ສ.ເກົາຫລີ ເດີນໜ້າສູ່ການເປັນສັງຄົມບໍ່ມີເງິນຫລຽນ
ເຊອຸນ 19 ເມສາ: ສຳນັກຂ່າວຍອນຮັບຂອງ ສ.ເກົາຫລີ ເປີດເຜີຍວ່າ: ທະນາຄານກາງ ສ.ເກົາຫລີ ວາງແຜນເລີ່ມໂຄງການສົ່ງເສີມໃຫ້ປະເທດກາຍເປັນສັງຄົມບໍ່ມີເງິນຫລຽນນັບແຕ່ວັນທີ 20 ເມສານີ້ ຫວັງເພີ່ມຄວາມສະດວກສະບາຍໃຫ້ແກ່ປະຊາຊົນ.
ທະນາຄານ ສ.ເກົາຫລີ ລະບຸວ່າ: ໂຄງການດັ່ງກ່າວຈະຊ່ວຍໃຫ້ຜູ້ຊົມໃຊ້ສາມາດຝາກເງິນທອນຈາກການຊື້ເຄື່ອງເຂົ້າບັດຕື່ມເງິນໄດ້ໂດຍກົງຕາມຮ້ານຄ້າ ແລະ ຮ້ານສັບພະສິນຄ້າຕ່າງໆທີ່ເຂົ້າຮ່ວມໂຄງການ ໂດຍບໍ່ຈຳເປັນຈະຕ້ອງເອົາເງິນຫລຽນກັບມາເກັບໃນກະເປົາໃຫ້ໜັກອີກຕໍ່ໄປ. ນອກຈາກນີ້ ຖ້າປະຊາຊົນໃຫ້ການຕອບຮັບດີ ໂຄງການນີ້ຈະຊ່ວຍໃຫ້ປະເທດຫລຸດຕົ້ນທຶນໃນການຜະລິດເງິນຫລຽນລົງໄດ້ນຳອີກ.
ໃນປີຜ່ານມາ, ສ.ເກົາຫລີ ຕ້ອງໃຊ້ງົບປະມານທັງໝົດ 57.300 ລ້ານວອນ ໃນການຜະລິດເງິນຫລຽນ.
ທັງນີ້, ເຈົ້າໜ້າທີ່ຂອງທະນາຄານກາງ ສ.ເກົາຫລີ ກ່າວວ່າ: ໂຄງການດັ່ງກ່າວບໍ່ໄດ້ເປັນໂຕຕັດສິນວ່າ ສ.ເກົາຫລີ ພວມເດີນໜ້າໄປສູ່ສັງຄົມບໍ່ໃຊ້ເງິນສົດ ແລະ ກ່າວວ່າ: ຍັງມີໂອກາດໜ້ອຍທີ່ປະເທດຈະກາຍເປັນສັງຄົມບໍ່ໃຊ້ເງິນສົດໂດຍສົມບູນ.
