ສໍາເລັດການແຂ່ງຂັນຄຣາສເບີກກອ໊ຟຄຣາສຊິກ

ການແຂ່ງຂັນ​ ຄຣາສ​ເບີກ ກອ໊ຟຄຣາສຊິກ ຄັ້ງ​ທຳ​ອິດ ​ໄດ​້ຈັດ​ຂຶ້ນໃນທ້າຍອາທິດຜ່ານມາ ທີ່ສະໜາມກິລາກອ໊ຟລອງຫວຽນ ເມືອງຫາດຊາຍຟອງ ນະຄອນຫລວງວຽງຈັນ ​​ເພື່ອ​ສະ​ເຫລີ​ມສະຫລອງ ຄົບຮອບ 170 ປີ ຂອງ ຄຣາສ​ເບີກ ​ແລະ ​ສົ່ງ​ເສີມ​ວົງ​ການ​ກິລາ​ກອ໊ຟລາວ​ໃຫ້​ພັດທະນາຍິ່ງຂຶ້ນ, ພ້ອມ​ທັງ​ຊ່ວຍ​ຝຶກ​ທັກ​ສະ​ນັກກິລາ​ສະໝັກ​ຫລິ້ນ​ໃຫ້​ສາມາດ​ເຂົ້າ​ສູ່​ການ​ແຂ່ງຂັນ​ມາດຕະຖານ​ສາ​ກົນ ​ຄຽງ​ຄູ່​ກັບ​ການ​ເປີ​ດປີ​ທ່ອງ​ທ່ຽວ​ລາວ 2018 ໃຫ້ມີບັນຍາກາດຟົດຟື້ນ ໃຫ້ກຽດເຂົ້າຮ່ວມໂດຍມີທ່ານ ສູນທອນ ສິລິສັກ ປະທານສະຫະພັນກິລາກອ໊ຟແຫ່ງຊາດລາວ, ຮອງຜູ້ອຳນວຍການບໍລິສັດ ເບຍລາວ ຈໍາກັດ, ທ່ານ ເຮັນຣິກ ຈູແອນເດີເຊັນ ຜູ້ອໍານວຍການບໍລິສັດເບຍລາວຈໍາກັດ. ການ​ແຂ່ງຂັນນີ້ ​ສຳລັບ​ສາຍ​ສະໝັກ​ຫລິ້ນ ​ແຂ່ງຂັນ​ 18 ຂຸມ, ໃຊ້​ລະບົບ​ການ​ໃຫ້​ຄະ​ແນນ​ 2 ປະເພດຄື Cross ແລະ Net, ຜ່ານການແຂ່ງຂັນປະເພດ Cross ຜົນປາກົດວ່າ: ອັນດັບທີ 1 ໄດ້ແກ່ທ່ານ jang heung soo, ອັນດັບທີ 2 ທ່ານ ກິ່ງດາວົງ ລັດຕະນະວົງ ແລະ ອັນດັບທີ 3 ທ່ານ ບົວຫອມ; ຂະນະທີ່ປະເພດ Net ອັນດັບທີ 1 ໄດ້ແກ່ທ່ານ ວິໄລສັກ ເພັດອາສາ, ອັນດັບທີ 2 ທ່ານ ສິນສະນົງສັກ ແລະ ອັນດັບທີ 3 ທ່ານ ວົງວິທັນ. ນອກຈາກນີ້ ຍັງ​ມີ​ລາງວັນ​ຕີ​ໃກ້ທຸງ 2 ລາງວັນ, ຕີ​ໄກ 1 ລາງວັນ, ຕີໃກ້ເສັ້ນ ​ແລະ ລາງວັນ HOLE IN ONE ສອງ​ລາງວັນ ລວມມູນ​ຄ່າທັງ​ໝົດຫລາຍກວ່າ 100 ລ້ານ​ກີບ.