ອາຣ໌ໂນລ ໄດ້ຄ່າເມື່ອຍຈາກ ລີເວີພູລ ເພີ່ມ
ເທຣນ ອາເລັກຊານເດີ ອາຣ໌ໂນລ ຟູລແບັກອະນາຄົດໄກຂອງ ລີເວີພູລ ເຮັດໃຫ້ເງື່ອນໄຂການໄດ້ຄ່າເມື່ອຍເພີ່ມມີຜົນໃຊ້ງານແລ້ວ ພາຍຫລັງລົງສະໜາມໃຫ້ທີມຊຸດໃຫຍ່ເຖິງຫລັກ 30 ນັດຕາມທີ່ຕົກລົງກັນໄວ້ ໂດຍລາວຈະໄດ້ຄ່າເມື່ອຍເປັນອາທິດລະປະມານ 40.000 ປອນ.
ອາເລັກຊານເດີ ອາຣ໌ໂນລ ເຊັນສັນຍາເປັນໄລຍະເວລາ 5 ປີກັບ ລີເວີພູລ ໃນເດືອນກໍລະກົດຜ່ານມາ ເຊິ່ງລາວກໍພັດທະນາຝີຕີນໄດ້ດີຈົນເຮັດໃຫ້ລະດູການນີ້ໄດ້ລົງຫລິ້ນໃນລີກໄປແລ້ວ 16 ນັດ ພ້ອມຍິງໄດ້ 1 ປະຕູ.
ຫລ້າສຸດ ອີເອສພີເອັນ ລາຍງານວ່າ ໃນສັນຍາທີ່ເຊັນກັນຄັ້ງນັ້ນ ມີການໃສ່ເງື່ອນໄຂເຂົ້າໄປວ່າ: ຖ້າ ອາເລັກຊານເດີ ອາຣ໌ໂນລ ລົງຫລິ້ນໃຫ້ທີມຊຸດໃຫຍ່ເຖິງ 30 ນັດ ລາວຈະໄດ້ຄ່າເມື່ອຍເພີ່ມ ແລະ ນັກເຕະອາຍຸ 19 ປີ ກໍເຮັດຕາມເງື່ອນໄຂນັ້ນໄດ້ເປັນທີ່ຮຽບຮ້ອຍໃນເກມນັດທີ່ ລີເວີພູລ ບຸກໄປຊະນະ ເຊົາແຮມຕັນ 2-0 ໃນວັນທີ 11 ກຸມພາຜ່ານມາ ໂດຍນັບລວມກັບຈຳນວນເກມທີ່ລາວລົງຫລິ້ນໃນລະດູການກ່ອນນຳ.
ທັງນີ້ ວ່າກັນວ່າ ອາເລັກຊານເດີ ອາຣ໌ໂນລ ຈະໄດ້ຮັບຄ່າເມື່ອຍເພີ່ມເປັນປະມານ 40.000 ປອນຕໍ່ອາທິດ ໂດຍສື່ດັ່ງກ່າວລາຍງານວ່າ ລີເວີພູລ ມີນະໂຍບາຍເພີ່ມຄ່າເມື່ອຍໃຫ້ນັກເຕະເຍົາວະຊົນທີ່ລົງຫລິ້ນໃຫ້ທີມຊຸດໃຫຍ່ໃນລະດັບໜຶ່ງຢູ່ແລ້ວ.
