ສະເໜີປື້ມກ່ຽວກັບຊີວິດນັກຈິດຕະກອນ ຂອງທ່ານ ເທບຖາວອນສຸກ

ໃນວັນທີ 26 ກຸມພານີ້, ທີ່ໂຮງແຮງເມີກຽວ ນະຄອນຫຼວງວຽງຈັນ, ໄດ້ມີງານສະເໜີປື້ມກ່ຽວກັບ ຊີວິດນັກຈິດຕະກອນ ຂອງທ່ານ ເທບຖາວອນສຸກ, ຊຶ່ງເຫຼັ້ມນີ້, ເປັນຫົວທໍາອິດທີ່ໄດ້ຮວບຮ່ວມເອົາຄວາມຊົງຈໍາ ໃນຊີວິດການເປັນນັກສິນລະປິນ ແລະ ນັກແຕ້ມຮູບ (ເປັນເວລາ 50 ປີ) ໂດຍເລີ່ມຈາກການໃຊ້ຊີວິດຢູ່ທີ່ ນິວຢອກ, ຝຣັ່ງເສດ, ໄຕ້ຫວັນ, ຍີ່ປຸ່ນ ແລະ ການາດາ ປະເທດທີ່ໄດ້ໄປຮໍ່າຮຽນມາ. ປື້ມດັ່ງກ່າວໃຊ້ເວລາກະກຽມເປັນເວລາ 3 ປີເຄິ່ງ, ຢູ່ໃນປື້ມເຫຼັ້ມນີ້ ມີທັງຮູບແຕ້ມດ້ວຍສໍດໍາ, ສີນໍ້າ ແລະ ສີນໍ້າມັນ, ເປັນຮູບທີ່ເບິ່ງດ້ວຍຈິນຕະນາການ ບໍ່ແມ່ນຮູບຖ່າຍ, ແຕ່ແມ່ນຮູບທີ່ອອກມາຈາກຫົວໃຈ ແລະ ມາຈາກວິນຍານຂອງຕົນເອງ. ປື້ມດັ່ງກ່າວຂຽນຂຶ້ນມາ ເພື່ອສະເຫຼີມສະຫລອງການມີອາຍຸ ຄົບຮອບ 70 ປີ, ທັງເປັນການສັນລະເສີນການເຮັດວຽກເປັນນັກສິນລະປິນ ແຕ້ມຮູບມາເປັນເວລາເກືອບ 65 ປີ ແລະ ເພື່ອເປັນຄໍາຂອບໃຈພໍ່ແມ່, ອາຈານ ແລະ ຢູ່ບັນດາປະເທດຕ່າງໆທີ່ຕົນໄດ້ຮຽນມາ ທີ່ເຮັດໃຫ້ມີອາຊີບທີ່ດີ. ປື້ມເຫຼັ້ມນີ້ຂຽນເປັນພາສາອັງກິດ, ມີຈໍານວນ 500 ຫົວ ແລະ ຖ້າມີຄົນສົນໃຈສາມາດຕິດຕໍ່ໄດ້ໂດຍກົງ Email: thepthavonsouk@yahoo.ca.