ພຣະໂອວາດປະທານ ອພສ ເນື່ອງໃນປີໃໝ່ລາວ ພສ 2561
ວັນເດືອນປີເກົ່າຜ່ານໄປ ໃນໂອກາດດີຖີຂຶ້ນປີໃໝ່ລາວນີ້, ການນຳພັກ-ລັດຖະບານໄດ້ປະກາດ ໃຫ້ເປັນວັນພັກລັດຖະການຫລາຍວັນເພື່ອໃຫ້ປະຊາຊົນ ລາວບັນດາເຜົ່າທຸກພາກ ສ່ວນໄດ້ສະເຫລີມ ສະຫລອງໄດ້ມ່ວນຊື່ນພັກຜ່ອນ ແລະ ໄດ້ຖືໂອກາດເວລາພັກປີໃໝ່ລາວ ປີພຣະພຸດທະສັງກາດ 2561ນີ້ ໄດ້ເຂົ້າວັດຟັງທຳ, ໄດ້ທຳບຸນໃຫ້ທານ, ໄດ້ສົງພຣະສົງອົງຄະເຈົ້າ ແລະ ໄດ້ຖືໂອກາດຂໍຂະມາລາໂທດ ຫົດສົງຂໍບຸນຂໍຄຸນນຳພໍ່ແມ່ຄູບາອາຈານ, ຜູ້ເຖົ້າຜູ້ແກ່ຜູ້ສູງອາຍຸຜູ້ຊົງຄຸນວຸດທີທັງຫລາຍ, ໂດຍສະ ເພາະແລ້ວໃນປີ 2018 ນີ້ ຖືເປັນປີອຸດົມມຸງຄຸນ ທີ່ທາງພັກ-ລັດ ໄດ້ມີພິທີເປີດປີທ່ອງທ່ຽວລາວ, ທາງ ຄະນະສົງພໍ່ແມ່ຄູບາອາຈານຕະຫລອດມວນພຸດທະສາສະນິກະຊົນລາວບັນດາເຜົ່າກໍພາກັນຊື່ນຊົມ ສະແດງຄວາມຍິນດີຕໍ່ການນຳ ພັກ-ລັດ ທີ່ໄດ້ເປີດປີທ່ອງທ່ຽວລາວ ເຊິ່ງຈະນຳພາປະເທດຊາດບ້ານ ເມືອງຈະເລີນຮຸ່ງເຮືອງ ມີຊື່ສຽງແຜ່ໄປສູ່ເວທີໂລກ.
+ ສະຫລອງປີໃໝ່ບົນຈິດໃຈອານຸລັກຮັກສາປະເພນີວັດທະນະທຳລາວ
+ ບຸນປີໃໝ່
ເນື່ອງໃນໂອກາດປີໃໝ່ລາວມາເຖິງນີ້, ຍາທ່ານ ກໍຂໍຝາກທຳເປັນຫລັກແຫ່ງການສະຫລອງປີໃໝ່ ແລະ ການດຳເນີນຊີວິດຢ່າງຖືກຕ້ອງເພື່ອປະໂຫຍດສຸກຂອງທຸກໆທ່ານ ຕາມຫລັກຂອງພຣະພຸດທະສາສະໜາ ທີ່ພຣະພຸດທະເຈົ້າຊົງຕັດໄວ້ວ່າ ອັບປະມາໂທ ອະມະຕັງ ປະທັງ, ປະມາໂທ ມັດຈຸໂນ ປະທັງ ແປວ່າ: ຄວາມບໍ່ປະໝາດເປັນທາງແຫ່ງ ຄວາມໝັ້ນຄົງຍືນຍົງຕະຫລອດໄປ, ຄວາມປະໝາດ ເປັນຫົນທາງແຫ່ງຄວາມພິນາດຂາດຊິ້ນຊີວິດ, ເພາະສະນັ້ນເນື່ອງໃນໂອກາດປີໃໝ່ມາເຖິງທາງພັກ- ລັດ ໄດ້ໃຫ້ໂອກາດເວລາແກ່ປະຊາຊົນທຸກພາກສ່ວນໄດ້ສະຫລອງມ່ວນຊື່ນ ກໍຈົ່ງພາກັນສະຫລອງ ມ່ວນຊື່ນຢ່າງມີສະຕິປັນຍາບໍ່ປະໝາດ, ການສະຫລອງມ່ວນຊື່ນຢ່າງມີປັນຍາສະຫລາດ ບໍ່ປະໝາດ ຄື ຢ່າງໃດ? ກໍຄືການເອົາໂອກາດເວລາພັກນີ້ ໄດ້ເຮັດສິ່ງທີ່ເປັນປະໂຫຍດໃຫ້ແກ່ຕົນ ແລະ ຄົນອື່ນ ປະໂຫຍດສ່ວນຕົນກໍຄື ໄດ້ໂອກາດກັບບ້ານກັບເຮືອນໄປພົບປະຍາດ ພີ່ນ້ອງ, ພໍ່ແມ່ເຖົ້າແກ່, ໄດ້ໂອກາດຂໍ ຂະມາລາໂທດ ໃນບາງຢ່າງທີ່ຜິດພາດໄປ, ໄດ້ໂອກາດຂໍຄຸນນຳທ່ານຜູ້ມີພຣະຄຸນ ທ່ານຜູ້ຊົງຄຸນວຸດທິ ເຖົ້າແກ່ນັກປາດ, ໄດ້ໂອກາດທຳບຸນຖວາຍ ທານເພື່ອຕົນໄດ້ຫົດສົງພຣະພຸດທະຮູບ ຫົດສົງພຣະສົງສາ ມະເນນ ຜູ້ຊົງສິນຊົງທຳ ເພື່ອຂໍຂະມາລາໂທດ ແລະ ຂໍບຸນຄຸນ ຂໍພອນອັນປະເສີດ ເພື່ອປະໂຫຍດສຸກ ຂອງຕົນ ສ່ວນປະໂຫຍດສຸກຂອງຄົນອື່ນ ກໍຄືໂອກາດປີໃໝ່ລາວມາເຖິງ ກໍຈະໄດ້ພົບປະສ້າງສັນສາ ມັກຄີກັບພໍ່ແມ່, ຍາດພີ່ນ້ອງ, ລຸງປ້າອາວອາ ໄດ້ພົບປະສາມັກຄີກັນ ຖືໂອກາດປີໃໝ່ມາເຖິງນີ້ ໃຫ້ໂອ ກາດ ໃຫ້ອະໄພ ເຊິ່ງກັນ ແລະ ກັນ ແລະ ຍັງໄດ້ອວຍໄຊໃຫ້ພອນ ເຊິ່ງກັນ ແລະ ກັນ ສ່ວນຜູ້ທີ່ມີປັນຍາ ສູງຍິ່ງຂຶ້ນໃນທຳກວ່ານັ້ນ ກໍຖືໂອກາດເວລາພັກນີ້ ໄດ້ທຳບຸນຖວາຍທານ ບຳເພັນພາວະນາ ອົບຮົມຈິດ ໃຈຂອງຕົນ ຈຶ່ງຊື່ວ່າເປັນຜູ້ບໍ່ປະໝາດໃນຊີວິດ, ບໍ່ປະໝາດໃນບຸນກຸສົນຄຸນງາມຄວາມດີ ທີ່ພຣະພຸດທະ ເຈົ້າຊົງຕັດວ່າ ຄວາມບໍ່ປະໝາດ ເປັນຫົນທາງແຫ່ງຄວາມໝັ້ນຄົງຍືນຍົງຕະຫລອດໄປ ສ່ວນບຸກຄົນໃດ ມີຄວາມປະໝາດຂາດສະຕິເອົາເວລາພັກນີ້ມົວແຕ່ທ່ຽວຫລິ້ນກິນມືນເມົາເກີນຂອບເຂດ ອຸປະຕິເຫດ ກໍຈະຕາມມາ ກໍຈະເຖິງຄວາມພິນາດຂາດຊີວິດລົງໄດ້, ເພາະສະນັ້ນຈົ່ງຕັ້ງຢູ່ໃນຄວາມບໍ່ປະໝາດຫລິ້ນ ປີໃໝ່ສະຫລອງປີໃໝ່ຢ່າງມີສະຕິສຳປະຊັນຍະ ລະມັດລະວັງ ບໍ່ປະໝາດຫລິ້ນປີໃໝ່ສະຫລອງປີໃໝ່ຢ່າງ ມີປັນຍາ ເອົາສາລະປະໂຫຍດຈາກປີໃໝ່ໃຫ້ໄດ້.
ເນື່ອງໃນໂອກາດປີໃໝ່ມາເຖິງນີ້ ຍາທ່ານ ໃນນາມສ່ວນຕົວ ແລະ ໃນນາມອົງການພຸດທະສາ ສະໜາສຳພັນແຫ່ງ ສປປ ລາວ ກໍຂໍອວຍພອນໄຊ ໃຫ້ແກ່ທ່ານການນຳພັກ-ລັດຖະບານ ແຫ່ງ ສປປ ລາວ ທຸກທ່ານ ຈົ່ງມີສຸຂະພາບເຂັ້ມແຂງ ເປັນຫລັກທຸງໄຊ ເປັນຫລັກຮົ່ມໂພຮົ່ມໄຊ ຊີ້ນຳ-ນຳພາ ປະເທດຊາດບ້ານເມືອງ ປະຊາຊົນລາວບັນດາເຜ່ົາ ໃຫ້ຈະເລີນຮຸ່ງເຮືອງກ້າວໜ້າຍິ່ງໆ ຂຶ້ນໄປ ແລະ ຂໍອວຍໄຊໃຫ້ພອນແກ່ບັນດາທ່ານທັງຫລາຍ ຈົ່ງປະສົບພົບແຕ່ຄວາມສຸກຄວາມຈະເລີນ ກ້ານກຸ່ງຮຸ່ງ ເຮືອງຄື ຢູ່ດີມີສຸກ, ໄປດີມີສຸກ, ຢູ່ເຢັນເປັນສຸກ ແລະ ຮັ່ງມີສີສຸກ ທຸກທ່ານທຸກຄົນເທີ້ນ.
