ກິລາບານເຕະມິດຕະພາບ ລາວ-ບັງກະລາເທດ ຈະມີຂຶ້ນໃນວັນທີ 27 ມີນານີ້ ທີ່ວຽງຈັນ
ໃນວັນທີ 26 ມີນາ, ສະຫະພັນບານເຕະແຫ່ງຊາດລາວ ໄດ້ຖະແຫຼງໃຫ້ຮູ້ວ່າ: ການແຂ່ງຂັນບານເຕະມິດຕະພາບ ລະຫວ່າງ ທີມຊາດລາວ ແລະ ບັງກະລາເທດ ຈະມີຂຶ້ນໃນເວລາ 18 ໂມງ ຂອງວັນທີ 27 ມີນານີ້ ທີ່ສະໜາມກິລາແຫ່ງຊາດ (ຫຼັກ 16) ນະຄອນຫຼວງວຽງຈັນ ເຂົ້າຊົມໂດຍບໍ່ໄດ້ເສຍຄ່າ.
ທ່ານ ໄມວອງ ຄູຝຶກນັກກິລາທີມຊາດລາວ ກ່າວວ່າ: ພາຍຫຼັງແຂ່ງຂັນນັດທີໜຶ່ງໃນອາທິດຜ່ານມາ, ທີມຊາດລາວເສຍໃຫ້ທີມຊາດກຳປູເຈຍ 0-1 ເຮັດໃຫ້ທີມຊາດລາວຕ້ອງໄດ້ຝືກຊ້ອມ ແລະ ປັງປຸງຄວາມເຂັ້ມແຂງຂຶ້ນ ເພື່ອພົບກັບທີມຊາດບັງກະລາເທດ ໄດ້ມີຄວາມພ້ອມຫຼາຍດ້ານ ບໍ່ວ່າຈະເປັນການວາງເກມ, ເຕັກນິກໃນການຫຼິ້ນບານ ແລະ ອື່ນໆ ຊຶ່ງຕັ້ງຄວາມຫວັງວ່າຈະເອົາຊະນະໄດ້.
ທ່ານ ໂທປຸ ບາແມນ (Topu barman) ຄູຝຶກທີມຊາດບັງກະລາເທດ ກໍໄດ້ກ່າວວ່າ: ກ່ອນຈະມາແຂ່ງຂັນກັບທີມຊາດລາວ, ທີມຂອງຕົນກໍໄດ້ມີການຝຶກຊ້ອມໜັກພໍສົມຄວນ ແລະ ພ້ອມທັງໄດ້ແຂ່ງຂັນມິດຕະພາບ 2 ນັດທີ່ສະໂມສອນໄທລີກ ຊຶ່ງເສຍໃຫ້ທີມຊົນບູລີ ເອັຟຊີ 1-0 ແລະ ຊະນະທີມບາງກອກກາສ ເອັຟຊີ 4-3. ສຳລັບໃນນັດຕໍ່ໄປນີ້ເປັນນັດທີ 3 ທີ່ຈະມາແຂ່ງຂັນກັບທີມຊາດລາວ ກໍຈະສຸມທຸກຮູບແບບເພື່ອເຮັດໃຫ້ການຫຼຼິ້ນຂອງລູກທີມໄດ້ດີທີ່ສຸດ.
