ຫາກບໍ່ຢາກອ່ອນເພຍແຕ່ເຊົ້າ ທ່ານຕ້ອງປ່ຽນພຶດຕິກຳ
ທ່ານເຄີຍເປັນຫລືບໍ່ ນອນເຕັມອີ່ມແລ້ວ ແຕ່ເມື່ອສວາຍເຂົ້າກໍຮູ້ສຶກອິດເມື່ອຍອ່ອນເພຍ ? ບາງເທື່ອອາດເປັນຍ້ອນເລື່ອງນ້ອຍໆເຫລົ່ານີ້ກໍເປັນໄດ້.
– ດື່ມກາເຟໄວ ຫລື ຊ້າເກີນໄປ : ກ່ອນຍົກຈອກກາເຟຂຶ້ນດື່ມ ຫລຽວໄປເບິ່ງໂມງຈັກໜ້ອຍ ເຊິ່ງ ທ່ານ ສະຕີເວັນ ມິນເລີ ນັກສຶກສາປະລິນຍາເອກດ້ານປະສາດວິທະຍາຈາກ Uniformed Services University of Health Sciences ພົບວ່າ : ຫລັງຈາກທ່ານລຸກຈາກຕຽງປະມານ 1 ຊົ່ວໂມງ ພະລັງງານຈະຫລຸດລົງໄປຫລາຍທີ່ສຸດ ຫາກດື່ມກາເຟໃນໄລຍະນັ້ນ ທ່ານຈະຮູ້ສຶກສົດຊື່ນຫ້າວຫັນໄດ້ຍາວໄປເຖິງຕອນບ່າຍເລີຍ.
– ກິນເຂົ້າເຊົ້າໜ້ອຍເກີນໄປ : ນຳ້ເຕົ້າຫູ້ 1 ຈອກ ຫລື ໂຢເກິດຈັກຈອກ ກັບໝາກໄມ້ເປັນອາຫານເຊົ້າທີ່ດີ, ແຕ່ມັນຈະບໍ່ດີປານໃດ ຫາກມັນມີກາລໍຣີໜ້ອຍຈົນເກີນໄປເຊິ່ງ ດຣ. ມິນແຊນ ດາເວນພອດ ຜູ້ຊ່ຽວຊານດ້ານໂພຊະນາການ ບອກວ່າ : ອາຫານເຊົ້າທີ່ດີແທ້ຕ້ອງຄົບ 5 ໝວດ ແລະ ໃຫ້ພະລັງງານຢ່າງໜ້ອຍ 450 ກາລໍຣີ ທ່ານຈະໄດ້ອີ່ມດົນ ແລະ ສົດຊື່ນໄປຈົນເຖິງຕອນສວາຍ.
– ເຊົາຈັບໂທລະສັບທັນທີນັບແຕ່ມືນຕາຕື່ນ : ດຣ. ເມລິສຊາ ແມັກຄຣີຣີ ບອກວ່າ : ການເຂົ້າສູ່ໂລກເຕັກໂນໂລຊີ ຫລື ກວດເບິ່ງໂທລະສັບນັບແຕ່ມືນຕາຕື່ນ ຈະເຮັດໃຫ້ທ່ານຮູ້ສຶກເຄັ່ງຄຽດ, ອິດເມື່ອຍອ່ອນເພຍໄປໝົດມື້. ສະນັ້ນ ປ່ຽນໄປເປັນເຮັດຫຍັງແບບສະບາຍໆ, ຍ່າງອອກກຳລັງກາຍເບົາໆ, ດື່ມຊາ ຫລື ລົມກັບໝູ່ຈະດີກ່ວາເມົາຫລິ້ນແຕ່ໂທລະສັບ.
