ລາວກຽມຮ່ວມມືສຶກສາຄວາມເປັນໄປໄດ້ການສ້າງເຂດພັດທະນາຊອບແວ
ພິທີເຊັນບົດບັນທຶກຄວາມເຂົ້າໃຈ ລະຫວ່າງກະຊວງວິທະຍາສາດ ແລະ ເຕັກໂນໂລຊີ (ກວຕ) ແລະ ບໍລິສັດ Lao Net Communication ວ່າດ້ວຍໂຄງການຮ່ວມມືພັດທະນາ Software Park ແລະ ບໍລິການລະບົບ Cloud ຢູ່ ສປປ ລາວ ໄດ້ມີຂຶ້ນໃນວັນທີ 3 ເມສານີ້ ທີ່ໂຮງແຮມດອນຈັນພາເລດ ລະຫວ່າງທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕ໋ອນ, ທ່ານ ຄໍາເພັດ ວົງດາລາ ຮັກສາການຫົວໜ້າກົມແຜນການ ແລະ ຮ່ວມມື ແລະ ທ່ານ ມາດານ (Ma Dan) ຜູ້ອໍານວຍການບໍລິສັດ Lao Net Communication ໂດຍມີທ່ານ ບໍ່ວຽງຄໍາ ວົງດາລາ ກຳມະການສູນກາງພັກ, ລັດຖະມົນຕີກະຊວງດັ່ງກ່າວ ແລະ ພະນັກງານວິຊາການສອງຝ່າຍເຂົ້າຮ່ວມ ເພື່ອຮ່ວມກັນສຶກສາຄົ້ນ ຄວ້າເຖິງຄວາມເປັນໄປໄດ້ໃນການຮ່ວມມືສ້າງເຂດພັດທະນາຊອບແວ ຫຼື ເອີ້ນວ່າ software park ເພື່ອສ້າງເປັນພື້ນຖານໂຄງລ່າງສໍາຄັນໃນການຊຸກຍູ້ສົ່ງ ເສີມການພັດທະນາອຸດສາຫະກຳຊອບແວ (Software industry) ຢູ່ ສປປ ລາວ. ພ້ອມດຽວກັນນັ້ນ ກໍເປັນການສ້າງເງື່ອນໄຂອໍານວຍຄວາມສະດວກໃຫ້ແກ່ການຄົ້ນຄວ້າພັດທະນາລະບົບ Cloud Computing ເປັນຕົ້ນ Lao Net Communication Enterprise Cloud ແລະ Big Data Management System. ນອກນີ້ ທັງສອງຝ່າຍກໍຈະຮ່ວມກັນສຶກສາຄົ້ນຄວ້າເຖິງຄວາມເປັນໄປໄດ້ໃນການພັດທະນາລະບົບຊໍາລະສະສາງແບບອອນລາຍ (Online Payment Platform), ລະບົບຊື້ຂາຍແບບອອນລາຍ (Online Shopping Platform) ແລະ ລະບົບລາຍເຊັນດິຈີຕ໋ອນ (Digital Signature System ) ເພື່ອແນໃສ່ຊຸກຍູ້ສົ່ງເສີມການເຮັດທຸລະກຳທາງເອເລັກໂຕຣນິກໃນ ສປປ ລາວ ໃຫ້ມີປະສິດຜົນ ແລະ ມີຄວາມປອດໄພສູງ.
