ລົດແກ້ວ ຄວ້າຂັນຊະນະເລີດ ແລ່ນມິນິມາຣາທອນ ທີ່ອຳນາດຈະເລີນ ປະເທດໄທ

ລົດແກ້ວ ອິນທະກຸມມານ ນັກແລ່ນທີມຊາດລາວ ອາຍຸ 23 ປີ ສືບຕໍ່ສ້າງຜົນງານຢ່າງຕໍ່ເນື່ອງ, ຫລ້າສຸດໃນວັນທີ 31 ມີນາຜ່ານມາ ສາມາດຄອງຂັນຊະນະເລີດ ການແຂ່ງຂັນແລ່ນມິນິມາຣາທອນ ທີ່ອຳນາດຈະເລີນ ປະເທດໄທ ປະເພດຍິງທົ່ວໄປ 10,5 ກິໂລແມັດ ດ້ວຍເວລາ 41 ນາທີ 50 ວິນາທີ.

ລາຍການນີ້ ມີນັກກິລາເຂົ້າຮ່ວມ 3.000 ກວ່າຄົນ ແບ່ງອອກເປັນ 2 ປະເພດຄື: ມິນິມາຣາທອນ 10,5 ກິໂລແມັດ ແລະ ຍ່າງ-ແລ່ນເພື່ອສຸຂະພາບ 4,7 ກິໂລແມັດ. ລົດແກ້ວ ເປັນຄົນລາວຄົນດຽວທີ່ເຂົ້າຮ່ວມແຂ່ງຂັນ.

ນີ້ເປັນແຊ້ມລາຍການທີ 3 ຕິດຕໍ່ກັນຂອງ ລົດແກ້ວ ອິນທະກຸມມານ ຕໍ່ຈາກລາຍການ ບູຣີຣຳ ມາຣາທອນ 2018 (BURIRAM MARATHON 2018) ແລະ ວຽງຈັນ ຮາຟມາຣາທອນ ນາໆຊາດ 2018 (Vientiane International Half Marathon 2018).

ລາຍການຕໍ່ໄປ ລົດແກ້ວ ພ້ອມດ້ວຍນັກແລ່ນເພດຊາຍຈາກ ສປປ ລາວ ອີກ 5 ຄົນ ຈະເຂົ້າຮ່ວມການແຂ່ງຂັນ ສິງກະໂປ ໂອເພັນ ຢູ່ປະເທດສິງກະໂປ ໃນວັນທີ 13 ເມສານີ້ ຄາດວ່າຈະມີນັກກິລາຫລາຍຫມື່ນຄົນຈາກທົ່ວໂລກເຂົ້າຮ່ວມ ໂດຍ ລົດແກ້ວ ຈະລົງແຂ່ງຂັນລາຍການ 800 ແມັດ ແລະ 1.500 ແມັດ.

ສຳລັບເງິນລາງວັນທີ່ ລົດແລ້ວ ໄດ້ຈາກການແຂ່ງຂັນຄັ້ງນີ້ ແມ່ນສືບຕໍ່ຫັກ 10% ເພື່ອປະກອບສ່ວນສົມທົບທຶນຊ່ວຍເຫລືອສ້າງໂຮງຮຽນບ້ານກັດ ເມືອງໄຊ ແຂວງອຸດົມໄຊ.