ລາວຈະເລີ່ມປະຕິບັດກົນໄກຂຶ້ນທະບຽນນັກສຶກສາຕ້ອງການວຽກເຮັດງານທໍາ

ກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມໄດ້ເຊັນບົດບັນທຶກຮ່ວມມື ກັບກົມກິດຈະການນັກສຶກສາ, ກະຊວງສຶກສາທິການ ແລະ ກິລາ ເພື່ອປະຕິບັດກົນໄກການສະໜອງຂໍ້ມູນນັກສຶກສາທີ່ຂຶ້ນທະບຽນເພື່ຶອຊອກຫາວຽກເຮັດງານທໍາໃນລະບົບຂໍ້ມູນຂ່າວສານຕະຫລາດແຮງງານມີຂຶ້ນໃນວັນທີ 22 ມີນານີ້, ທີ່ນະຄອນຫລວງວຽງຈັນ, ລະ ຫວ່າງ ທ່ານ ໄທ ແສງອາລຸນ ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ ແລະ ທ່ານ ສົມນຶກ ກຸສົນສະຫວັດ ຮອງຫົວໜ້າກົມກິດຈະການນັກສຶກສາ, ຊຶ່ງການຮ່ວມມືດັ່ງກ່າວຈະນໍາຜົນປະໂຫຍດອັນໃຫຍ່ຫລວງໃຫ້ແກ່ຜູ່ທີ່ກຳລັງຊອກຫາວຽກເຮັດງານທໍາ, ໂດຍສະເພາະແມ່ນນັກຮຽນ, ນັກສຶກສາ ທີ່ກໍາລັງຮຽນຈົບວິຊາສະເພາະ ຈາກສະຖາບັນຕ່າງໆໃນທົ່ວປະເທດ, ຈາກຕ່າງປະເທດຈະໄດ້ນຳໃຊ້ຂໍ້ມູນນີ້ເພື່ອຊອກຫາວຽກເຮັດງານທຳທີ່ເໝາະສົມກັບວິຊາສະເພາະຂອງຕົນທີ່ໄດ້ຮຽນມາ, ເຊິ່ງປັດຈຸບັນຂໍ້ມູນຂ່າວສານດັ່ງກ່າວ ຍັງມີລັກສະນະກະແຈກກະຈາຍຢູ່ກັບຫລາຍພາກສ່ວນ, ການສະໜອງຂໍ້ມູນຍັງບໍ່ເປັນປົກກະຕິ ແລະ ຍັງບໍ່ມີລະບົບຄົບຖ້ວນ.

ດັ່ງນັ້ນ, ກົມພັດທະນາສີມືແຮງງານ ແລະ ຈັດຫາງານ ຈຶ່ງໄດ້ມີຄວາມພະຍາຍາມຮ່ວມກັບພາກສ່ວນທີ່ກ່ຽວຂ້ອງ, ໂດຍສະເພາະແມ່ນ ກົມກິດຈະການນັກສຶກສາ, ກະຊວງສຶກສາທິການ ແລະ ກິລາ ເພື່ອແນໃສ່ສ້າງລະບົບຂໍ້ມູນຂ່າວສານ ຕະຫລາດແຮງງານທີ່ລວມສູນຢ່າງເປັນລະບົບ, ມີການຄຸ້ມຄອງເຄືອຂ່າຍຢ່າງຄົບຊຸດ, ສາມາດສະໜອງຂໍ້ມູນໃຫ້ແກ່ການໄລ່ລຽງມະຫາພາກດ້ານການດຸ່ນດ່ຽງແຮງງານ, ນຳໃຊ້ເຂົ້າໃນການພັດທະນາເສດຖະກິດ ແລະ ຮັບໃຊ້ສັງຄົມໄດ້ຢ່າງກວ້າງຂວາງ. ພ້ອມດຽວກັນນັ້ນ, ກໍເປັນການຜັນຂະຫຍາຍຜົນຂອງກອງປະຊຸມໂຕະມົນ ປະຈຳປີ 2017 ພາຍໃຕ້ຫົວຂໍ້ “ເພື່ອທະວີການເປັນຄູ່ຮ່ວມໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ເພື່ອບັນລຸເປົ້າໝາຍການຫລຸດພົ້ນ ອອກຈາກສະຖານະພາບດ້ອຍພັດທະນາ ແລະ ເປົ້າ ໝາຍການພັດທະນາແບບຍືນຍົງ”, ໂດຍແນໃສ່ສືບຕໍ່ພັດທະນາລະບົບຂໍ້ມູນຂ່າວສານຕະຫລາດ ແຮງງານແຫ່ງຊາດ ໃຫ້ມີຄວາມຫລາກຫລາຍ ແລະ ຄົບຖ້ວນ ເພື່ອໃຫ້ປະຊາຊົນ ແລະ ຜູ້ປະກອບການ ໄດ້ຮັບຂໍ້ມູນຂ່າວສານຕະຫລາດແຮງງານ ທີ່ມີຄຸນນະພາບສູງ, ທັນຕາມເວລາ, ຖືກຕ້ອງ ແລະ ສອດຄ່ອງກັບຄວາມຕ້ອງຂອງຕະຫລາດແຮງງານ.

