ພ້ອມກັນເປັນເຈົ້າພາບທີ່ດີຕ້ອນຮັບວັນໄມ້ໂລກ
ໃນໂອກາດໃຫ້ສໍາພາດສື່ມວນຊົນຂອງທ່ານລັດຖະມົນຕີກະຊວງກະສິກໍາ ແລະ ປ່າໄມ້ ລຽນ ທິແກ້ວ ໃນການເປັນເຈົ້າຮ່ວມຈັດງານວັນໄມ້ໂລກປະຈໍາປີ 2018 ຂຶ້ນໃນທ້າຍເດືອນມີນານີ້ທີ່ນະຄອນຫລວງວຽງຈັນ, ໂດຍທ່ານໄດ້ຮຽກຮ້ອງໃຫ້ພ້ອມກັນເປັນເຈົ້າພາບທີ່ດີເພື່ອໃຫ້ງານດັ່ງກ່າວມີບັນຍາກາດຟົດຟື້ນ, ມີຄວາມເປັນລະບຽບຮຽບຮ້ອຍ ແລະ ສະແດງໃຫ້ຊາວໂລກໄດ້ຮັບຮູ້ເຖິງຄວາມສໍາຄັນຂອງໄມ້ ແລະ ຄວາມອຸດົມສົມບູນຂອງປ່າໄມ້ຂອງລາວທີ່ຕິດພັນກັບຮີດຄອງປະເພນີອັນດີງາມ, ຊີວິດການເປັນຢູ່ຂອງປະຊາຊົນບັນດາເຜົ່າ ແລະ ອັນສໍາຄັນຖືເອົາໂອກາດນີ້ພ້ອມກັນໂຄສະນາສົ່ງເສີມປີທ່ອງທ່ຽວລາວໃຫ້ເປັນຂະບວນຟົດຟື້ນ.
ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ກ່າວວ່າ: ວັນໄມ້ໂລກ (Wold Wood Day) ແມ່ນກິດຈະກໍາໜຶ່ງເພື່ອສະເຫລີມສະຫລອງວັນປ່າໄມ້ສາກົນ 21 ມີນາ (International Day of forests) ສະແດງໃຫ້ເຫັນຄວາມສໍາຄັນຂອງໄມ້ ຊຶ່ງແມ່ນຊີວະວັດຖຸທີ່ສາມາດທົດແທນຄືນ ຫລື ປົ່ງຄືນໄດ້ໂດຍທໍາມະຊາດທີ່ເປັນມິດກັບສິ່ງແວດລ້ອມ, ທັງເປັນການປູກຈິດສໍານຶກໃຫ້ສັງຄົມຮູ້ຈັກບົດບາດຂອງໄມ້ໃນທົ່ວໂລກ ແລະ ໃຫ້ມີຄວາມຍືນຍົງໂດຍຜ່ານການຄຸ້ມຄອງ, ປົກປັກຮັກສາ ແລະ ອານຸລັກຊີວະນາໆພັນຂອງປ່າໄມ້.
ທ່ານລັດຖະມົນຕີກະຊວງດັ່ງກ່າວໃຫ້ຮູ້ວ່າ: ງານວັນໄມ້ໂລກໄດ້ຈັດຂຶ້ນຄັ້ງທໍາອິດຢູ່ປະເທດຕັງຊະເນຍໃນປີ 2013, ຢູ່ ສປ ຈີນ ປີ 2014, ຢູ່ຕວກກີ ປີ 2015, ຢູ່ເນປານ ປີ 2016, ຢູ່ສະຫະລັດອາເມລິກາ ໃນປີ 2017 ແລະ ປີ 2018 ແມ່ນ ສປປ ລາວ ໄດ້ຈັດຮ່ວມກັນ 3 ປະເທດຕິດຕໍ່ກັນຄື: ກໍາປູເຈຍ, ມຽນມາ ແລະ ແຂວງກວາງຊີ ສປ ຈີນ ຕາມລໍາດັບ. ງານດັ່ງກ່າວນີ້ແມ່ນໂອກາດສໍາຄັນທີ່ພວກເຮົາຈະໄດ້ຢັ້ງຢຶນໃຫ້ສາກົນເຂົ້າໃຈໃນແນວທາງນະໂຍບາຍຂອງພັກ ແລະ ລັດຖະບານຕໍ່ການຄຸ້ມຄອງ, ປົກປັກຮັກສາ ແລະ ນໍາໃຊ້ປ່າໄມ້ແບບຍືນຍົງ, ດັ່ງອະດີດປະທານ ໄກສອນ ພົມວິຫານ ໄດ້ເວົ້າວ່າ: ປ່າໄມ້ແມ່ນ ຄໍາຂຽວ ທີ່ມີບົດບາດສໍາຄັນໃນການພັດທະນາເສດຖະກິດ-ສັງຄົມ, ລຶບລ້າງຄວາມທຸກຍາກ ແລະ ຄໍ້າປະກັນຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ.
