ຫາລືຮ່າງກົດໝາຍວ່າດ້ວຍສຳນັກງານຜູ້ຕາງໜ້າແຫ່ງ ສປປ ລາວ ຢູ່ຕ່າງປະເທດ
ໃນວັນທີ 26 ກຸມພານີ້, ກະຊວງການຕ່າງປະເທດໄດ້ຈັດກອງປະຊຸມປຶກສາຫາລືຮ່າງກົດໝາຍວ່າດ້ວຍສຳນັກງານຜູ້ຕາງໜ້າແຫ່ງ ສປປ ລາວ ຢູ່ຕ່າງປະເທດ ຂຶ້ນທີ່ລ່ອງງື່ມວີວຣີສອດ ເມືອງແກ້ວອຸດົມ ແຂວງວຽງຈັນ ແລະ ຈະດຳເນີນໄປເປັນເວລາ 4 ວັນ, ພາຍໃຕ້ການເປັນປະທານຂອງທ່ານນາງ ຄຳເພົ້າ ເອີນທະວັນ ຮອງລັດຖະມົນຕີກະຊວງດັ່ງກ່າວ, ມີຄະນະຮັບຜິດຊອບສ້າງກົດໝາຍ, ຜູ້ຕາງໜ້າຈາກຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ອົງການກວດກາລັດຖະບານ ແລະ ຂະແໜງການກ່ຽວຂ້ອງອື່ນໆເຂົ້າຮ່ວມນຳດ້ວຍ.
ທ່ານຮອງລັດຖະມົນຕີ ກ່າວເປີດກອງປະຊຸມວ່າ: ກອງປະຊຸມຄັ້ງນີ້ແມ່ນ ເພື່ອເປັນການລະດົມຄຳຄິດເຫັນໃສ່ຮ່າງກົດໝາຍດັ່ງກ່າວໃຫ້ມີເນື້ອໃນລະອຽດຈະແຈ້ງ ແລະ ສົມບູນກ່ອນຈະນໍາໄປທາບທາມຄຳຄິດເຫັນນໍາບັນດາອົງການຂັ້ນສູນກາງ, ອົງການປົກຄອງຂັ້ນແຂວງ, ສະພາປະຊາຊົນຂັ້ນແຂວງໃນຂອບເຂດທົ່ວປະເທດ, ພ້ອມທັງເອົາລົງໃນຈົດໝາຍເຫດທາງລັດຖະການ, ຢູ່ກະຊວງຍຸດຕິທຳ ແລະ ເວັບໄຊ ຂອງກະຊວງການຕ່າງປະເທດ ເພື່ອທາບທາມຄຳຄິດເຫັນຂອງສາທາລະນະຊົນຢ່າງກວ້າງຂວາງ.
ກະຊວງການຕ່າງປະເທດ ມີແຜນນໍາເອົາຮ່າງກົດໝາຍສະບັບນີ້ເຂົ້າສູ່ພິຈາລະນາຢູ່ກອງປະຊຸມລັດຖະບານໃນເດືອນມິຖຸນາ ຫຼື ກໍລະກົດ 2018 ນີ້ ແລະ ຈະນໍາເຂົ້າພິຈາລະນາຢູ່ກອງປະຊຸມສະພາແຫ່ງຊາດໃນເດືອນຕຸລາ 2018.
ຮ່າງກົດໝາຍສະບັບນີ້ເປັນກົດໝາຍສະບັບທີ 2 ຂອງກະຊວງການຕ່າງປະເທດ ແລະ ເປັນບາດກ້າວທີ່ສຳຄັນໃນການພັດທະນາລະບົບນິຕິກຳ ຂອງຂະແໜງການຕ່າງປະເທດ ແນໃສ່ເພີ່ມທະວີຄຸ້ມຄອງວຽກງານການຕ່າງປະເທດດ້ວຍກົດໝາຍເທື່ອລະກ້າວ.
ກົດໝາຍສະບັບນີ້ຈະກຳນົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງ ແລະ ການເຄື່ອນໄຫວຂອງສຳນັກງານຜູ້ຕາງໜ້າ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຢູ່ຕ່າງປະເທດ ເພື່ອຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງສໍານັກງານຜູ້ຕາງໜ້າໃຫ້ມີປະສິດທິພາບສູງ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດມີຜົນສຳເລັດ, ກົດໝາຍສະບັບນີ້ມີ 65 ມາດຕາ, ມີ 9 ໝວດ ແລະ ມີ 7 ພາກ.
