ກະຊວງ ຜທ ດຳເນີນກອງປະຊຸມກວດກາ ປະຈຳປີ 2017
ໃນວັນທີ 4 ເມສານີ້, ກະຊວງແຜນການ ແລະ ການລົງທຶນ (ຜທ) ໄດ້ຈັດກອງປະຊຸມສະຫລຸບຕີລາຄາວຽກງານກວດກາທົ່ວກະຊວງຂອງຕົນຂຶ້ນ ພາຍໃຕ້ການເປັນປະທານຮ່ວມຂອງທ່ານ ຄຳລຽນ ພົນເສນາ ປະທານຄະນະກວດກາພັກ, ຮອງລັດຖະມົນຕີກະຊວງແຜນການ ແລະ ການລົງທຶນ ໂດຍມີທ່ານ ດາວບົວລະພາ ບາວົງເພັດ ຮອງປະທານຄະນະກວດກາສູນກາງພັກ, ຮອງປະທານອົງການກວດກາລັດຖະບານ, ມີປະທານກວດກາໜ່ວຍພັກ ແລະ ພະນັກງານຫລັກແຫລ່ງທີ່ກ່ຽວຂ້ອງເຂົ້າຮ່ວມ ຫລາຍກວ່າ 70 ຄົນ.
ທ່ານ ຄຳລຽນ ພົນເສນາ ກ່າວເປີດກອງປະຊຸມວ່າ: ພັກ-ລັດເຮົາຍາມໃດກໍໃຫ້ຄວາມສຳຄັນຕໍ່ວຽກງານຕິດຕາມກວດກາ, ແມ່ນໜຶ່ງໃນພາລະບົດບາດຕົ້ນຕໍແຫ່ງການນໍາພາຂອງພັກ ຖ້າບໍ່ມີການກວດກາ ກໍໝາຍຄວາມວ່າບໍ່ມີການນຳພາວຽກງານ, ການຕິດຕາມກວດກາແມ່ນວຽກທີ່ສອດຫ້ອຍເຂົ້າທຸກຂົງເຂດວຽກງານ ເປັນວຽກທີ່ຕ້ອງໄດ້ເຮັດເປັນປົກກະຕິ ແລະ ຂາດບໍ່ໄດ້ສຳລັບການນຳພາຂອງພັກ ແລະ ການຄຸ້ມຄອງບໍລິຫານຂອງລັດ.
ການຕິດຕາມກວດກາຍິ່ງມີບົດບາດສຳຄັນສຳລັບການນຳພາຂອງພັກໃນເງື່ອນໄຂໃໝ່ ເພາະວ່າມັນຊ່ວຍໃຫ້ພວກເຮົາສາມາດຊອກເຫັນຈຸດອ່ອນ ແລະ ຂໍ້ບົກຜ່ອງຕ່າງໆ ເພື່ອຈະໄດ້ປັບປຸງແກ້ໄຂ ແລະ ທັງຊ່ວຍສະກັດກັ້ນປາກົດການຫຍໍ້ທໍ້ຕ່າງໆ ທີ່ຈະສົ່ງຜົນກະທົບເຖິງອິດທິພົນຂອງພັກໄດ້ຢ່າງທັນການ ໂດຍສະເພາະຢ່າງຍິ່ງຂະແໜງແຜນການ ແລະ ການລົງທຶນ ແມ່ນຂະແໜງການທີ່ຕິດພັນກັບເສດຖະກິດ, ຕິດພັນກັບຜູ້ລົງທຶນ-ຜູ້ຮັບເໝົາກໍ່ສ້າງ, ຕິດພັນກັບສິດຜົນປະໂຫຍດ ຍິ່ງຕ້ອງເຊີດຊູວຽກງານກວດກາໃຫ້ສູງຂຶ້ນ. ທັງນີ້ກໍເພື່ອປົກປ້ອງຜົນປະໂຫຍດຂອງປະເທດຊາດ, ຜົນປະໂຫຍດຂອງປະຊາຊົນ ແລະ ທັງເປັນການປົກປ້ອງສະມາຊິກພັກ, ພະນັກງານ-ລັດຖະກອນບໍ່ໃຫ້ເກີດມີປາກົດການຫຍໍ້ທໍ້, ພະຍາດອາດຍາສິດ, ສໍ້ລາດບັງຫລວງ, ລະເມີດກົດລະບຽບຂອງພັກ ແລະ ກົດໝາຍຂອງລັດ.
ໃນລະຫວ່າງກອງປະຊຸມ, ຜູ້ເຂົ້າຮ່ວມໄດ້ຮັບຟັງການເຜີຍແຜ່ບົດສະຫລຸບຫຍໍ້ການເຄື່ອນໄຫວວຽກງານກວດກາປີ 2017 ແລະ ທິດທາງປີ 2018 ຂອງຄະນະກວດກາສູນກາງ; ບົດໂອ້ລົມຂອງ ສະຫາຍ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ຕໍ່ກອງປະຊຸມກວດກາທົ່ວປະເທດປະຈຳປີ 2017; ບົດແນະນຳຂອງອົງການກວດກາລັດຖະບານກ່ຽວກັບການດຳເນີນຄະດີສໍ້ລາດບັງຫລວງ ເພື່ອແນໃສ່ປັບປຸງວຽກງານກວດກາຂອງຂະແໜງແຜນການ ແລະ ການລົງທຶນໃຫ້ດີຂຶ້ນໃນຕໍ່ໜ້າ.
