ສະພາບເດັກນ້ອຍເປັນພະຍາດຖອກທ້ອງຢູ່ແຂວງອຸດົມໄຊເພີ່ມເປັນ 80 ກໍລະນີແລ້ວໂຊກດີຍັງບໍ່ມີຜູ້ເສຍຊີວິດ
ທ່ານ ສຸວັນທອງ ແສນວັນນະຄຳ ຮອງອຳນວຍການໂຮງໝໍແຂວງອຸດົມໄຊ ໃຫ້ຮູ້ວ່າ: ປັດຈຸບັນ, ສະພາບຕົວເລກເດັກນ້ອຍທີ່ເປັນພະຍາດຖອກທ້ອງໄດ້ເພີ່ມຂຶ້ນເປັນ 80 ກວ່າກໍລະນີແລ້ວ ຢູ່ໃນ 3 ເມືອງຄື: ເມືອງໄຊ, ນາໝໍ້ ແລະ ເມືອງ ແບ່ງ ແຂວງອຸດົມໄຊ, ຊຶ່ງການລະບາດຂອງພະຍາດຖອກທ້ອງໃນເດັກໄດ້ເລີ່ມເກີດຂຶ້ນມາແຕ່ຕົ້ນເດືອນມານີ້, ສ່ວນຫລາຍແມ່ນເດັກນ້ອຍລຸ່ມ 5 ປີລົງມາ, ສະເພາະຢູ່ເມືອງໄຊ ເປັນເມືອງລະບາດກ່ອນມີຜູ້ຕິດເຊື້ອ 47 ກໍລະນີ, ຊຶ່ງສາເຫດອາດເນື່ອງມາຈາກສະພາບອາກາດມີການປ່ຽນແປງ, ໂດຍສະເພະແມ່ນໄລຍະຫັນປ່ຽນລະດູຝົນ, ອີກຢ່າງໜຶ່ງກໍເນື່ອງມາຈາກການກິນດື່ມນ້ຳທີ່ບໍ່ສະອາດ, ເດັກຜູ້ຕິດເຊື້ອສ່ວນໃຫຍ່ແມ່ນມີອາການອ່ອນເພຍ, ເມື່ອຍ, ບໍ່ກິນເຂົ້າ ແລະ ຖ່າຍເປັນນ້ຳຫລາຍຄັ້ງ, ຊຶ່ງທາງໂຮງໝໍກໍໄດ້ຕັ້ງໜ່ວຍເຝົ້າລະວັງເພື່ອຕິດຕາມ ແລະ ໃຫ້ການປິ່ນປົວເປັນປະຈຳ, ພ້ອມທັງໃຫ້ກິນຢາ ແລະ ແນະນຳເລື່ອງການກິນອາຫານ ແລະ ດື່ມນ້ຳໃຫ້ຖືກຕາມສຸຂະນາໄມ ແລະ ໃນວັນທີ 26 ກຸມພານີ້, ພະແນກສາທາລະນະສຸກແຂວງອຸດົມໄຊ ກໍໄດ້ຈັດກອງປະຊຸມດ່ວນເພື່ອເລັ່ງໂຄສະນາໃຫ້ປະຊາຊົນເອົາໃຈໃສ່ໃນການປ້ອງກັນ, ໂດຍສະເພາະແມ່ນການກິນຢູ່ໃຫ້ສະອາດ ແລະ ຖືກຫລັກອານາໄມ, ກຽມຈັດພິມຄູ່ມື ແລະ ແຜ່ນພັບເພື່ອແນະນຳກ່ອນ ແລະ ຫລັງກິນອາຫານຕ້ອງລ້າງມືທຸກຄັ້ງ, ບໍ່ຄວນຖ່າຍຊະຊາຍ ເພື່ອສະກັດກັ້ນບໍ່ໃຫ້ພະຍາດດັ່ງກ່າວອອກສູ່ວົງກວ້າງ.
