ຜູ້ນຳຈີນໂທຫາຜູ້ນຳອາເມລິກາຂໍໃຫ້ອົດກັ້ນເລື່ອງ ສປປ ເກົາຫລີ
ປັກກິ່ງ 24 ເມສາ: ປະທານປະເທດ ສີຈິ້ນຜິງ ຂອງຈີນ ໂທລະສັບຫາປະທານາທິບໍດີ ໂດນັນ ທຣຳ ຂອງອາເມລິກາ ໃນວັນທີ 24 ເມສານີ້ ຂໍໃຫ້ໃຊ້ຄວາມອົດກັ້ນເລື່ອງ ສປປ ເກົາຫລີ.
ກະຊວງການຕ່າງປະເທດຈີນຖະແຫລງວ່າ: ປະທານປະເທດ ສີຈິ້ນຜິງ ໄດ້ກ່າວກັບປະທານາທິບໍດີ ທຣຳ ວ່າ: ຈີນຫວັງວ່າທຸກຝ່າຍທີ່ກ່ຽວຂ້ອງຈະໃຊ້ຄວາມອົດກັ້ນ ແລະ ຫລີກເວັ້ນການກະທຳທີ່ຈະຍິ່ງເຮັດໃຫ້ແຫລມເກົາຫລີເຄັ່ງຕຶງ, ຫົນທາງດຽວທີ່ຈະເຮັດໃຫ້ການປົດນິວເຄຼຍຢູ່ແຫລມເກົາຫລີເປັນຈິງ ແລະ ແກ້ໄຂບັນຫານິວເຄຼຍ ສປປ ເກົາຫລີ ໄດ້ຢ່າງວ່ອງໄວ ຄືທຸກຝ່າຍທີ່ກ່ຽວຂ້ອງຈະຕ້ອງເຮັດໜ້າທີ່ຂອງຕົນເອງ.
ຖືເປັນເທື່ອທີສອງທີ່ຜູ້ນຳສອງປະເທດມະຫາອຳນາດສົນທະນາທາງໂທລະສັບ ພາຍຫລັງພົບກັນເທື່ອທຳອິດຢູ່ເຮືອນຂອງທ່ານ ທຣຳ ໃນລັດຟໍຣິດາ ໃນຕົ້ນເດືອນນີ້ ແລະ ມີຂຶ້ນໃນຂະນະທີ່ຫລາຍຝ່າຍກັງວົນວ່າ ສປປ ເກົາຫລີ ຈະທົດລອງນິວເຄຼຍຄັ້ງທີ 6 ຫລື ທົດລອງລູກສອນໄຟເທື່ອໃໝ່ໃນວັນທີ 25 ເມສານີ້ ເຊິ່ງເປັນວັນສ້າງຕັ້ງກອງທັບປະຊາຊົນເກົາຫລີຄົບຮອບ 85 ປີ.
