ລັດເລັ່ງສ້າງກົນໄກການເພີ່ມວິຕາມິນແຮ່ທາດໃສ່ໃນອາຫານຫລຸດອັດຕາລວງສູງຕ່ຳກວ່າມາດຕະຖານໃນເດັກ
ອົງການອານາໄມໂລກໃຫ້ຮູ້ວ່າ: ການຂາດສານອາຫານແມ່ນມີອັດຕາສ່ວນສູງໃນ ສປປ ລາວ, ໂດຍສະເພາະເດັກນ້ອຍເລີ່ມມີລວງສູງຕ່ຳກ່ວາມາດຕະຖານຕັ້ງແຕ່ອາຍຸ 6 ເດືອນສະເລ່ຍ 20% ຂອງພົນລະເມືອງ, ອີງຕາມການສຳຫລວດການຄ້ຳປະກັນດ້ານສະບຽງອາຫານ ແລະ ໂພຊະນາການ ຊຶ່ງສະແດງໃຫ້ເຫັນວ່າ: ມີປະມານ 25% ຂອງເດັກລຸ່ມ 5 ປີແມ່ນເປັນເລືອດຈາງ ແລະ ເກືອບ 36% ຂອງພົນລະເມືອງແມ່ນມີຄວາມສ່ຽງຕໍ່ການຂາດທາດສັງກະສີ ແລະ ການຂາດວິຕາມິນແຮ່ທາດຊະນິດອື່ນໆ.
ກະຊວງສາທາລະນະສຸກ ໃຫ້ຮູ້ວ່າ: ການເພີ່ມວິຕາມິນແຮ່ທາດໃສ່ອາຫານ, ແມ່ນຂະບວນການນຳເອົາວິຕາມິນແຮ່ທາດຕ່າງໆ ທີ່ຈຳເປັນເພີ່ມໃສ່ອາຫານ ເພື່ອຊ່ວຍປັບປຸງສະພາບການຂາດວິຕາມິນແຮ່ທາດຂອງພົນລະເມືອງ, ຊຶ່ງປັດຈຸບັນລັດຖະບານໄດ້ຖືເອົາບັນຫານີ້ເປັນມາດຕະຖານແກ້ໄຂການຂາດສານອາຫານດັ່ງກ່າວ, ໂດຍໄດ້ວາງຄາດໝາຍໄວ້ວ່າປີ 2025 ຈະເລັ່ງເພີ່ມວິຕາມິນແຮ່ທາດເຂົ້າໃນອາຫານຕ່າງໆເຊັ່ນ: ເຂົ້າ, ນ້ຳມັນ, ນ້ຳປາ, ເສັ້ນໝີ່ ແລະ ນ້ຳສະອິ້ວ, ນອກຈາກນີ້ໃນອານາຄົດຍັງຈະເພີ່ມເຂົ້າໃນນົມສັດ ແລະ ເຂົ້າຟາງ ເພື່ອຮັບປະກັນສຸຂະພາບທີ່ແຂງແຮງຂອງເດັກ.
ອົງການອານາໄມໂລກ ໃຫ້ຮູ້ວ່າ: ການນຳເຂົ້າອາຫານທີ່ເພີ່ມດ້ວຍວິຕາມິນແຮ່ທາດຈາກປະເທດອື່ນ, ກໍເປັນໂອກາດທີ່ດີສຳລັບ ສປປ ລາວ ເພື່ອປັບປຸງການເຂົ້າເຖິງວິຕາມິນແຮ່ທາດຂອງພົນລະເມືອງລາວ, ປະເທດລາວນຳເຂົ້າອາຫານຈາກບັນດາປະເທດໃນອາຊຽນ ເຊັ່ນ: ໄທ, ຫວຽດນາມ ແລະ ຈີນ, ຊຶ່ງ ບາງປະເທດກໍໄດ້ມີລະບຽບການສຳລັບເພີ່ມວິຕາມິນແຮ່ທາດໃສ່ໃນອາຫານມາແລ້ວ, ດັ່ງນັ້ນລັດຖະບານລາວ ຈຶ່ງໄດ້ຕັດສິນສ້າງເປັນລະບຽບທາງກົດໝາຍກ່ຽວກັບການນຳເຂົ້າອາຫານເຫລົ່ານັ້ນຕ້ອງໃຫ້ເພີ່ມວິຕາມິນແຮ່ທາດ ແລະ ເປັນອີກໂອກາດໜຶ່ງທີ່ຈະຊ່ວຍໃຫ້ມີການຈະເລີນເຕີບໂຕຂອງອຸດສາຫະກຳການປຸງແຕ່ງອາຫານໃນປະເທດ.
