ອິບຣາ ອາດບໍ່ໄດ້ຫລິ້ນບານໂລກ ເຫດກ່ຽວຂ້ອງບໍລິສັດພະນັນ
ເດິ ມິເຣີ ສື່ຂອງອັງກິດ ລາຍງານຂ່າວ ຊະລາຕັນ ອິບຣາຮິໂມວິຊ ຫົວຫອກ ລອສແອງເຈລິສ ແກແລັກຊີ ອາດບໍ່ໄດ້ຊ່ວຍທີມຊາດສະວີເດນໃນການແຂ່ງຂັນບານໂລກ 2018 ເພາະເປັນທູດຂອງ ເບັດຮາດ ບໍລິສັດຮັບພະນັນແຫ່ງໜຶ່ງ ຫລັງຈາກເວລາຜ່ານມາ ມີກະແສຂ່າວລືວ່າ ອິບຣາ ອາດຈະກັບມາຫລິ້ນໃຫ້ ໄວກິ້ງ ອີກຄັ້ງ.
ຊະລາຕັນ ອິບຣາຮິໂມວິຊ ກອງໜ້າຄົນໃໝ່ຂອງ ລອສແອງເຈລິສ ແກແລັກຊີ ສະໂມສອນໃນເສິກເມເຈີລີກ ຊອກເກີ (MLS) ສະຫະລັດອາເມລິກາ ອາດຈະໝົດສິດຫວນຕິດທີມຊາດສະວີເດນ ຊຸດເຕະບານໂລກ 2018 ຮອບສຸດທ້າຍ ຈາກການທີ່ລາວມີສ່ວນກ່ຽວຂ້ອງກັບ ເບັດຮາດ ບໍລິສັດຮັບພະນັນແຫ່ງໜຶ່ງ ຕາມລາຍງານຂອງ ເດິ ມິເຣີ ສື່ຊື່ດັງຂອງປະເທດອັງກິດ.
ຫລັງຈາກທີ່ ສະວີເດນ ໄດ້ສິດເຂົ້າແຂ່ງເຕະບານໂລກ 2018 ຮອບສຸດທ້າຍ ຈາກການຜ່ານ ອີຕາລີ ໃນຮອບຄັດເລືອກ ຮອບເພລອອຟ ໃນເດືອນພະຈິກຜ່ານມາ ໄດ້ແລ້ວນັ້ນ ກໍມີຂ່າວລືອອກມາເລື້ອຍໆວ່າ ອິບຣາຮິໂມວິຊ ອາດຈະຕັດສິນໃຈກັບມາຮັບໃຊ້ບ້ານເກີດ ພາຍຫລັງລາວຢຸດອາຊີບນັກເຕະຕອນຈົບ ຢູໂຣ 2016.
ເຖິງຢ່າງໃດກໍຕາມ, ບັນຫາກໍຄື ອິບຣາຮິໂມວິຊ ເປັນທູດຂອງ ເບັດຮາດ ບໍລິສັດຮັບພະນັນສັນຊາດມອລຕາ ແລະ ກົດຂອງສະຫະພັນບານເຕະນານາຊາດ (ຟີຟາ) ລະບຸເອົາໄວ້ວ່າ ບຸກຄົນໃດກໍຕາມທີ່ກ່ຽວຂ້ອງກັບອົງການພະນັນຈະບໍ່ມີສິດມີສ່ວນກ່ຽວຂ້ອງກັບການແຂ່ງຂັນໃຫຍ່ລະດັບທີມຊາດ ລວມທັງກໍລະນີຂອງນັກເຕະຊາວສະວີເດນອີກດ້ວຍ.
