ລາວ ຍັງມີສິ່ງທ້າຍໃນການສະໜອງແຮງງານ ໃຫ້ແກ່ຂະແໜງງານຕ່າງໆ
ຂປລ. ກົນໄກການຄຸ້ມຄອງ ການພັດທະນາສືມືແຮງງານ ແລະ ການຈັດຫາງານ ຍັງບໍ່ທັນເປັນລະບົບ, ບໍ່ເປັນເອກະພາບ, ການສ້າງໂອກາດ ການມີວຽກເຮັດງານທຳ ໂດຍສະເພາະ ການສະໜອງແຮງງານ ຍັງບໍ່ທັນຕິດພັນກັບຄວາມຕ້ອງການ ຂອງຕະຫລາດແຮງງານ, ຈຶ່ງເຮັດໃຫ້ການສະໜອງກຳ ລັງແຮງງານລາວ ເຂົ້າສູ່ຕະຫລາດແຮງງານ ມີລັກສະນະເຫລືອບໍ່ພໍ, ໃນຂະນະທີ່ການເຕີບໂຕ ຂອງເສດຖະກິດ ມີການພັດທະນາໄວ ພໍສົມຄວນ ແຕ່ການສ້າງຕຳແໜ່ງງານ ພາຍໃນ ຊ້ຳພັດບໍ່ຫລາຍເທົ່າທີ່ຄວນ. ຍິ່ງກວ່ານັ້ນ, ຂະແໜງການພັດທະນາເຫລົ່ານັ້ນ ພັດນຳເຂົ້າ ແລະ ນຳໃຊ້ແຮງງານ ຈາກຕ່າງປະເທດ ຢ່າງຫລວງຫລາຍ.
ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ສຳພາດ ເມື່ອທ້າຍອາທິດຜ່ານມານີ້ ວ່າ: ນັບແຕ່ ສປປ ລາວ ໄດ້ເຂົ້າເປັນສະມາຊິກ ອາຊຽນ ເຮັດໃຫ້ແຮງງານຂອງລາວ ໄດ້ມີບົດບາດ ແລະ ມີຄວາມສຳຄັນ ໃນການ ພັດທະນາເສດຖະກິດ-ສັງຄົມຂອງປະເທດ ກໍຄື ໃນພາກພື້ນ ແລະ ອາຊຽນ. ສະນັ້ນ, ວຽກງານ ແຮງງານ ຂອງກະຊວງ ຮສສ ໃນແຕ່ລະປີ ກໍໄດ້ມີການສະຫລຸບ, ມີການວາງແຜນ ແລະ ມີທິດທາງ ໃນການພັດທະນາແຮງງານລາວ. ປັດຈຸບັນ ສປປ ລາວ ກໍໄດ້ສົ່ງແຮງງານລາວ ໄປຫລາຍປະເທດ, ໂດຍສະເພາະ ແມ່ນບັນດາປະເທດໃກ້ຄຽງ ທີ່ໄດ້ລົງນາມບົດບັນທຶກນຳກັນ ມີ ໄທ, ຍີ່ປຸ່ນ, ສ.ເກົາຫລີ ແລະ ປັດຈຸບັນ ກຳລັງປຶກສາຫາລືກ່ຽວກັບ ການຈະສົ່ງແຮງງານລາວ ໄປເຮັດວຽກຢູ່ ປະເທດສິງກະໂປ. ນອກຈາກນີ້, ກໍໄດ້ ມີແຮງງານເຄື່ອນຍ້າຍ ແລະ ເຄື່ອນທີ່ ທີ່ໄດ້ເຮັດວຽກ ຢູ່ຕາມຊາຍແດນ ທີ່ຕິດຈອດກັບປະເທດເຮົາ ເປັນຕົ້ນ ຫວຽດ ນາມ ແລະ ຈີນ.
