ສປປ ເກົາຫລີ ສົ່ງອາວຸດຕ້ອງຫ້າມ ໃຫ້ຊີຣີ ແລະ ມຽນມາ
ຄະນະຜູ້ຊ່ຽວຊານຂອງສະຫະປະຊາຊາດ (UN) ເປີດເຜີຍວ່າ: ສປປ ເກົາຫລີ ສົ່ງສິ່ງຂອງທີ່ໃຊ້ໃນໂຄງການລູກສອນໄຟ ແລະ ອາວຸດເຄມີ ລວມທັງຊ່າງເຕັກນິກລູກສອນໄຟໃຫ້ແກ່ຊີຣີ ອັນເປັນການລະເມີດມາດຕະການຂວ້ຳບາດຂອງ UN ແລະ ສົ່ງລະບົບລູກສອນໄຟຕ້ອງຫ້າມໃຫ້ແກ່ມຽນມາ.
ຄະນະຜູ້ຊ່ຽວຊານຕິດຕາມມາດຕະການຂວ້ຳບາດ ສປປ ເກົາຫລີ ເປີດເຜີຍລາຍງານການສອບສວນເລື່ອງ ສປປ ເກົາຫລີ ຈັດສົ່ງລູກສອນໄຟ, ອາວຸດທົ່ວໄປ ແລະ ສິ່ງຂອງທີ່ສາມາດນຳໄປໃຊ້ທາງທະຫານວ່າ: ມີການລຳລຽງໄປໃຫ້ຊີຣີໂດຍບໍ່ລາຍງານກວ່າ 40 ຄັ້ງ ລະຫວ່າງປີ 2012-2016. ນອກຈາກນີ້ ຍັງມີສະມາຊິກ UN ປະເທດໜຶ່ງແຈ້ງວ່າ: ມີຫລັກຖານວ່າມຽນມາຮັບອາວຸດທົ່ວໄປຈາກ ສປປ ເກົາຫລີ ຫລາຍຢ່າງ ນັບແຕ່ເຄື່ອງຍິງຈະຫລອດໄປຈົນເຖິງລູກສອນໄຟຈາກພື້ນສູ່ອາກາດ ແລະ ລະບົບລູກສອນໄຟ.
ລາຍງານສະບັບນີ້ຈະເຜີຍແຜ່ຕໍ່ສາທາລະນະກາງເດືອນມີນາ ເນື້ອໃນລາຍລະອຽດຫລັກຖານໃໝ່ມີນ້ຳໜັກເລື່ອງ ສປປ ເກົາຫລີ ຕິດຕໍ່ເລື່ອງອາວຸດກັບຊີຣີນັບແຕ່ປີ 2008 ແລະ ໄດ້ອ້າງຂໍ້ຊີ້ແຈງຂອງຊີຣີທີ່ວ່າ: ບໍ່ມີບໍລິສັດເຕັກນິກ ສປປ ເກົາຫລີ ຕັ້ງຢູ່ໃນຊີຣີ ມີແຕ່ເຈົ້າໜ້າທີ່ ສປປ ເກົາຫລີ ທີ່ເຂົ້າມາຝຶກກິລາຕາມສັນຍາຈ້າງເອກະຊົນ, ສ່ວນມຽນມານັ້ນ ຄະນະຜູ້ຊ່ຽວຊານເຄີຍສະຫລຸບວ່າ: ມີບໍລິສັດມຽນມາແຫ່ງໜຶ່ງພົວພັນການພະຍາຍາມລຳລຽງວັດຖຸຕ້ອງຫ້າມກ່ຽວກັບນິວເຄຼຍໃນປີ 2012. ມຽນມາຊີ້ແຈງໃນປີ 2015 ວ່າ: ມີການພົວພັນທາງການທູດປົກກະຕິກັບ ສປປ ເກົາຫລີ ເທົ່ານັ້ນ ກ່ອນຈະແຈ້ງໃນປີກ່ອນວ່າ ໄດ້ຂັບໄລ່ນັກການທູດ ສປປ ເກົາຫລີ ເພາະເຮັດວຽກຕາມຄຳສັ່ງຂອງໂຄມິດ ຜູ້ສົ່ງອອກອາວຸດລາຍໃຫຍ່ຂອງ ສປປ ເກົາຫລີ ແລະ ແຈ້ງໃນຕົ້ນປີນີ້ວ່າກຳລັງກວດສອບຄຳຮ້ອງຂໍຂໍ້ມູນຫລ້າສຸດຂອງຄະນະຜູ້ຊ່ຽວຊານ UN.
