ນາໂຕເນລະເທດນັກການທູດຣັດເຊຍ 7 ຄົນ
ອົງການສົນທິສັນຍາອັດລັງຕິກເໜືອເນລະເທດເຈົ້າໜ້າທີ່ການທູດຂອງຣັດເຊຍ 7 ຄົນ ແລະ ບໍ່ຮັບຮອງນັກການທູດໃໝ່ອີກ 3 ຄົນ ຈາກກໍລະນີສາຍລັບຣັດເຊຍໃນອັງກິດໄດ້ຮັບສານພິດ, ສ່ວນລັດຖະບານມົດສະກູວິຈານສະຖານະການທີ່ເກີດຂຶ້ນຄືບົດທົດສອບ “ຄວາມເປັນເອກະລາດ” ຂອງແຕ່ລະປະເທດ.
VIDEO: NATO chief Jens Stoltenberg says the alliance is expelling seven Russian diplomats and denying accreditation to three more as part of international measures over the poisoning of a former spy in Britain pic.twitter.com/LVtcYShq1r
— AFP News Agency (@AFP) March 27, 2018
ສຳນັກຂ່າວຕ່າງປະເທດລາຍງານຈາກນະຄອນຫລວງບຣຸກແຊນ ປະເທດແບນຊິກ ໃນວັນທີ 28 ມີນາວ່າ: ທ່ານ ເຢນ ສໂຕລເທນເບິກ ເລຂາທິການອົງການສົນທິສັນຍາອັດລັງຕິກເໜືອ (ນາໂຕ) ກ່າວໃນວັນທີ 27 ມີນາ ເລື່ອງການເນລະເທດເຈົ້າໜ້າທີ່ການທູດຂອງຣັດເຊຍ 7 ຄົນອອກຈາກສຳນັກງານຄະນະຜູ້ແທນຖາວອນຣັດເຊຍປະຈຳນາໂຕ ແລະ ການປະຕິເສດຮັບສານຕາຕັ້ງຂອງເຈົ້າໜ້າທີ່ການທູດຊຸດໃໝ່ຈາກນະຄອນຫລວງມົດສະກູອີກ 3 ຄົນ “ເພື່ອສະແດງຄວາມເປັນນ້ຳໜຶ່ງໃຈດຽວ” ກັບພັນທະມິດ ຕໍ່ກໍລະນີທ່ານ ເຊີເກ ສກຣີພັລ ອະດີດເຈົ້າໜ້າທີ່ຂ່າວລັບທະຫານຂອງຣັດເຊຍ ແລະ ລູກສາວ ໄດ້ຮັບສານພິດຮ້າຍແຮງ ທີ່ເມືອງຊາລິສບິວຣີ ທາງຕອນໃຕ້ຂອງອັງກິດ ໃນວັນທີ 4 ມີນາ.
ການເຄື່ອນໄຫວດັ່ງກ່າວຂອງນາໂຕ ເກີດຂຶ້ນໃນເວລາດຽວກັບທີ່ 27 ປະເທດ ສ່ວນຫລາຍຢູ່ທະວີບເອີຣົບ ຮ່ວມກັນເນລະເທດເຈົ້າໜ້າທີ່ການທູດຂອງຣັດເຊຍແລ້ວ 144 ຄົນ ໃນຈຳນວນນີ້ເປັນຄຳສັ່ງຂອງອາເມລິກາຫລາຍທີ່ສຸດ 60 ຄົນ, ຖັດມາແມ່ນສະຫະລາຊະອານາຈັກ 23 ຄົນ ແລະ ອູແກຣນ 13 ຄົນ.
