ພຽງຢາງຮຽກຮ້ອງເລຂາ UN ເລີກເປັນເບ້ຍລ່າງອາເມລິກາ
ສປປ ເກົາຫລີ ວິຈານທີ່ທ່ານ ອັນໂຕນິໂອ ກູເຕີເຣສ ກ່າວສະໜັບສະໜູນການເພີ່ມມາດຕະການຂວ້ຳບາດຕໍ່ລັດຖະບານພຽງຢາງ ວ່າສະທ້ອນບົດບາດຂອງເລຂາທິການ UN ໃນຖານະລູກນ້ອງຂອງອາເມລິກາ ແລະ ຂໍໃຫ້ຢຸດພຶດຕິກຳດັ່ງກ່າວ.
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາ ໃນວັນທີ 22 ກຸມພາວ່າ: ສຳນັກງານຄະນະຜູ້ແທນຖາວອນ ສປປ ເກົາຫລີ ແຫ່ງສະຫະປະຊາຊາດ (UN) ອອກຖະແຫລງການໃນວັນທີ 22 ກຸມພາວ່າ: ຄຳຖະແຫລງຂອງທ່ານ ອັນໂຕນິໂອ ກູເຕີເຣສ ເລຂາທິການ UN ໃນເວທີກອງປະຊຸມຄວາມໝັ້ນຄົງມິວນິກ (MSC) ທີ່ເຢຍລະມັນ ໃນອາທິດຜ່ານມາ ວ່າການເພີ່ມມາດຕະການຂວ້ຳບາດຕໍ່ລັດຖະບານພຽງຢາງເປັນສິ່ງຈຳເປັນ ເພື່ອເພີ່ມແຮງກົດດັນໃຫ້ ສປປ ເກົາຫລີ ຈົນກວ່າຈະຍອມຢຸດໂຄງການພັດທະນາອາວຸດນິວເຄຼຍນັ້ນ ເປັນການສະແດງທັດສະນະທີ່ຂາດການໄຕ່ຕອງຂອງເລຂາທິການ UN.
ຂະນະດຽວກັນ, ລັດຖະບານພຽງຢາງຮຽກຮ້ອງໃຫ້ທ່ານ ກູເຕີເຣສ ຢຸດພຶດຕິກຳຕົກເປັນເບ້ຍລ່າງຂອງອາເມລິກາ ແລະ ສະແດງບົດບາດໃນຖານະຜູ້ແທນຂອງລັດຖະບານວໍຊິງຕັນໃນເລື່ອງການຂວ້ຳບາດ ສປປ ເກົາຫລີ ຕະຫລອດເວລາ. ເຖິງຢ່າງໃດກໍຕາມ, ສຳນັກງານເລຂາທິການ UN ແລະ ກະຊວງການຕ່າງປະເທດອາເມລິກາຍັງຮັກສາທ່າທີຕໍ່ຖະແຫລງການດັ່ງກ່າວຂອງ ສປປ ເກົາຫລີ.
