ລາວ-ສ.ເກົາຫລີ ແລກປ່ຽນປະສົບການ ໃນການພັດທະນາເສດຖະກິດທີ່ບໍ່ຊ້ຳຊ້ອນ
ໃນວັນທີ 27 ກຸມພານີ້, ກະຊວງແຜນການ ແລະ ການລົງທຶນ ຮ່ວມກັບ ສະຖາບັນເກົາຫລີ ແລະ ສະຖານທູດ ສ.ເກົາຫລີ ປະຈຳ ສປປ ລາວ ຈັດກອງປະຊຸມສຳມະນາ ພາຍໃຕ້ແຜນງານແລກປ່ຽນທາງດ້ານຄວາມຮູ້ ລະຫວ່າງ ສປປ ລາວ ແລະ ສ.ເກົາຫລີ ຂຶ້ນທີ່ນະຄອນຫລວງວຽງຈັນ ໃນຫົວຂໍ້ “ຍຸດທະສາດການພັດທະນາຂະແໜງອຸດສາຫະກຳຂອງບັນດາປະເທດອາຊຽນ” ໂດຍການເຂົ້າຮ່ວມຂອງທ່ານນາງ ສີສົມບູນ ອຸນາວົງ ຫົວໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ, ທ່ານ ຊັງຊູຊິນ ເອກອັກຄະລັດຖະທູດ ສ.ເກົາຫລີ ປະຈຳ ສປປ ລາວ, ທ່ານ ແຕຍຸງກວນ ຊ່ຽວຊານທີ່ປຶກສາອາວຸໂສ ສະຖາບັນພັດທະນາ ສ.ເກົາຫລີ ເຂົ້າຮ່ວມນໍາດ້ວຍ ເພື່ອແລກປ່ຽນປະສົບການໃນການພັດທະນາເສດຖະກິດທີ່ບໍ່ຊ້ຳຊ້ອນກັນຈາກບົດຮຽນ ສ.ເກົາຫລີ ກັບກຸ່ມບັນດາປະເທດອາຊຽນມີ: ກໍາປູເຈຍ, ລາວ, ມຽນມາ ແລະ ຫວຽດນາມ ພາຍໃຕ້ແຜນງານໂຄງການແລກປ່ຽນຄວາມຮູ້ ເພື່ອດຳເນີນການຕິດຕາມການເປັນຄູ່ຮ່ວມພັດທະນາທີ່ຍືນຍົງ ແລະ ສົ່ງເສີມການແລກປ່ຽນຄຳຄິດຄຳເຫັນກ່ຽວກັບບັນສຳຄັນຕ່າງໆໃນພາກພື້ນ ຊຶ່ງມີ 3 ຫົວຂໍ້ຄື: ຜົນກະທົບໂດຍກົງຈາກການລົງທຶນຂອງຕ່າງປະເທດ ແລະ ນະໂຍບາຍ, ມາດຕະຖານໃນການພັດທະນາອຸດສາຫະກຳ ແລະ ການປັບປຸງໂຄງສ້າງພື້ນຖານທາງດ້ານການເງິນ.
ແຜນການຮ່ວມມືດັ່ງກ່າວ ແມ່ນໄດ້ເລີ່ມຈັດຕັ້ງປະຕິບັດມາແຕ່ປີ 2004 ໂດຍເນັ້ນໃສ່ການແລກປ່ຽນ, ໃຫ້ຄຳປຶກສາດ້ານນະໂຍບາຍການຄຸ້ມຄອງເສດຖະກິດກັບບັນດາປະເທດກຳລັງພັດທະນາໃນທົ່ວໂລກ ມີ 64 ປະເທດ ທີ່ຄົ້ນຄວ້າບັນດາຫົວຂໍ້ຕ່າງໆ ທັງໝົດ 990 ຫົວຂໍ້. ສະເພາະໃນເຂດອາຊີມີ 300 ຫົວຂໍ້, ສຳລັບ ສປປ ລາວ-ສ.ເກົາຫລີ ແມ່ນເລີ່ມມີການຮ່ວມມືກັນແຕ່ປີ 2010 ໂດຍມີ 36 ຫົວຂໍ້ ແລະ ກຳລັງຈັດຕັ້ງປະຕິບັດໃນປັດຈຸບັນມີ 3 ຫົວຂໍ້ ຊຶ່ງຄາດວ່າຈະສຳເລັດ ໃນຕົ້ນເດືອນພຶດສະພານີ້.
