ບໍລິສັດ Bosch ເປີດຫ້ອງການໃຫຍ່ປະຈໍາລາວ
ບໍລິສັດ ບອສຈ໌ (Bosch) ເຊິ່ງແມ່ນຜູ້ສະໜອງດ້ານເຕັກໂນໂລຊີອຸດສະຫະກໍາ ແລະ ນະວັດຕະກໍາການບໍລິການທີ່ທັນສະໄໝແຖວໜ້າຂອງໂລກໄດ້ຕັດສີນໃຈເປີດຫ້ອງການໃຫຍ່ປະຈໍາ ສປປ ລາວ ຢ່າງເປັນທາງການ, ຫລັງຈາກລິງເຫັນເຖິງການເຕີບໃຫຍ່ຂະຫຍາຍຕົວຂອງເສດຖະກິດລາວໃນອະນາຄົດ, ພາຍຫລັງເຂົ້າມາສູ່ຕະຫລາດ ສປປ ລາວ ຄັ້ງທໍາທິດໃນ 6 ປີຜ່ານມາດ້ວຍການເປີດເປັນພຽງຫ້ອງການຜູ້ຕາງໜ້າເທົ່ານັ້ນ.
ພິທີເປີດຫ້ອງການດັ່ງກ່າວ, ໄດ້ຈັດຂຶ້ນໃນວັນທີ 12 ມິນານີ້, ຢູ່ອາຄານວຽງຈັນພານິດ (ຕໍ່ໜ້າສູນການຄ້າຕະຫລາດເຊົ້າຊອບປິງມໍ) ນະຄອນຫລວງວຽງຈັນ, ໂດຍມີທ່ານມາຕິນ ຫາເຢສ ປະທານບໍລິສັດ Bosch ປະຈໍາພາກພື້ນອາຊີຕາເວັນອອກສຽງໃຕ້, ພ້ອມພະນັກງານ ແລະ ດ້ວຍຕົວແທນຈໍາໜ່າຍເຂົ້າຮ່ວມເປັນຈໍານວນຫລາຍ.
ທ່ານ ມາຕິນ ຫາເຢສ ມີຄໍາເຫັນວ່າ: ຫ້ອງການໃຫຍ່ປະຈໍາລາວ, ເປັນແຫ່ງທີ 9 ໃນພາກພື້ນອາຊີຕາເວັນອອກສຽງໃຕ້, ເຊິ່ງກ່ອນໜ້ານີ້, ພວກເຮົາໄດ້ເປີດຫ້ອງການປະຈໍາຢູ່ປະເທດສິງກະໂປ, ມາເລເຊຍ, ອິນໂດເນເຊຍ, ຟີລິບປິນ, ໄທ, ຫວຽດນາມ, ກໍາປູເຈຍ ແລະ ມຽນມາ ແລະ ຫ້ອງການແຫ່ງນີ້ຈະປະກອບມີ: ຫ້ອງການ, ສູນຝຶກອົບຮົມ, ຫ້ອງວາງສະແດງສີນຄ້າ, ຫ້ອງບໍລິການຫລັງການຂາຍ ແລະ ການບໍລິການຕ່າງໆ ໂດຍມີເປົ້າໝາຍແນໃສ່ສະໜອງອຸປະກອນດ້ານພະລັງານ, ລົດຍົນ, ລະບົບຄວາມປອດໄພ ແລະ ເຕັກໂນໂລຊີຕ່າງໆ ເພື່ອຂະຫຍາຍການບໍລິການທີ່ມີຄຸນນະພາບໃຫ້ລູກຄ້າໃນປະເທດລາວ, ຊຶ່ງພວກເຮົາເຫັນວ່າ ສປປ ລາວ ເປັນຕະຫລາດທີ່ມີຄວາມສາມາດບົ່ມຊ້ອນຫລາຍດ້ານ, ມີການພັດທະນາພື້ນຖານໂຄງລ່າງກວ້າງຂວາງ ແລະ ເສດຖະກິດເຕີບໃຫຍ່ໄວໃນບັນດາປະເທດອາຊີຕາເວັນອອກສຽງໃຕ້, ຊຶ່ງພວກເຮົາເຊື່ອໝັ້ນວ່າເຕັກໂນໂລຊີ ແລະ ນະວັດຕະກໍາຕ່າງໆທີ່ທັນສະໄໝ ຂອງບໍລິສັດພວກເຮົາຈະປະກອບສ່ວນເຂົ້າໃນການພັດທະນາພື້ນຖານໂຄງລ່າງ ແລະ ຂະແໜງອຸດສະຫະກໍາຂອງປະເທດເຂັ້ມແຂງຂຶ້ນ.
ກຸ່ມບໍລິສັດ Bosch ເປັນຜູ້ສະໜອງດ້ານເຕັກໂນໂລຊີຊັ້ນນໍາຂອງໂລກ, ໃນປີຜ່ານມາມີຍອດຂາຍຫລາຍກວ່າ 78 ຕື້ເອີໂຣ ແລະ ມີ 450 ບໍລິສັດໃນເຄືອຢູ່60 ປະເທດໃນໂລກ.
