ສ.ເກົາຫລີ ລົງນາມ FTA ກັບ 5 ປະເທດອາເມລິກາກາງ
ລັດຖະບານເຊອຸນ ແລະ 5 ປະເທດຈາກອາເມລິກາກາງ ລົງນາມຮ່ວມກັນໃນຂໍ້ຕົກລົງການຄ້າເສລີ, ໃນຂະນະທີ່ ສ.ເກົາຫລີ ກຳລັງມີບັນຫາກັບອາເມລິກາກ່ຽວກັບ FTA ສະບັບປັດຈຸບັນ.
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ສ.ເກົາຫລີ ໃນວັນທີ 21 ກຸມພາວ່າ: ທ່ານ ກິມ ຮາຍອນຊອງ ຮອງລັດຖະມົນຕີກະຊວງການຄ້າຂອງ ສ.ເກົາຫລີ ແລະ ລັດຖະມົນຕີການຄ້າຂອງ 5 ປະເທດຈາກພາກພື້ນອາເມລິກາກາງ ໄດ້ແກ່ໂກສະຕາຣິກາ, ແອນຊານວາດໍ, ຮົງດູຣັດ, ນິກາຣາກວາ ແລະ ປານາມາ ລົງນາມຮ່ວມກັນໃນຂໍ້ຕົກລົງການຄ້າເສລີ (FTA) ໃນພິທີເຊິ່ງຈັດຂຶ້ນຢູ່ນະຄອນຫລວງເຊອຸນ ຖືເປັນປະເທດທຳອິດໃນອາຊີທີ່ມີການຮ່ວມມືການຄ້າລະດັບທະວີພາຄີກັບປະເທດຈາກອາເມລິກາກາງ.
ທັງນີ້ ຂໍ້ມູນເບື້ອງຕົ້ນຈາກກະຊວງການຄ້າຂອງ ສ.ເກົາຫລີ ລະບຸວ່າ: ສິນຄ້າ ແລະ ບໍລິການຈາກທັງ 5 ປະເທດຈະໄດ້ຮັບການຫລຸດພາສີນຳເຂົ້າທັນທີຫລາຍກວ່າ 95% ຫລື ທະຍອຍຫລຸດລົງແບບຄ່ອຍເປັນຄ່ອຍໄປ. ຂະນະທີ່ ສ.ເກົາຫລີ ຄາດຫວັງການຂະຫຍາຍຕົວຂອງການສົ່ງອອກສິນຄ້າປະເພດອາໄຫລ່ ແລະ ອຸປະກອນເຄື່ອງຈັກ ເຊັ່ນດຽວກັບເຄື່ອງສຳອາງ, ອຸປະກອນການແພດ ແລະ ຢາ. ເຖິງຢ່າງໃດກໍຕາມ, ຂໍ້ຕົກລົງການຄ້າສະບັບນີ້ບໍ່ຄວບຄຸມສິນຄ້າກະສິກຳ ບໍ່ວ່າຈະເປັນເຂົ້າ, ໝາກເຜັດ, ກະທຽມ ແລະ ຫອມບົວໃຫຍ່ ຕະຫລອດຮອດຊີ້ນສັດແຊ່ແຂງບາງປະເພດ.
ນອກເໜືອຈາກ FTA ຮ່ວມກັບ 5 ປະເທດດັ່ງກ່າວຈາກອາເມລິກາກາງແລ້ວ, ສ.ເກົາຫລີ ຍັງມີຂໍ້ຕົກລົງການຄ້າເສລີຮ່ວມກັບອາເມລິກາ, ຈີນ ແລະ ສະຫະພາບເອີຣົບ (EU) ເພື່ອກະຕຸ້ນເສດຖະກິດຂອງທັງສອງຝ່າຍ, ແຕ່ການຮ່ວມມືກັບອາເມລິກາໃນເລື່ອງນີ້ກຳລັງສັ່ນຄອນ ເມື່ອລັດຖະບານຂອງປະທານາທິບໍດີ ໂດນັນ ທຣຳ ສະແດງອອກຢ່າງຈະແຈ້ງວ່າຕ້ອງການ “ທົບທວນ” ຂໍ້ຕົກລົງການຄ້າທີ່ມີຜົນບັງຄັບໃຊ້ມາແຕ່ປີ 2012.
