ການຜະລິດເຂົ້ານາແຊງຂອງແຂວງສະຫວັນນະເຂດບັນລຸເກືອບ 90%

ຕາມການລາຍງານຂອງຂະແໜງປູກຝັງແຂວງສະຫວັນນະເຂດໃຫ້ຮູ້ວ່າ: ມາຮອດປັດຈຸບັນການປັດດຳເຂົ້າ ນາແຊງຂອງຊາວນາຊາວກະສິກອນໃນທົ່ວແຂວງສະຫວັນນະເຂດແມ່ນໄດ້ດຳເນີນໄປຢ່າງເປັນຂະບວນຟົດຟື້ນ ເຊິ່ງມາຮອດວັນທີ 18 ເມສານີ້ ແມ່ນໄດ້ສຳເລັດການປັກດຳ ແລ້ວໃນເນື້ອທີ່ທັງໝົດ 26.907  ເຮັກຕາ, ເທົ່າກັບ 87,9%   ຂອງ ແຜນການໃນນີ້: ນາດຳ 19.942 ເຮັກຕາ, ນາຫວານ 6.838 ເຮັກຕາ ແລະ ນາຢອດ ອີກຈຳນວນ 127 ເຮັກຕາ.

ສຳລັບແຜນການປູກເຂົ້າ  ນາແຊງປີ 2017 ນີ້ທົ່ວແຂວງຈະໃຫ້ໄດ້ 30.600 ເຮັກຕາ,  ດ້ວຍສະມັດຕະພາບ ການເກັບ  ກ່ຽວໃຫ້ໄດ້ 5,41 ໂຕນ/ ເຮັກຕາ,  ຄາດຄະເນຜົນຜະລິດບັນລຸ 165.431 ໂຕນ. ສ່ວນການປູກ   ພືດລະດູແລ້ງມາຮອດປັດຈຸບັນ ປະຕິບັດໄດ້ແລ້ວ 22.260 ເຮັກຕາ, ເທົ່າກັບ 80% ຂອງ ແຜນການ (27.700 ເຮັກຕາ) ເຊິ່ງພືດທີ່ປູກຫລາຍກວ່າໝູ່ໄດ້ແກ່: ອ້ອຍ, ມັນຕົ້ນ, ມັນດ້າງ,  ຜັກບົ່ວ, ເຜືອກ, ສາລີ ແລະ ພືດຜັກຊະນິດຕ່າງໆ.