ລັດສັ່ງປິດໂຮງງານແຍກ ແລະ ຫລອມສິ່ງເສດເຫລືອອີເລັກໂຕນິກທີ່ບໍ່ໄດ້ມາດຕະຖານ 2 ແຫ່ງ
ກະຊວງອຸດສາຫະກຳ ແລະ ການຄ້າ ໃຫ້ຮູ້ວ່າ: ຕາມບົດແນະນໍາກ່ຽວກັບການຄຸ້ມຄອງສິ່ງເສດເຫລືອເປັນພິດ ແລະ ອັນຕະລາຍ ເລກທີ 0744/ກຊສ ລົງວັນທີ 11 ກຸມພາ 2015 ແລະ ບົດແນະນໍາກ່ຽວກັບການຄວບຄຸມມົນລະພິດສະບັບເລກທີ 0745/ກຊສ ລົງວັນທີ 11 ກຸມພາ 2015 ກະຊວງອຸດສະຫະກໍາ ແລະ ການຄ້າສົມທົບກັບທ້ອງຖິ່ນກ່ຽວຂ້ອງໄດ້ລົງກວດກາໂຮງງານແຍກ ແລະ ຫລອມສິ່ງເສດເຫລືອອີເລັກໂຕຣນິກຈໍານວນ 13 ແຫ່ງ ແລະ ໄດ້ສັ່ງປິດ 2 ແຫ່ງຄື: ຢູ່ນະຄອນຫລວງວຽງຈັນ 1 ແຫ່ງ ແລະ ຢູ່ແຂວງຫລວງນໍ້າທາ 1 ແຫ່ງແມ່ນໃຫ້ຢຸດຕິຜະລິດຢ່າງຖາວອນ, ເນື່ອງຈາກໂຮງງານດັ່ງກ່າວຕັ້ງຢູ່ບ່ອນບໍ່ເໝາະສົມ ແລະ ສົ່ງມົນລະພິດຕໍ່ລະບົບນິເວດ ແລະ ຊຸມຊົນໃນເຂດດັ່ງກ່າວ ແລະ ເມື່ອບໍ່ດົນມານີ້, ຫ້ອງວ່າການສໍານັກງານນາຍົກລັດຖະມົນຕີ ກໍໄດ້ອອກແຈ້ງການໃຫ້ລົງຕິດຕາມກວດກາ ແລະ ເກັບຂໍ້ມູນໂຮງງານແຍກ ແລະ ຫລອມສິ່ງເສດເຫລືອອີເລັກໂຕຣນິກ ແລະ ໝໍ້ໄຟເກົ່າໃນທົ່ວປະເທດສະບັບເລກທີ 1855/ຫສນຍ.ກລຂ ເພື່ອປ້ອງກັນ, ຄວບຄຸມ ແລະ ຫລຸດຜ່ອນມົນລະພິດທີ່ເກີດຈາກສານເຄມີເປັນພິດທີ່ບໍ່ສາມາດປ້ອງກັນໄດ້, ພ້ອມນັ້ນ ກໍເພື່ອກວດກາຄືນກ່ຽວກັບມາດຕະການ ແລະ ຄຸນນະພາບຂອງບັນດາໂຮງງານດັ່ງກ່າວ, ໂດຍສະເພາະການນໍາເຂົ້າ ແລະ ການນໍາໃຊ້ວັດຖຸດິບ (ເຄື່ອງອີເລັກໂຕຣນິກ ແລະ ໝໍ້ໄຟເກົ່າ) ໃຫ້ປະຕິບັດຕາມລະບຽບ ແລະ ການກໍານົດມາດຕະຖານຈາກກະຊວງກ່ຽວຂ້ອງຢ່າງເຂັ້ມງວດ.
