ໂຄງການຄຸ້ມຄອງປ່າໄມ້ແບບຍືນນານມອບທຶນພັດທະນາໃຫ້ 12 ບ້ານເມືອງຊະນະຄາມ
ພິທີມອບທຶນພັດທະນາຊີວິດການເປັນຢູ່ຂອງປະຊາຊົນຈຳນວນ 12 ບ້ານທີ່ນອນຢູ່ໃນເປົ້າໝາຍຂອງໂຄງການຄຸ້ມຄອງປ່າໄມ້ແບບຍືນນານເມືອງຊະນະຄາມແຂວງວຽງຈັນໄດ້ມີຂຶ້ນໃນທ້າຍອາທິດຜ່ານມາທີ່ສະໂມສອນຂອງເມືອງຊະນະຄາມ, ໂດຍການເຂົ້າຮ່ວມຂອງທ່ານ ສະໝານ ວິເສດຍະພົງສ໌ ເຈົ້າເມືອງຊະນະຄາມ ແລະ ທ່ານ Esa Puustjarvi ຫົວໜ້າຊ່ຽວຊານໂຄງການຄຸ້ມຄອງປ່າໄມ້ແບບຍືນນານ, ພ້ອມດ້ວຍອຳນາດການປົກຄອງບ້ານດັ່ງກ່າວເຂົ້າຮ່ວມນໍາດ້ວຍ.
ທ່ານຫົວຫນ້າຫ້ອງການກະສິກຳ ແລະ ປ່າໄມ້ເມືອງຊະນະຄາມ ໃຫ້ຮູ້ວ່າ: ທຶນດັ່ງກ່າວແມ່ນໄດ້ຮັບການຊ່ວຍເຫລືອຈາກທະນາຄານໂລກ, ລັດຖະບານປະເທດແຟງລັງສົມທົບກັບທຶນພາຍໃນຄື: ກະຊວງກະສິກໍາ ແລະ ປ່າໄມ້ ລວມມີ 383 ລ້ານກວ່າກີບ, ໂດຍຈະມອບໃຫ້ບ້ານລະ 31,94 ລ້ານກີບ, ເພື່ອປະຕິບັດແຜນນະໂຍບາຍ, ລະບຽບການ ແລະ ໜ້າວຽກຕ່າງໆໃນການປັບປຸງລະບົບການຄຸ້ມຄອງປ່າໄມ້ແບບຍືນນານ, ເພື່ອສ້າງໂອກາດ ແລະ ເງື່ອນໄຂໃຫ້ປະຊາຊົນໄດ້ມີສ່ວນຮ່ວມເຂົ້າໃນການຄຸ້ມຄອງຮັກສາປ່າໄມ້ ແລະ ຊັບພະຍາກອນໄມ້, ເພື່ຶອໃຫ້ປ່າໄມ້ ແລະ ທີ່ດິນໃນເຂດປ່າຜະລິດໄດ້ຮັບການຈັດຕັ້ງປະຕິບັດຕາມລະບົບການຄຸ້ມຄອງປົກປັກຮັກສາປ່າໄມ້ແບບຍືນນານ, ເຮັດໃຫ້ປະຊາຊົນບັນດາເຜົ່າທີ່ຢູ່ໃນເຂດປ່າຜະລິດໄດ້ຮັບການປັບປຸງພັດທະນາຊີວິດການເປັນຢູ່ຂອງຕົນໃຫ້ດີຂຶ້ນເທື່ອລະກ້າວ ໂດຍບໍ່ເຂົ້າໄປບຸກລຸກທຳລາຍປ່າໄມ້ ແລະ ເພື່ອໃຫ້ປ່າໄມ້ໃນເຂດດັ່ງກ່າວ ກາຍເປັນປ່າທີ່ມີຄວາມສາມາດຕອບສະໜອງວັດຖຸດິບ ແລະ ເຄື່ອງປ່າຂອງດົງ ໃຫ້ແກ່ການພັດທະນາເສດຖະກິດຂອງຊາດໄວ້ຢ່າງຍືນນານ.
