ສິງກະໂປ. ກຸ່ມ ບີ : ໄທ, ກຳປູເຈຍ, ລາວ ແລະ ອິນໂດເນເຊຍ (ເຈົ້າພາບ). ຕາຕະລາງການແຂ່ງຂັນ ທີມຊາດລາວ: ວັນທີ 2/5/2018 ເວລາ 15:00 ລາວ ພົບ ກຳປູເຈຍ ແຂ່ງຂັນຢູ່ສະໜາມATHLETIC JAKA BARLING 2. ວັນທີ 4/5/2018 ເວລາ 15:00 ລາວ ພົບ ໄທ ແຂ່ງຂັນຢູ່ສະໜາມATHLETIC JAKA BARLING 2. ວັນທີ 6/5/2018 ເວລາ 15:00 ລາວ ພົບ ອິນໂດເນເຊຍ ແຂ່ງຂັນຢູ່ສະໜາມATHLETIC JAKA BARLING.
