ນະຄອນຫລວງວຽງຈັນເພີ່ມມາດຕະການຄວບຄຸມລາຄາສິນຄ້າໄລຍະປີໃໝ່
ໃນໂອກາດກະກຽມສະເຫລີມສະຫລອງປີໃໝ່ລາວນີ້, ນັກຂ່າວໜັງສືພິມລາວພັດທະນາພວກເຮົາ ໄດ້ລົງເກັບກຳລາຄາສິນຄ້າໃນທ້ອງຕະຫລາດໃຫຍ່ຫລາຍແຫ່ງໃນນະຄອນຫລວງວຽງຈັນ, ໂດຍສະເພາະແມ່ນຕະຫລາດຂົວດິນ, ທົ່ງພານທອງ, ໂພນຕ້ອງ ແລະ ຕະຫລາດທາດຫລວງ, ຊຶ່ງເຫັນວ່າມີການເອົາໃຈໃສ່ເປັນພິເສດຂອງເຈົ້າໜ້າທີ່ການຄ້າ ແລະ ໜ່ວຍງານຈັດສັນໃນຕະຫລາດດັ່ງກ່າວ ເພື່ອກວດກາ ແລະ ຄວບຄຸມບໍ່ໃຫ້ມີການສວຍໂອກາດຂຶ້ນສິນຄ້າໃນໄລຍະປີໃໝ່ໂດຍລຳພັງ, ດັ່ງທ່ານ ໄພທອງ ຫົວໜ້າຈັດສັນຕະຫລາດຂົວດິນ ໄດ້ໃຫ້ຮູ້ວ່າ: ໃນໄລຍະບຸນປີໃໝ່ນີ້, ທາງຕະຫລາດພວກເຮົາໄດ້ເພີ່ມກຳລັງເຈົ້າໜ້າທີ່ເພື່ອເຂົ້າໃນການກວດກາຄວບຄຸມລາຄາສິນຄ້າອຸປະໂພກ ແລະ ບໍລິ ໂພກທີ່ມີຜົນກະທົບໄວເຊັ່ນ: ເຂົ້າ, ຊີ້ນ, ປາ, ໄກ່ ແລະ ພຶດຜັກຕ່າງໆ ແມ່ນໄດ້ແນະນໍາໃຫ້ແມ່ຄ້າທຸກຄົນເອົາໃຈໃສ່ຕິດລາຄາສິນຄ້າ ແລະ ຫ້າມບໍ່ໃຫ້ລັກໂລບຕາຊິງ, ຊຶ່ງຫາກກວດພົບເຫັນແມ່ນຈະດຳເນີນການປັບໃໝ 1 ລ້ານກີບ, ພ້ອມເຮັດບົດບັນທຶກສົ່ງເຈົ້າໜ້າທີ່ດຳເນີນຄະດີຕາມລະບຽບ.
ສຳລັບລາຍການສິນຄ້າໃນຕະຫລາດຂົວດິນມີຄື: ລາຄາປານິນໜ້າກະຊັ່ງຊື້-ຂາຍສູງສຸດບໍ່ໃຫ້ເກີນ 16.500 ກີບ/ກິໂລ, ລາຄາຂາຍຍົກຂອງຜູ້ປະກອບການຂົນສົ່ງ 17.500 ກີບ/ກິໂລ, ລາຄາຂາຍຍ່ອຍລູກຂຽງຂາຍໃຫ້ແກ່ຜູ້ບໍລິໂພກ 20.000 ກີບ/ກິໂລ, ລາຄາໝູຂາຍຍອ່ຍປະເພດ 1 (ຊິ້ນກ້ອນ, ດູກຂ້າງ, ຊີ້ນ 3 ຊັ້ນ) ລາຄາ 33.000 ກີບ/ກິໂລ, ລາຄາຂາຍຍົກທັງໂຕທີ່ໄດ້ຂ້າ ແລະ ຄົວແລ້ວ 21.00 ກີບ/ກິໂລ, ລາຄາຊິ້ນງົວ-ຄວາຍຂາຍຍ່ອຍ 75.000 ກີບ/ກິໂລ, ສຳລັບສິນຄ້າອື່ນໆກໍໄດ້ມີການຕິດຕາມ ແລະ ໃຫ້ແມ່ຄ້າແຈ້ງລາຄາສິນຄ້າຢ່າງຈະແຈ້ງ, ພ້ອມຄວບຄຸມບໍ່ໃຫ້ຂຶ້ນລາຄາໂດຍລຳພັງຢ່າງເດັດຂາດ, ຖ້າໃຜລະເມີດຈະຖືກດຳເນີນຄະດີຢ່າງເດັດຂາດ.
ນອກຈາກນີ້, ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ໄດ້ອອກແຈ້ງການຫ້າມນຳເອົາສິນຄ້າທີ່ບໍ່ມີຄວາມປອດໄພ, ບໍ່ໄດ້ມາດຕະຖານ, ເຈືອປົນສານເປັນຜິດ ຫລື ໝົດອາຍຸການບໍລິໂພກອອກຈຳໜ່າຍ ຫລື ສະໜອງໃຫ້ແກ່ສັງຄົມຢ່າງເດັດຂາດ, ໂດຍສະເພາະອາຫານສົດ ເຊັ່ນ: ອາຫານທະເລດັ່ງ ກຸ້ງ, ຫອຍ, ປູ, ປາໝຶກ ແລະ ອື່ນໆ ຕ້ອງໄດ້ຮັບການກວດກາ ແລະ ມີເອກະສານຢັ້ງຢືນຄວາມຖືກຕ້ອງຈາກຂະແໜງກ່ຽວຂ້ອງ, ຫາກບຸກຄົນ ຫລື ອົງການຈັດຕັ້ງໃດລະເມີດແມ່ນຈະຖືກປະຕິບັດມາດຕະການອາຍັດ ຫລື ຍຶດສິນຄ້າແລ້ວນຳໄປທຳລາຍຖີ້ມ, ພ້ອມທັງປັບໃໝຕາມລະບຽບກົດໝາຍ.