ປັດຈຸບັນ, ການສ້າງລະບົບຂໍ້ມູນຂ່າວສານແຮງງານແມ່ນສໍາເລັດໂດຍພື້ນຖານ, ໂດຍສະເພາະ ແມ່ນໄດ້ສ້າງເວັບໄຊ ລະບົບຂໍ້ມູນຂ່າວສານຕະຫລາດແຮງງານ www.lmi.molsw.gov.la ເຊິ່ງພາຍ ຫລັງທີ່ໄດ້ລົງນາມບົດບັນທຶກການຮ່ວມມືແລ້ວ ຈະເລີ່ມໃຫ້ບໍລິການທົດລອງໃນເດຶອນພຶດສະພາ 2018 ເປັນຕົ້ນໄປ, ໂດຍເລີ່ມຕົ້ນຈາກການປະຕິບັດກົນໄກການສະໜອງຂໍ້ມູນ ຜູ້ຂໍຮັບເງິນອຸດໜູນວ່າງງານຂອງຜູ້ປະກັນຕົນ, ຊຶ່ງແມ່ນຫ້ອງການກອງທຶນປະກັນສັງຄົມ, ສູນບໍລິການຈັດຫາງານ, ພະແນກແຮງງານ ແລະ ສະຫວັດດີການສັງຄົມແຂວງ, ສູນບໍລິການປະກັນສັງຄົມແຂວງ ຮ່ວມກັນຈັດຕັ້ງປະຕິບັດ.

ສ່ວນການຂຶ້ນທະບຽນເກັບກຳຕຳແໜ່ງງານວ່າງ ສຳລັບນັກຮຽນ, ນັກສຶກສາ ທີ່ຮຽນຈົບໃໝ່ທີ່ມີຄວາມພ້ອມເຂົ້າສູ່ຕະຫລາດແຮງງານໃນຄັ້ງນີ້, ນອກຈາກຈະຂຶ້ນທະບຽນນັກສຶກສາທີ່ຮຽນຈົບຈາກວິທະ ຍາໄລ, ມະຫາວິທະຍາໄລ ແລະ ຜູ້ທີ່ຈົບຈາກຕ່າງປະເທດແລ້ວ ຍັງຈະໄດ້ມີການຂະຫຍາຍຕາໜ່າງຂໍ້ມູນຂ່າວສານຕະຫລາດແຮງງານ 18 ແຂວງ ໂດຍມີໜ້າທີ່ເກັບກຳຂໍ້ມູນຕຳແໜ່ງງານວ່າງ ແລະ ຂຶ້ນທະບຽນຜູ້ຈະຈົບການສຶກສາໃນແຂວງຕື່ມອີກ.