Mark Zuckerberg ຊື້ໂຄສະນາທັງໜ້າເພື່ອກ່າວຄໍາຂໍໂທດແກ່ຜູ້ໃຊ້ Facebook
Mark Zuckerberg ຜູ້ບໍລິຫານໃຫຍ່ຂອງ Facebook ເຈົ້າຂອງສື່ສັງຄົມອອນລາຍໃຫຍ່ຂອງໂລກ ໄດ້ລົງທຶນຊື້ໂຄສະນາໝົດໜ້າຂອງໜັງສືພິມທັງໃນອັງກິດ ແລະ ອາເມລິກາ ເພື່ອເປັນພື້ນທີ່ໃນການກ່າວຄໍາຂໍໂທດແກ່ຜູ້ໃຊ້ Facebook ຈາກກໍລະນີການລະເມີດດ້ານຂໍ້ມູນສ່ວນຕົວຂອງຜູ້ໃຊ້ ເປັນເຫດໃຫ້ເກີດຄວາມບໍ່ພໍໃຈ ແລະ ຫຼຸດຄວມເຊື່ອໝັ້ນຂອງຜູ້ໃຊ້ລົງນັ້ນເອງ.
ໃນຂໍ້ຄວາມຖະແຫຼງຄໍາຂໍໂທດຂອງ Mark Zuckerberg ໄດ້ລະບຸວ່າ “ເຈົ້າອາດຈະເຄີຍໄດ້ຍິນເລື່ອງຂອງການທົດສອບແອັບ ໂດຍມະຫາວິທະຍາໄລ ຈົນເປັນສາເຫດໃຫ້ຂໍ້ມູນຜູ້ໃຊ້ Facebook ຮົ່ວໄຫຼນັບລ້ານລາຍການໃນປີ 2014 ຊຶ່ງສິ່ງທີ່ກ່າວມາມັນທໍາລາຍຄວາມໄວ້ວາງໃຈຜູ້ໃຊ້ Facebook ຢ່າງຫຼວງຫຼາຍ ແລະ ທາງເຮົາຕ້ອງຂໍໂທດເປັນຢ່າງຍິ່ງ ທີ່ຍັງບໍ່ສາມາດເຮັດຫຍັງໄດ້ຫຼາຍໃນຕອນນີ້ ແຕ່ຂໍໃຫ້ເຊື່ອໝັ້ນວ່າເຮົາກໍາລັງເລັ່ງດໍາເນີນການທຸກຢ່າງພຽງບໍ່ໃຫ້ເຫດການແບບນີ້ເກີດຂຶ້ນອີກ”
ຊຶ່ງໂທນສີ ແລະ ການຈັດວາງຂໍ້ຄວາມ ແລະ ຕໍາແໜງຕ່າງໆ ຂອງຄໍາຂໍໂທດຈາກ Facebook ໃນຄັ້ງນີ້ສາມາດສໍາຜັດການສະແດງຄວາມເສຍໃຈຢ່າງທີ່ສຸດດ້ວຍການໃຊ້ພຽງພື້ນຫຼັງຂາວ, ໂຕໜັງສືດໍາ ແລະ ນໍາໂລໂກ້ຂອງ Facebook ນ້ອຍໆໄປໄວ້ທີ່ທ້າຍເຈ້ຍ.
ໂດຍໜັງສືພິມຕ່າງໆ ໃນສະບັບວັນທີ 25 ມີນາ ທີ່ທາງ Zuckerberg ໄດ້ຊື້ພື້ນທີ່ເພື່ອລົງຄໍາຂໍໂທດແກ່ຜູ້ໃຊ້ຂອງເຂົານັ້ນໄດ້ແກ່ The Observer, The Sunday Times, Mail on Sunday, Sunday Mirror, Sunday Express, Sunday Telegraph, The New York Times, The Washington Post ແລະ The Wall Street Journal.
