ນາຍົກຊີ້ນໍາຫລາຍບັນຫາໃຫ້ສະມາຊິກລັດຖະບານ ແລະ ທ້ອງຖິ່ນເອົາໃຈໃສ່

ກອງປະຊຸມເປີດກວ້າງລະຫວ່າງຄະນະລັດຖະບານ, ເຈົ້າຄອງນະຄອນ ແລະ ບັນດາການນໍາທ້ອງຖິ່ນທົ່ວປະເທດຄັ້ງ 1 ປີ 2018 ໄດ້ອັດລົງໃນວັນທີ 23 ມີນານີ້, ພາຍຫລັງດໍາເນີນມາເປັນເວລາ 2 ວັນຢູ່ເມືອງວຽງໄຊ ແຂວງຫົວພັນ, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ ໂດຍ ໄດ້ຊີ້ນໍາໃຫ້ສະມາຊິກລັດຖະບານ ແລະ ທ້ອງຖິ່ນເອົາໃຈໃສ່ຫລາຍບັນຫາຄື: ສືບຕໍ່ຮັກສາສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມໃຫ້ໜັກແໜ້ນ ເພື່ອສ້າງສະພາບແວດລ້ອມອໍານວຍໃຫ້ແກ່ການພັດທະນາ ໂດຍສະເພາະເອົາໃຈໃສ່ແກ້ໄຂປາກົດການຫຍໍ້ທໍ້ສັງຄົມຕ່າງໆເຊັ່ນ: ບັນຫາຢາເສບຕິດ, ການຊິງຊັບ, ຂີ້ລັກງັດແງະ, ອັກຄີໄພ ແລະ ບັນຫາອື່ນໆໃຫ້ຫລຸດລົງ. ທຸກຂະແໜງການ ແລະ ທ້ອງຖິ່ນຕ້ອງສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດໃຫ້ບັນລຸຄາດໝາຍວາງໄວ້ ເນື່ອງຈາກການຈັດຕັ້ງປະຕິບັດແຜນງວດທີ 1 ເຫັນວ່າຫລຸດຄາດໝາຍຫລາຍ. ສະນັ້ນ ໃນງວດທີ 2, 3 ແລະ 4 ຕ້ອງສູ້ຊົນໃຫ້ລື່ນຄາດໝາຍວາງໄວ້. ສືບຕໍ່ເພີ່ມທະວີຄວາມເຂັ້ມງວດໃນການຈັດຕັ້ງປະຕິບັດຄຳສັ່ງເລກທີ 15/ນຍ ໂດຍເອົາໃຈໃສ່ການປົກປັກຮັກສາປ່າໄມ້້້ຕາມທິດຍືນຍົງ ເປັນຕົ້ນຫ້າມຂົນສົ່ງໄມ້ທ່ອນອອກປະເທດເດັດຂາດ, ເພີ່ມທະວີມາດຕະການຕິດຕາມກວດກາ ແລະ ລົງໂທດຜູ້ລະເມີດຄຳສັ່ງດັ່ງກ່າວຢ່າງເຂັ້ມງວດ, ໄປຄຽງຄູ່ການປູກໄມ້ໃຫ້ເປັນປ່າ ແລະ ປູກຈິດສຳນຶກໃຫ້ສັງຄົມຮູ້ຮັກທຳມະຊາດໃຫ້ຫລາຍຂຶ້ນ. ໃຫ້ບັນດາຂະແໜງການ ແລະ ທ້ອງຖິ່ນກະກຽມສະຫລຸບການເຄື່ອນໄຫວວຽກງານຂອງຕົນຕິດພັນກັບການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານສູນກາງພັກເທື່ອທີ 5 ທີ່ຈະຈັດຂຶ້ນໃນຕົ້ນເດືອນພຶດສະພາທີ່ຈະເຖິງນີ້, ພ້ອມທັງກະກຽມບົດລາຍງານຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 8 ໂດຍສະເພາະສະຫລຸບການເຄື່ອນໄຫວວຽກງານຂອງລັດຖະບານໃນໄລຍະ 6 ເດືອນຜ່ານມາ ແລະ ວຽກງານຈຸດສຸມຮອດທ້າຍປີ 2018, ສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມສົກປີ 2017, ການຈັດຕັ້ງປະຕິບັດແຜນງວດທີ 1 ແລະ ທິດທາງວຽກງານຈຸດສຸມຮອດທ້າຍປີ 2018. ລາຍງານການນຳໃຊ້ເງິນເກີນແຜນ, ຍອດເຫລືອງົບປະມານໃນການບັນຊີປະຈຳປີ 2015-2016 ແລະ 