ລາວເລີ່ມປະຕິບັດໂຄງການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ

ໃນວັນທີ 13 ມີນານີ້, ສູນກາງສະຫະພັນແມ່ຍິງລາວ ແລະ ອົງການແຄ ໄດ້ຮ່ວມກັນລົງນາມບົດບັນທຶກຄວາມເຂົ້າໃຈໃນການຈັດຕັ້ງປະຕິບັດ “ໂຄງການເສີມສ້າງຄວາມເຂັ້ມແຂງໃນການມີສ່ວນຮ່ວມຂອງຊຸມຊົນ ເພື່ອຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ຍິງ” ຊຶ່ງຈະເລີ່ມແຕ່ເດືອນມີນາ 2018 ໄປຮອດຕົ້ນປີ 2020 ຢູ່ແຂວງເຊກອງມີ 1 ເມືອງ 10 ບ້ານ, ຜົ້ງສາລີມີ 2 ເມືອງ 10 ບ້ານ ແລະ ນະຄອນຫລວງວຽງຈັນມີ 4 ເມືອງ 20 ບ້ານ, ໂດຍມີຈຸດປະສົງແນໃສ່ສ້າງຄວາມເຂົ້າໃຈກ່ຽວກັບການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເພື່ອກ້າວໄປສູ່ການປ່ຽນແປງພຶດຕິກຳດ້ານແນວຄິດໃນການປົກປ້ອງແມ່ຍິງ ແລະ ເດັກຍິງໃນສັງຄົມ, ໂດຍຜ່ານກິດຈະກຳການສົນທະນາໃນຊຸມຊົນ ແລະ ໜ່ວຍງານໄກ່ເກ່ຍ, ນຳໃຊ້ປຶ້ມຄູ່ມືຂອງທາງກະຊວງຍຸຕິທຳທີ່ໄດ້ຈັດພີມອອກມາເພື່ອນຳໃຊ້ເຂົ້າໃນວຽກງານປົກປ້ອງແມ່ຍິງ ແລະ ເດັກໃຫ້ມີປະສິດທິຜົນ ແລະ ສອດຄ່ອງກັບແຜນງານບຸລິມະສິດແຫ່ງຊາດວ່າດ້ວຍການປ້ອງກັນ ແລະ ການລຶບລ້າງການໃຊ້ຄວາມຮຸນແຮງຕໍ່ເດັກນ້ອຍປີ 2014-2020 ຂອງສູນກາງສະຫະພັນແມ່ຍິງລາວນໍາດ້ວຍ.

ເຂົ້າຮ່ວມພິທີລົງນາມໂຄງການດັ່ງກ່າວມີທ່ານນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ, ທ່ານ ຊອນ ເບີນາດ ຄາລາສໂກ ເອກ ອັກຄະລັດຖະທູດອົດສະຕຣາລີປະຈຳລາວ, ພ້ອມດ້ວຍພາກສ່ວນກ່ຽວຂ້ອງຕ່າງໆເຂົ້າຮ່ວມນໍາດ້ວຍ.