ນັກສຶກສາລາວ 18 ຄົນໄດ້ຮັບທຶນການສຶກສາຍີ່ປຸ່ນ
ໃນວັນທີ 7 ມີນານີ້, ເອກອັກຄະຣາຊະທູດຍີ່ປຸ່ນປະຈຳ ສປປ ລາວ ໄດ້ຈັດງານລ້ຽງສົ່ງນັກສຶກສາລາວຈຳນວນ 18 ຄົນ ເພື່ອໄປສຶກສາຕໍ່ທີ່ຍີ່ປຸ່ນຂຶ້ນ ພາຍໃຕ້ທຶນລັດຖະບານຍີ່ປຸ່ນ (MEXT: Ministry of Education, Culture, Sports, Science and Technology of Japan) ແລະ 2 ຄົນ ໃນນາມທຶນ JDS ໃນລະດັບປະລິນຍາເອກ.
ໃນໄລຍະເວລາເກືອບ 30 ປີຜ່ານມາ, ລັດຖະບານຍີ່ປຸ່ນໃຫ້ທຶນການສຶກສາແກ່ ສປປ ລາວ ລາວມີຈຳນວນຫລາຍກວ່າ 1.000 ຄົນ ໂດຍຜ່ານຫລາຍໆໂຄງການເຊັ່ນ: ໂຄງການທຶນ MEXT, JDS (Japanese Grant Aid for Human Resource Development Scholarship), YLP (Young Leader’s Program) ແລະ ອື່ນໆ. ສຳລັບປີນີ້, ລັດຖະບານຍີ່ປຸ່ນໄດ້ໃຫ້ທຶນແກ່ນັກສຶກສາລາວຈຳນວນ 16 ຄົນ (8 ຄົນຈະເຂົ້າຮຽນໃນລະດັບປະລິນຍາໂທ, 6 ຄົນໃນລະດັບວິຊາຊີບຊັ້ນສູງທາງດ້ານເຕັກໂນໂລຊີ ແລະ 2 ຄົນໃນລະດັບວິຊາຊີບຊັ້ນສູງທົ່ວໄປ) ແລະ ອີກ 2 ຄົນທີ່ໄດ້ຖືກຄັດເລືອກໂດຍໂຄງການ JDS ທີ່ຈະໄປຮຽນໃນລະດັບປະລິນຍາເອກທີ່ຍີ່ປຸ່ນເຊັ່ນດຽວກັນ.
ໃນໂອກາດນີ້, ທ່ານ ທາເກຊິ ຮິກິຮາລະ ເອກອັກຄະຣາຊະທູດຍີ່ປຸ່ນປະຈຳລາວ ໄດ້ໃຫ້ຄຳເຫັນວ່າ: ສິ່ງທີ່ນັກສຶກສາ 18 ຄົນຈະໄປຮຽນຢູ່ຍີ່ປຸ່ນນີ້ຄວນເປີດມຸມມອງເພື່ອອະນາຄົດທີ່ຮຸ່ງເຮືອງຂອງພວກເຂົາ ແລະ ທ່ານໃຫ້ກຳລັງໃຈແກ່ບັນດານັກສຶກສາທີ່ຈະໄປສຶກສາວ່າ ຈົ່ງເປັນຂົວຕໍ່ທີ່ດີແຫ່ງການພົວພັນຮ່ວມມືລະຫວ່າງ ຍີ່ປຸ່ນ ແລະ ລາວ ໃຫ້ນັບມື້ເລິກເຊິ່ງ.