3 ເດືອນຂ້າມຜ່ານທ້າຍປີ 2016, ລາຍຮັບວິຊາການປີ 2017, ສະຫລຸບການຈັດຕັ້ງປະຕິບັດແຜນທ້າຍປີ 2018. ລາຍງານການນຳໃຊ້ເງິນຕາແຫ່ງຊາດສົກປີ 2017, ການຈັດຕັ້ງປະຕິບັດແຜນງວດ 1 ແລະ ທິດທາງວຽກງານຈຸດສຸມຮອດທ້າຍປີ 2018. ລາຍງານແຜນແມ່ບົດຈັດສັນທີ່ດິນແຫ່ງຊາດ, ສະພາບການຈັດສັນທີ່ດິນ ແລະ ການອອກໃບຕາດິນ. ລາຍງານກ່ຽວກັບການຄຸ້ມຄອງລາຄາສິນຄ້າ, ຄ່າບໍລິການ ແລະ ມາດຕະການແກ້ໄຂ ເພື່ອຫລຸດຜ່ອນຜົນກະທົບຕໍ່ການຜະລິດ ແລະ ການດຳລົງຊີວິດຂອງປະຊາຊົນ ແລະ ກະກຽມສະຫລຸບການຈັດຕັ້ງປະຕິບັດຄຳສັ່ງເລກທີ 15/ນຍ, ການປັບປຸງລັດວິສາຫະກິດ ແລະ ການສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງໃນໄລຍະ 6 ເດືອນຜ່ານມາ ແລະ ທິດທາງວຽກງານຈຸດສຸມຮອດທ້າຍປີ 2018. ພ້ອມນີ້ ລັດຖະບານຈະໄດ້ສະເໜີຮ່າງກົດໝາຍຈຳນວນ 11 ສະບັບໃຫ້ສະພາແຫ່ງຊາດພິຈາລະນາຮັບຮອງ. ໃຫ້ບັນດານະຄອນຫລວງ ແລະ ທ້ອງຖິ່ນ ປະສານສົມທົບ ກັບບັນດາຂະແໜງການຂອງສູນກາງ ເພື່ອຈັດຕັ້ງປະຕິບັດມະຕິ, ດຳລັດ ແລະ ນິຕິກຳທີ່ກ່ຽວກັບວຽກງານ 3 ສ້າງທີ່ພັກ ແລະ ລັດຖະບານໄດ້ວາງອອກ ແລະ ໃຫ້ຖືເອົາການປະຕິບັດວຽກງານນີ້ເປັນພື້ນຖານໃນການສ້າງສັງຄົມນິຍົມຢູ່ຮາກຖານ. ເອົາໃຈໃສ່ເສີມຂະຫຍາຍໝາກຜົນທີ່ເຮັດໄດ້ ແລະ ແກ້ໄຂບັນດາຂໍ້ຄົງຄ້າງທີ່ພວກເຮົາຖອດຖອນໄດ້ໃນໄລຍະຜ່ານມາ, ແຂວງຕ້ອງລົງໃກ້ຊິດຕິດແທດກັບເມືອງ ຊຶ່ງເປັນຫົວໜ່ວຍເຂັ້ມແຂງຮອບດ້ານ ແລະ ບ້ານຊຶ່ງເປັນຫົວ ໜ່ວຍພັດທະນາ ເພື່ອຊີ້ນຳ-ນໍາພາຢ່າງໃກ້ຊິດ ແລະ ຮັບຜິດຊອບຕໍ່ຜົນສຳເລັດ ແລະ ຄວາມລົ້ມເຫລວໃນການຈັດຕັ້ງປະຕິບັດວຽກງານນັ້ນ, ຕ້ອງໄດ້ລົງໄປນຳພາ-ຊີ້ນຳຂັ້ນເມືອງ ແລະ ບ້ານ ເພື່ອໃຫ້ເຂົ້າໃຈຖືກຕ້ອງ, ປະຕິບັດຖືກທິດ, ເຮັດຢ່າງມີໝາກມີຜົນ, ແຂວງຕ້ອງກຳແໜ້ນທ່າແຮງ ແລະ ຈຸດພິເສດຂອງແຕ່ລະທ້ອງຖິ່ນ ເພື່ອສາມາດເຂົ້າເຖິງຄວາມຮູ້, ວິທະຍາສາດ-ວິທະຍາການ, ແຫລ່ງທຶນ, ດຶງດູດການລົງທຶນ ເພື່ອການພັດທະນາ, ພ້ອມທັງຈັດສັນທີ່ດິນ ສຳລັບເຂດສະຫງວນ, ເຂດຕັ້ງຖິ່ນຖານ ແລະ ທຳການຜະລິດ, ເຂດຈະພັດທະນາ ແລະ ດຶງດູດການລົງທຶນ ແລະ ຈັດຕັ້ງສະຫະກອນເພື່ອພັດທະນາກຸ່ມຜະລິດ ແລະ ໃຫ້ນະຄອນຫລວງ ແລະ ທ້ອງຖິ່ນນຳເອົາຈິດໃຈຊີ້ນຳກອງປະຊຸມລັດຖະບານເປີດກວ້າງຄັ້ງນີ້ໄປເຜີຍແຜ່ ແລະ ຜັນຂະຫຍາຍເຂົ້າໃນການຊີ້ນຳ-ນໍາພາວຽກງານຕົວຈິງໃຫ້ມີປະສິດທິຜົນ.