ມຽນມາອະນຸຍາດການຢ້ຽມຢາມ ຂອງສະພາຄວາມໝັ້ນຄົງ ສປຊ
ລັດຖະບານມຽນມາອະນຸມັດການຢ້ຽມຢາມຂອງສະພາຄວາມໝັ້ນຄົງແຫ່ງສະຫະປະຊາຊາດ, ແຕ່ຍັງບໍ່ແນ່ນອນວ່າຈະໄດ້ມີໂອກາດລົງພື້ນທີ່ລັດຍະໄຂ່ ຫລື ບໍ່.
.@PeruEnLaONU assumes the #UNSC presidency for April. Amb Meza-Cuadra said the council will travel to #Myanmar, #Bangladesh, #Iraq. He said they want to visit Myanmar’s #Rakhine state. @KuwaitMissionUN initially proposed Myanmar trip in Feb, but Myanmar said not the right time.
— Michelle Nichols (@michellenichols) April 2, 2018
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາ ໃນວັນທີ 3 ເມສາວ່າ: ທ່ານ ກຸສຕາໂວ ເມຊ ກົວດຣາ ເອກອັກຄະລາຊະທູດເປຣູປະຈຳສະຫະປະຊາຊາດ (UN) ໃນຖານະປະທານໝູນວຽນປະຈຳເດືອນເມສາ ຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ກ່າວໃນວັນທີ 2 ເມສາວ່າ: UNSC ສາມາດເຈລະຈາບັນລຸຂໍ້ຕົກລົງກັບລັດຖະບານມຽນມາ ໃນການໃຫ້ຄະນະນັກການທູດຈາກ 15 ປະເທດສະມາຊິກຂອງ UNSC ເດີນທາງຢ້ຽມຢາມມຽນມາ ຫລັງມີຄວາມພະຍາຍາມເຈລະຈາຂໍເຂົ້າປະເທດມາແລ້ວຫລາຍຄັ້ງ.
ເຖິງຢ່າງໃດກໍຕາມ, ທ່ານ ເມຊາ ກົວດຣາ ຍອມຮັບວ່າຍັງຕ້ອງມີການຫາລືອີກຫລາຍຂັ້ນຕອນກັບລັດຖະບານມຽນມາ ແລະ ຍັງບໍ່ແນ່ນອນວ່າຄະນະເຈົ້າໜ້າທີ່ການທູດຂອງ UNSC ຈະໄດ້ຮັບອະນຸຍາດໃຫ້ເດີນທາງຢ້ຽມຢາມ “ພື້ນທີ່ອ່ອນໄຫວ” ຄືລັດຍະໄຂ່ ເຊິ່ງຢູ່ທາງຕາເວັນຕົກຂອງປະເທດ ຫລື ບໍ່, ແຕ່ທຸກຝ່າຍ “ມີຄວາມສົນໃຈ” ຕໍ່ສະຖານະການທີ່ເກີດຂຶ້ນໃນລັດຍະໄຂ່ ແລະ ຫວັງເປັນຢ່າງຍິ່ງໃນການມີໂອກາດລົງພື້ນທີ່ ເພື່ອສັງເກດການຄວາມເປັນໄປດ້ວຍຕົນເອງ. ຂະນະທີ່ລັດຖະບານມຽນມາຍັງສະຫງວນທ່າທີຕໍ່ການເປີດເຜີຍດັ່ງກ່າວຂອງເອກອັກຄະລາຊະທູດເປຣູ ເຊິ່ງຮ່ວມກັບກູເວດ ແລະ ສະຫະລາຊະອານາຈັກ ໃນການວາງແຜນການຢ້ຽມຢາມຄັ້ງນີ້.