ໃນໂອກາດນີ້, ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ໄດ້ເນັ້ນໃຫ້ຄະນະພັກ, ຄະນະກວດກາ, ໜ່ວຍພັກ, ຄະນະພັກຮາກຖານ ແລະ ພະນັກງານເຮັດວຽກກວດກາ ຕ້ອງມີຄວາມເຂົ້າໃຈທີ່ຖືກຕ້ອງເປັນເອກະພາບ, ເລິກເຊິ່ງກ່ຽວກັບວຽກງານກວດກາໄລຍະໃໝ່, ການແກ້ໄຂຜົນຂອງການກວດກາຕ້ອງຮັບປະກັນຄວາມຖືກຕ້ອງໂປ່ງໃສ ແລະ ເປັນທຳ, ເດັດຂາດລົງໂທດ, ລົງວິໄນຢ່າງເໝາະສົມຕໍ່ຜູ້ກະທໍາຜິດ.
ຄະນະພັກ, ຄະນຳແຕ່ລະຂັ້ນຕ້ອງໄດ້ເອົາໃຈໃສ່ຊີ້ນຳ-ນຳພາ ເປັນເຈົ້າການເຮັດວຽກງານຕິດ ຕາມ, ກວດກາດ້ວຍຄວາມຮັບຜິດຊອບສູງ ບໍ່ແມ່ນວ່າລໍຖ້າແຕ່ຄະນະກວດກາ, ຜູ້ກວດກາໜ່ວຍພັກ ຫລື ຜູ້ທີ່ມີໜ້າທີ່ເຮັດວຽກງານກວດກາເທົ່ານັ້ນ ທຸກຄົນຕ້ອງເປັນເຈົ້າການຮ່ວມກັນ ເພື່ອສະກັດກັ້ນການລະເມີດລະບຽບກົດໝາຍແຕ່ຫົວທີ ຕາມແນວທາງນະໂຍບາຍຂອງພັກ ແລະ ລັດຖະບານ; ຕ້ອງເອົາ ໃຈໃສ່ປັບປຸງດ້ານການຈັດຕັ້ງ, ບຸກຄະລາກອນ ແລະ ລະບອບແບບແຜນວິທີເຄື່ອນໄຫວຂອງບັນດາຜູ້ທີ່ເຮັດວຽກງານກວດກາ ອັນນີ້ເປັນສິ່ງຕັດສິນໂດຍກົງເຖິງປະສິດທິຜົນຂອງວຽກງານກວດກາ ແລະ ໃນຊຸມປີຕໍ່ໜ້າ ຂະແໜງການຈະໄດ້ເອົາໃຈໃສ່ຊີ້ນຳເພື່ອເສີມຂະຫຍາຍກຳລັງແຮງຂອງມະຫາຊົນທີ່ມີການຈັດຕັ້ງເຂົ້າໃນການກວດກາພັກ-ລັດມີຄວາມຈຳເປັນ ແລະ ສຳຄັນຢ່າງຍິ່ງ ໃນການປັບປຸງວຽກງານກວດກາໃນໄລຍະໃໝ່.
ນອກຈາກນັ້ນ, ຕ້ອງໄດ້ເພີ່ມທະວີຄວາມຮັບຜິບຊອບຕໍ່ກັບການຕົກລົງແກ້ໄຂຜົນຂອງການກວດກາໃຫ້ເຂັ້ມງວດ, ສັກສິດຕາມລະບຽບຫລັກການ ແລະ ກົດໝາຍຢ່າງຖືກຕ້ອງ, ຖ້າກວດກາແລ້ວບໍ່ມີການແກ້ໄຂ ກໍຖືວ່າການກວດການນັ້ນບໍ່ມີຄວາມໝາຍ, ການກວດກາເປັນການສຶກສາອົບຮົມ ການປະຕິບັດກົດລະບຽບຂອງພັກ ແລະ ລັດຢ່າງເຂັ້ມງວດ, ເປົ້າໝາຍຖືກກວດກາຕ້ອງຮູ້ເສີມຂະຫຍາຍໄດ້ດ້ານດີ ແລະ ແກ້ໄຂຈຸດອ່ອນ, ຂໍ້ຂາດຕົກບົກຜ່ອງ, ຜູ້ເຮັດດີມີຜົນງານກໍຕ້ອງໄດ້ຮັບການຍ້ອງຍໍສັນ ລະເສີນ ແລະ ໃຫ້ມີຄວາມກ້າວໜ້າຂຶ້ນ, ຜູ້ທີ່ລ່ວງລະເມີດລະບຽບຂອງພັກ, ກົດໝາຍຂອງລັດ, ກະທໍາຜິດກໍຕ້ອງໄດ້ຮັບຜິດຕາມລະບຽບກົດໝາຍ.
