ລາວໂຕໂຢຕາ ເອັຟຊີ ຊະນະ ດີເຄ ເອັຟຊີ 3-0
ສະໂມສອນ ລາວໂຕໂຢຕາ ເອັຟຊີ ສາມາດເອົາຊະນະສະໂມສອນ ດີເຄ ເອັຟຊີ 3-0 ໃນວັນທີ 10 ມີນາ 2018 ທີ່ສະໜາມກິລາແຫ່ງຊາດລາວຫລັກ 16. ຂະນະທີ່ສະໂມສອນ ຊ້າງນ້ອຍ ເອັຟຊີ ສະເໝີ ກອງທັບ ເອັຟຊີ 1-1 ໃນການແຂ່ງຂັນເຕະບານເປບຊີ ລາວພຣີເມຍລີກ 2018.
ການແຂ່ງຂັນເປບຊີ ລາວພຣີເມຍລີກ 2018 ໄດ້ເລີ່ມຂຶ້ນໃນທ້າຍເດືອນກຸມພາຜ່ານມານີ້ ໂດຍແຕ່ລະສະໂມສອນໄດ້ລົງສະໜາມ 3 ຄັ້ງ, ຂະນະທີ່ສະໂມສອນ ປກສ ເອັຟຊີ ແລະ ສະໂມສອນ ຫລວງພະບາງ ຢູໄນເຕັດ ລົງພຽງ 2 ຄັ້ງເທົ່ານັ້ນ ເພາະວ່າເກີດອຸປະຕິເຫດໃນຂະນະທີ່ສະໂມສອນ ປກສ ເອັຟຊີ ເດີນທາງໄປລົງສະໜາມພົບກັບ ຫລວງພະບາງ ຢູໄນເຕັດ ຢູ່ແຂວງຫລວງພະບາງ ໃນວັນທີ 11 ມີນາ 2018 ຜ່ານມານີ້. ດັ່ງນັ້ນ ຈຶ່ງໄດ້ເລື່ອນການແຂ່ງຂັນຄູ່ດັ່ງກ່າວອອກແບບກະທັນຫັນ. ສໍາລັບການແຂ່ງຂັນຄັ້ງທີ 3 ຂອງສະໂມສອນ ລາວໂຕໂຢຕາ ເອັຟຊີ ລົງສະໜາມໃນວັນທີ 10 ມີນາຜ່ານມານີ້ ສາມາດເອົາຊະນະສະໂມສອນ ດີເຄ ເອັຟຊີ 3-0 ເຊິ່ງໄດ້ຈາກລູກຍິງຂອງທ້າວ ໂສພາ ໄຊຊະນະ, ທ້າວ SOMA OTANI, ທ້າວ TAKUMU NISHIHARA ສົ່ງຜົນໃຫ້ສະໂມສອນ ລາວໂຕໂຢຕາ ຈັດຢູ່ອັນດັບທີ 1 ຂອງຕາຕະລາງຄະແນນຈາກການລົງສະໜາມ 3 ຄັ້ງ ຊະນະ 3 ຄັ້ງ ລວມມີ 9 ຄະແນນ, ສ່ວນສະໂມສອນ ດີເຄ ເອັຟຊີ ຈັດຢູ່ອັນດັບທີ 5 ຂອງຕາຕະລາງຄະແນນຈາກການລົງສະໜາມ 3 ຄັ້ງ ສະເໝີ 2 ຄັ້ງ ເສຍ 1 ຄັ້ງ ລວມມີ 2 ຄະແນນ. ຂະນະດຽວກັນ ສະໂມສອນ ຊ້າງນ້ອຍ ເອັຟຊີ ສະເໝີກັບສະໂມສອນ ກອງທັບ ເອັຟຊີ 1-1.
ສ່ວນການແຂ່ງຂັນໃນວັນທີ 11 ມີນາ 2018 ທີ່ສະໜາມກິລາກາງມະຫາວິທະຍາໄລແຫ່ງຊາດ ສະໂມສອນ ມາສເຕີ ເອັຟຊີ ອັນດັບທີ 6 ຂອງຕາຕະລາງຄະແນນ ສະເໝີ (1-1) ສະໂມສອນ ສະຫວັນ ຢູໄນເຕັດ ອັນດັບທີ 7 ຂອງຕາຕະລາງຄະແນນ ແບ່ງກັນສະໂມສອນລະ 1 ຄະແນນ.