ທ່ານ ຄຳແພງ ໄຊສົມແພງ ກ່າວວ່າ: ໂຄງການ ທາງລົດໄຟລາວ-ຈີນ ເປັນໂຄງການ ໃຫຍ່ອີກໂຄງການໜຶ່ງ ທີ່ລັດຖະບານລາວ ແລະ ຈີນ ໄດ້ເຊັນMOU ຮ່ວມກັນ ໃນການສະໜອງ ແຮງງານໃນໂຄງການດັ່ງກ່າວ ຫລາຍພັນຄົນ, ແຕ່ວ່າແຮງງານເຮົາ ຍັງບໍ່ທັນໄດ້ກຽມພ້ອມເທົ່າທີ່ຄວນ ແລະ ເຮັດໃຫ້ການຕອບສະໜອງ ແຮງງານບໍ່ທັນທາງດ້ານຄຸນນະພາບ ແລະ ປະລິມານ ຕາມທີ່ທາງໂຄງການຕ້ອງການ. ນອກຈາກນີ້, ການນຳໃຊ້ເຕັກນິກ, ຄວາມທົນທານ ແລະ ສະມັດຕະພາບແຮງງານຂອງເຮົາ ກໍຍັງເຮັດບໍ່ໄດ້ດີ ເທົ່າທີ່ຄວນ. ດ້ວຍເຫດຜົນດັ່ງກ່າວ, ກະຊວງ ຮສສ ໄດ້ຮ່ວມກັບ ກະຊວງໂຍ ທາທິການ ແລະ ຂົນສົ່ງ ໄດ້ເລືອກເຟັ້ນ ແລະ ຄັດເລືອກເອົາແຮງງານລາວ ຈຳນວນໜຶ່ງເຂົ້າຮຽນ, ຝຶກອົບຮົມໄລຍະສັ້ນ, ກາງ ແລະ ໄລຍະຍາວ ເພື່ອພັດທະນາ ສີມືແຮງງານລາວ ໃຫ້ມີຄຸນນະພາບ ແລະ ປະສິດທິຜົນ ເພື່ອສະໜອງ ໃຫ້ແກ່ໂຄງການຕ່າງໆ ເປັນຕົ້ນແຮງງານ ທີ່ເຮັດວຽກຢູ່ໂຄງການເຂື່ອນໄຟຟ້າ, ບໍ່ແຮ່, ພັດທະນາຕົວເມືອງໃໝ່, ເສດຖະກິດພິເສດ ລວມໄປເຖິງໂຄງການ ຂະໜາດນ້ອຍ ແລະ ຂີໜາດກາງ.
ທ່ານ ຄຳແພງ ໄຊສົມແພງ ກ່າວຕື່ມວ່າ: ທາງດ້ານວຽກງານ ການຄຸ້ມຄອງແຮງງານ ລັດຖະ ບານໄດ້ມີທິດທາງ, ມີແຜນການຊີ້ນຳ ແລະ ວາງເປົ້າໝາຍ ໃຫ້ກະຊວງ ຮສສ ຈັດຕັ້ງປະຕິບັດວຽກງານການ ຄຸ້ມຄອງແຮງງານ ແລະ ພັດທະນາສືມືແຮງງານ ໃຫ້ຫລາຍຂຶ້ນກວ່າເກົ່າ, ໂດຍສະເພາະ ການຄຸ້ມຄອງແຮງງານ ເພື່ອເຮັດໃຫ້ວຽກງານດັ່ງກ່າວ, ເຂົ້າສູ່ລະບຽບກົດໝາຍ ໃນການຄຸ້ມຄອງແຮງງານ ໃຫ້ດີຂຶ້ນກວ່າເກົ່າ. ໃນ 2 ປີຜ່ານມາ ພວກເຮົາກໍໄດ້ປັບສະຖານະພາບ ທາງດ້ານແຮງງານ ຜູ້ທີ່ເຂົ້າເຮັດວຽກຢູ່ ສປປ ລາວ ໃຫ້ນັບມື້ນັບຖືກກັບລະບຽບກົດໝາຍ ຂອງແຮງງານ ເພື່ອປົກປ້ອງສິດຜົນປະໂຫຍດອັນຊອບທຳ ໃຫ້ຜູ້ອອກແຮງງານ ບໍວ່າຈະເປັນແຮງງານ ຕ່າງປະເທດ ຫລື ວ່າແຮງງານລາວ ທີ່ໄປເຮັດວຽກ ຢູ່ຕ່າງປະເທດ ເຮັດແນວໃດ ໃຫ້ເຂົາເຈົ້າໄດ້ພັດ ທະນາໄດ້ສີມືແຮງງານຂອງຕົນ ໃນການເຂົ້າ-ອອກເມືອງ, ເຂົ້າເຮັດວຽກຕາມໂຄງການຕ່າງໆ ໃຫ້ຖືກກັບເປົ້າໝາຍ.
