ວິທີແກ້ອາການເມົາຄ້າງກ່ອນ ແລະ ຫລັງງານລ້ຽງ

ອາການມຶນງົງສັບສົນ, ເຈັບຫົວເກືອບຈະລະເບີດ, ວິນຫົວປວດຮາກ, ລຸກບໍ່ຂຶ້ນ, ພື້ນເຮືອນໝູນປິ່ນ ຫລັງສະຫລອງເທດສະ ການປີໃໝ່ເກີດຈາກອາການເມົາຄ້າງຈາກການດື່ມອານກໍຮໍໃນປະລິມານເກີນທີ່ຮ່າງກາຍຮັບໄດ້ ໂດຍສະເພາະແມ່ຍິງເວລາດື່ມ ເຄື່ອງດື່ມທີ່ມີອານກໍຮໍຈະເມົາງ່າຍກ່ວາຜູ້ຊາຍ ເນື່ອງຈາກແມ່ຍິງມີຮູບຮ່າງນ້ອຍກ່ວາ ແລະ ມີໄຂມັນໃນຮ່າງກາຍຫລາຍ, ແຕ່ມີນ້ຳໃນຮ່າງກາຍໜ້ອຍກ່ວາຜູ້ຊາຍ ເຊິ່ງອານກໍຮໍຈະລະລາຍໃນນ້ຳໄດ້ດີ, ແຕ່ບໍ່ລະລາຍໃນໄຂມັນ.

ອາການເມົາຄ້າງເປັນອາການທີ່ຄ້າຍຄືກັບຫາກໍລຸກໄຂ້ ເພາະຮ່າງກາຍຂາດນ້ຳ ເຮັດໃຫ້ແຊນສະໝອງຫ່ຽວລົງ ອານກໍຮໍເຮັດ ໃຫ້ເກີດການໄລ່ສິ່ງເສດເຫລືອໃນຮ່າງກາຍໃນຮູບແບບນ້ຳຍ່ຽວ ທັງຍັງໄລ່ສານອາຫານສຳຄັນຂອງຮ່າງກາຍອອກມານຳ ທັງນີ້ແມັກນີຊຽມ, ໂປຕັສຊຽມ ແລະ ວິຕາມິນເບ 1, ເບ 6, ເກີດການສະສົມຂອງສານແອນດີໄຮ ເຊິ່ງທຳລາຍສະໝອງ ແລະ ລະບົບປະສາດປະລິມານນ້ຳຕານໃນເລືອດຕໍ່າ ລົບກວນການເຮັດວຽກຂອງຮໍໂມນເມລາໂທນິນ ເຮັດໃຫ້ເຈັບຫົວ, ວິນຫົວ, ປວດຮາກ, ມຶນງົງ, ສັບສົນ, ກ້າມຊີ້ນເກັງ ຫລື ອາດເປັນຂາປັ້ນຮ່ວມນຳ ເປັນຕົ້ນ ຍິິ່ງໃນຄົນທີ່ເປັນພະຍາດຫົວໃຈຈະເພີ່ມອັດຕາສ່ຽງໃນການເສຍຊີວິດງ່າຍກ່ວາຄົນປົກກະຕິ.

ກ່ອນໄປງານລ້ຽງກັບໝູ່ ຈຶ່ງຄວນນອນພັກຜ່ອນໃຫ້ພຽງພໍ ບໍ່ຄວນໄປໃນຂະນະທີ່ກຳລັງຫິວເຂົ້າ ຫລື ຫາກໍອອກກຳລັງກາຍຢ່າງຫັກໂຫມ ເພາະຈະເຮັດໃຫ້ຍິ່ງດື່ມຫລາຍຂຶ້ນ, ພະຍາຍາມກິນຜັກທີ່ມີກົດໂຟລິກ ແລະ ໄຟເບີຫລາຍໆເພື່ອຟື້ນຟູແຊນທີ່ຈະຖືກທຳລາຍໂດຍອານກໍຮໍ ເຊັ່ນ : ຜັກກະລໍ່າ, ຜັກກາດດອກ ຫລື ກິນອາຫານປະເພດຄາໂບໄຮເດຣດ, ໂປຣຕິນທີ່ມີໄຂມັນດີໆຮອງທ້ອງເພື່ອຊ່ວຍຂັດຂວາງການດູດຊຶມອານກໍຮໍ.

ຂະນະທີ່ດື່ມຄວນໄລ່ອານກໍຮໍອອກທາງນ້ຳຍ່ຽວໂດຍການດື່ມນ້ຳຫລາຍໆ ລະວັງບໍ່ໃຫ້ທ້ອງວ່າງເດັດຂາດ.

ຄວນກິນວິຕາມິນເບ 6 ຕື່ມ ລະຫ່ວາງດື່ມຈະຊ່ວຍຫລຸດອາການເມົາຄ້າງໄດ້. ສິ່ງສຳຄັນທີ່ສຸດແມ່ນການໝັ່ນເຕືອນໂຕເອງບໍ່ໃຫ້ດື່ມຫລາຍເກີນໄປ. ຫລັງງານລ້ຽງ ກ່ອນຈະເຂົ້ານອນຄວນດື່ມນ້ຳ, ນ້ຳໝາກກ້ຽງ ຫລື ນ້ຳໝາກນາວຫລາຍໆ ເພື່ອໄລ່ອານກໍຮໍ ຫລື ດື່ມນ້ຳວຸ້ນຈາກໃບຫວ້ານຫາງແຂ້ ເພາະຊ່ວຍລະລາຍພິດໃນຕັບ.

ເຂົ້າເຊົ້າຄວນເລືອກອາຫານປະເພດໂປຣຕິນ ແລະ ດື່ມນ້ຳຫວານ, ນ້ຳເຜິ້ງປະສົມນ້ຳໝາກນາວ ແລະ ຄວນດື່ມເຄື່ອງດື່ມທີ່ມີ ວິຕາມິນເຊຫລາຍໆ, ດື່ມອຸ່ນໆປະສົມນ້ຳໝາກນາວ, ບໍ່ຄວນດື່ມກາເຟ ຫລື ໃຊ້ສູດນ້ຳໃບຢານາງປະມານ 4 – 5 ໃບມາຕຳ ຫລື ບົດເອົາແຕ່ນ້ຳມາຈະຊ່ວຍຖອນພິດ ແລະ ຫລຸດອາການເມົາຄ້າງໄດ້ດີ.

ການເຊັດໂຕຊ່ວຍຫລຸດອາການເຈັບຫົວ, ເຊັດໜ້າໂດຍນ້ຳເຢັນ ແລະ ຄວນໃຊ້ຜ້າປະຄົບບໍລິເວນໜ້າ ແລະ ຫົວ ຫາກອາການ ຍັງຮຸນແຮງ, ຮາກຫລາຍ, ໂຕເຢັນ, ຄວາມດັນເລືອດຕໍ່າ, ເຈັບທ້ອງຖ່າຍບໍ່ເຊົາ, ໃຈສັ່ນ, ອ່ອນເພຍດົນເກີນ 1 ມື້ ຄວນຟ້າວໄປ ໂຮງໝໍ ເພາະອາດຂາດນ້ຳໄດ້.