ຟລອຍ ຍອມຮັບຢາກດວນກັບ ແມັກເກຣເກີ ໃນກົງ 8 ຫລ່ຽມ
April 18, 2018 - 3:43 PM
ຟລອຍ ເມເວດເທີ ຈູເນຍ ນັກມວຍຊາວອາເມລິກາ ລະບຸຢາກດວນກັບ ຄໍເນີ ແມັກເກຣເກີ ໃນເວທີມວຍ ເອັມເອັມເອ ຂອງວົງການ ຢູເອັຟຊີ ພ້ອມເຜີຍອີກໜຶ່ງປັດໄຈສຳຄັນທີ່ຈະຕັດສິນວ່າ ໄຟທ໌ນີ້ຈະເກີດຂຶ້ນໄດ້ ຫລື ບໍ່ ຄືເລື່ອງເງິນ.
ຟລອຍ ເມເວດເທີ ຈູເນຍ ອະດີດຍອດນັກມວຍຊາວອາເມລິກາ ຍອມຮັບວ່າ ຕົນເອງຢາກສູ້ກັບ ຄໍເນີ ແມັກເກຣເກີ ນັກສູ້ຄົນດັງຂອງສິລະປະການຕໍ່ສູ້ປ້ອງກັນຕົວແບບປະສົມ (ເອັມເອັມເອ) ໃນຮູບແບບຂອງ ເອັມເອັມເອ.
ກ່ອນໜ້ານີ້ ຟລອຍ ກັບ ແມັກເກຣເກີ ຫາກໍສ້າງໄຟທ໌ຮືຮາດ້ວຍກັນໃນເດືອນສິງຫາ 2017 ໃນການຊົກມວຍສາກົນ ແລະ ເປັນ ຟລອຍ ທີ່ເອົາຊະນະນ໊ອກໄປໄດ້. ຫລັງຈາກນັ້ນເປັນຕົ້ນມາ ກໍມີກະແສຂ່າວລືຢູ່ເລື້ອຍໆວ່າ ທັງສອງຈະມີຣີແມັດ ໂດຍປ່ຽນມາເປັນສູ້ພາຍໃຕ້ກົດ ເອັມເອັມເອ.
