Apple ອາດເປີດໂຕ iPhone 8 ແລະ 8 Plus ສີແດງ (PRODUCT) RED ໄວໆນີ້
ບໍ່ແນ່ໃຈວ່າຈະແທ້ ຫຼື ບໍ່ ແຕ່ MacRumors ສື່ຕ່າງປະເທດເຜີຍວ່າ ໄດ້ຮັບເອກະສານບັນທຶກຊ່ວຍຈໍາ (Memo) ຂອງ Virgin Mobile ທີ່ກ່າວວ່າ iPhone 8 ແລະ 8 Plus ສີແດງ ຈະຖືກເປີດໂຕອອກມາໃນໄວໆນີ້.
ໂຄງການ (PRODUCT)RED ນີ້ໄດ້ຖືກກໍ່ຕັ້ງຂຶ້ນເມື່ອປີ 2006 ເພື່ອຊ່ວຍເຫຼືອຜູ້ທຸກຍາກ ແລະ ຕ້ອງຜະເຊີນກັບໂຣກໄພຕ່າງໆ ຊຶ່ງຜູ້ຜະລິດສິນຄ້າຫຼາຍລາຍລວມເຖິງ Apple ກໍໄດ້ເຂົ້າຮ່ວມແຄມເປນດ້ວຍການຈັດຈໍາໜ່າຍຜະລິດຕະພັນທີ່ໃສ່ຊື່ RED ພ້ອມດ້ວຍດີໄຊນ໌ເປັນສີແດງຢ່າງທີ່ເຫັນ.
ຊຶ່ງ Apple ເອງກໍໄດ້ເປີດໂຕສິນຄ້າໃນໂຄງການ (PRODUCT) RED ອອກມາແລ້ວຫຼາຍຮຸ່ນດ້ວຍກັນ ທັງ iPod, iPad ລວມໄປເຖິງການເປີດໂຕ iPhone 7 ແລະ 7 Plus ຮຸ່ນສີແດງ (PRODUCT) RED ອອກມາເມື່ອປີທີ່ແລ້ວນີ້ເອງ ໂດຍລາຍໄດ້ຈາກການຂາຍສິນຄ້ານັ້ນໆ ຈະຖືກນໍາໄປມອບໃຫ້ກັບກອງທຶນເພື່ອສະໜັບສະໜູນໂຄງການ ແລະ ຊ່ວຍເຫຼືອຜູ້ຕິດເຊື້ອ ເອັດໄອວີ ໃນອາຟຣິກາ.
ໃນຂະນະທີ່ບໍ່ມີການເວົ້າເຖິງ iPhone X ວ່າຈະມີການອອກຮຸ່ນສີແດງດ້ວຍແຕ່ຢ່າງໃດ ອາດເປັນເພາະວ່າ iPhone X ນັ້ນມີລາຄາສູງຢູ່ແລ້ວເຮັດໃຫ້ເຄື່ອງທີ່ມີສີພິເສດແບບນີ້ຂາຍໄດ້ຍາກກວ່າສີປົກກະຕິ.
