Yes Pay ຜະລິດຕະພັນໃໝ່ຂອງ ເຈດີບີ
ໃນວັນທີ 19 ມີນານີ້, ທີ່ສໍານັກງານໃຫຍ່ທະນາຄານຮ່ວມພັດທະນາ (JDB) ໄດ້ມີພິທີເປີດໂຕຜະລິດຕະພັນໃໝ່ ເຢສ ເປ (Yes Pay) ເພື່ອອໍານວຍຄວາມສະດວກໃຫ້ແກ່ການຊຳລະຄ່າສິນຄ້າຕ່າງໆຜ່ານລະບົບແອປພລີເຄຊັ້ນ ຄິວອາລໂຄດ (QR Code) ຂອງ JDB yes ໃນມືຖືສະມາດໂຟນໂດຍບໍ່ພົກພາເງິນສົດ.
ທ່ານ ບຸນສະຫວ່າງ ພິລາໄຊພິທັກ ຜູ້ອຳນວຍການໃຫຍ່ ກ່າວວ່າ: ນີ້ເປັນຜະລິດໃໝ່ທີ່ເປັນໂປແກມ ສໍາລັບໃຊ້ຈ່າຍຄ່າສິນຄ້າຕ່າງໆ, ພຽງແຕ່ດາວໂຫລດໂປແກມດັ່ງກ່າວລົງໃນມືຖື, ຈາກນັ້ນສະແກນ QR Code ກໍສາມາດຈ່າຍຄ່າສິນຄ້າໄດ້ຢ່າງງ່າຍດາຍ, ໂດຍຈະຕັດເງິນໃນບັນຊີຂອງຜູ້ຊື້ໄປເຂົ້າບັນຊີຂອງຜູ້ຂາຍ, ຖ້າຍອດຊຳລະບໍ່ເກີນ 5 ລ້ານກີບພາຍໃນ 1 ເດືອນແມ່ນບໍ່ມີຄ່າທຳນຽມ,ຖ້າກາຍ 5 ລ້ານກີບ ກໍຈະເກັບຄ່າທຳນຽມຄັ້ງລະ 2 ພັນກີບ.
ຜະລິດຕະພັນໃໝ່ນີ້, ຈະອຳນວຍຄວາມສະດວກໃນການຊຳລະສະສາງໄດ້ຕະຫລອດ 24 ຊົ່ວໂມງ, ໂດຍບໍ່ຈຳເປັນຕ້ອງເຂົ້າໄປທະນາຄານ, ບໍ່ຈຳເປັນຕ້ອງພົກພາເງິນສົດ ແລະ ປຽບເໝືອນທະນາຄານຢູ່ໃນມືຖືຂອງທ່ານ ແລະການຊຳລະໄດ້ໃນຮູບແບບເງິນກີບ, ເງິນບາດ, ເງິນໂດລາ ແຕ່ຕ້ອງເປັນບັນຊີສະກຸນເງິນດຽວກັນ, ປັດຈຸບັນໜ່ວຍງານ Yes Pay ກຳລັງລົງຕິດຕັ້ງ QR Code ຕາມຮ້ານຄ້າ, ຮ້ານຊັບພະສິນຄ້າ, ເອັມພອຍມາດ, ຮ້ານກາເຟອາເມຊອນຕ່າງໆຕາມໂຮງແຮມ ແລະ ຫົວໜ່ວຍບໍລິການອື່ນໆ ເພື່ອໃຫ້ລູກຄ້າເຂົ້າເຖິງ ແລະ ສະດວກສະບາຍໃນການຊຳລະສະສາງ, ຊຶ່ງຄາດວ່າຈະກະຈາຍໄປທົ່ວປະເທດພາຍໃນປີນີ້ສຳເລັດ.
