ຖວທ ຝຶກອົບຮົມວຽກງານຫ້ອງການໃນຫົວຂໍ້ “ເອກະສານທາງການ”

ໃນວັນທີ 28-29 ມີນານີ້, ຫ້ອງການກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ), ໄດ້ຈັດຊຸດຝຶກອົບຮົມວຽກງານຫ້ອງການໃນຫົວຂໍ້ “ເອກະສານທາງການ” ສະບັບເລກທີ 285/ຖວທ, ລົງວັນທີ 23 ມີນາ 2018, ຂຶ້ນທີ່ນະຄອນຫຼວງວຽງຈັນ, ໂດຍການເປັນປະທານຂອງທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງ ຖວທ, ມີບັນດາວິທະນາກອນ ແລະ ນັກສໍາມະຍາກອນ ອ້ອມຂ້າງກະຊວງ ຖທວ ເຂົ້າຮ່ວມ. ເພື່ອແນໃສ່ແລກປ່ຽນ ແລະ ຖອດຖອນບົດຮຽນກ່ຽວກັບຄວາມສໍາຄັນ ແລະ ຄວາມຈໍາເປັນຂອງເອກະສານທາງການ, ຮຽນຮູ້ຂໍ້ກໍານົດລະບຽບຫຼັກການໃນຮ່າງເອກະສານທາງການຕ່າງໆ ໃຫ້ມີຄວາມເປັນເອກະພາບໃນການນໍາໃຊ້, ມີຄວາມຊັດເຈນ ແລະ ວອງໄວຂຶ້ນ.

ໃນພິທີທ່ານຮອງລັດຖະມົນຕີ ຖວທ ໄດ້ກ່າວວ່າ: ໃນໄລຍະຜ່ານມາວຽກງານຫ້ອງການເວົ້າລວມ, ເວົ້າສະເພາະ ດ້ານວຽກງານເອກະສານທາງການຂອງກະຊວງ ຖວທ ເຖິງວ່າໄດ້ມີການປັບປຸງ, ມີການພັດທະນາດີຂຶ້ນ, ຖືກຕາມລະບຽບຫຼັກການຫຼາຍຂຶ້ນ, ທັງຫັນມານໍາໃຊ້ລະບົບຖານຂໍ້ມູນເຮັດໃຫ້ການຄຸ້ມຄອງເອກະສານ, ການບັນທຶກຕິດຕາມເອກະສານມີຄວາມຄ່ອງຕົວ ແລະ ວ່ອງໄວຂຶ້ນ, ແຕ່ມີຫຼາຍກົມກອງ, ຫຼາຍພາກສ່ວນ, ຫຼາຍບຸກຄົນ ທີ່ຮັບຜິດຊອບວຽກງານເອກະສານທາງການ ຍັງບໍ່ທັນໄດ້ຮຽນຮູ້ກົດໝາຍ, ດໍາລັດ, ຂໍ້ກໍານົດ, ລະບຽບຫຼັກການດ້ານເອກະສານທາງການ, ດັ່ງນັ້ນ ຈຶ່ງເຮັດໃຫ້ຮ່າງເອກະສານທາງການເປັນຕົ້ນແມ່ນ: ໜັງສືສະເໜີ, ຂໍ້ຕົກລົງ, ບົດສະຫຼຸບ, ບົດລາຍງານ ແລະ ອື່ນໆ ຍັງບໍ່ທັນເປັນເອກະພາບ, ບໍ່ຖືກຕ້ອງຕາມລະບຽບຫຼັກການທີ່ໄດ້ກໍານົດໄວ້, ຈຶ່ງເຮັດໃຫ້ວຽກງານດັ່ງກ່າວໃນໄລຍະຜ່ານມາ ມີຄວາມແກ່ຍາວເສຍເວລາຍ້ອນການໄດ້ດັດແປງປັບປຸງແກ້ໄຂໄປມາຫຼາຍຄັ້ງ ເຮັດໃຫ້ການແກ້ໄຂວຽກງານມີຄວາມຫລ້າຊ້າບໍ່ທັນການ.

ໃນໂອກາດດັ່ງກ່າວ, ນັກສໍາມະນາກອນໄດ້ຮັບຟັງ ການເຜີຍແຜ່ ດໍາລັດ ວ່າດ້ວຍເອກະສານທາງການ, ຈາກວິທະນາກອນ ກະຊວງພາຍໃນ ຊຶ່ງເປັນກະຊວງທີ່ໄດ້ຮ່າງ ແລະ ກໍານົດລະບຽບຫຼັກການຂອງເອກະສານທາງການ ເພື່ອຊົມໃຊ້ໃຫ້ມີຄວາມເປັນເອກະພາບໃນຂອບເຂດທົ່ວປະເທດ ເປັນຜູ້ເຜີຍແຜ່ໂດຍກົງ ຊຶ່ງລວມມີທັງໝົດ 7 ໝວດຄື: ບົດບັນຍັດທົ່ວໄປ, ປະເພດ; ອົງປະກອບ ແລະ ການສ້າງເອກະສານທາງການ, ການຄຸ້ມຄອງເອກະສານເຂົ້າ-ອອກ, ວຽກງານສໍາເນົາເອກະສານ, ການທໍາລາຍເອກະສານ, ອົງການຄຸ້ມຄອງ ແລະ ກວດກາວຽກງານເອກະສານທາງການ ແລະ ບົດບັນຍັດສຸດທ້າຍ, ພ້ອມທັງຮັບຟັງຄໍາແນະນໍາ ກ່ຽວກັບການຈັດຕັ້ງປະຕິບັດດໍາລັດ ວ່າດ້ວຍເອກະສານທາງການ. ນອກນີ້, ບັນດານັກສໍາມະນາການຍັງໄດ້ທົດລອງເຮັດຕົວຈິງ ສ້າງແບບຟອມເອກະສານທາງການດ້ວຍຕົນເອງໃຫ້ຖືກຕ້ອງ.