ລາວຫາລືການເຂົ້າຫາແຫລ່ງທຶນຂອງທຸລະກິດຂະໜາດນ້ອຍ ແລະ ກາງ
ເພື່ອສົ່ງເສີມການເຂົ້າຫາແຫລ່ງທຶນຂອງທຸລະກິດຂະໜາດນ້ອຍ ແລະ ກາງ (SMEs) ໃຫ້ໄດ້ຫລາຍຂຶ້ນ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກໍາ ແລະ ການຄ້າ, ຈຶ່ງໄດ້ເຊີນເອົາບັນດາຫົວໜ່ວຍທຸລະກິດດັ່ງກ່າວ ແລະ ບັນດາທະນາຄານມາຮ່ວມສຳມະນາພົບປະກັນ ເພື່ອສ້າງໂອກາດໃຫ້ພາກທຸລະກິດໄດ້ສະເໜີຄວາມຕ້ອງການຂອງຕົນ, ດ້ານທະນາຄານກໍມີໂອກາດໄດ້ອະທິບາຍກ່ຽວກັບນະໂຍບາຍສິນເຊື່ອຂອງຕົນ ເພື່ອກາຍເປັນຄູ່ຮ່ວມທາງທຸລະກິດທີ່ດີນໍາກັນໃນຕໍ່ໜ້າ.
ການສຳມະນາດັ່ງກ່າວ, ໂດຍການເປັນປະທານຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ມີຜູ້ຕາງໜ້າຈາກທະນາຄານ, ມີຜູ້ປະກອບການທຸລະກິດຫລາຍກວ່າ 100 ຫົວໜ່ວຍເຂົ້າຮ່ວມ ເພື່ອສົນທະນາໃນຫົວຂໍ້ຄວາມທ້າທາຍຕໍ່ການດຳເນີນທຸລະກິດ SMEs ໃນການກູ້ຢືມເງິນຈາກທະນາຄານ, ຂັ້ນຕອນການໄດ້ເງິນກູ້ ແລະ ການປະກອບເອກະສານ, ການສົ່ງເສີມການເຂົາຫາແຫລ່ງທຶນຂອງ SMEs ໃນ ສປປ ລາວ, ນະໂຍບາຍການປ່ອຍສິນເຊື່ອໃຫ້ SMEs ຂອງທະນາຄານ ແລະ ສະຖາບັນການເງິນ ແລະ ສະໜັບສະໜູນການໃຫ້ຄຳປຶກສາເພື່ອສົ່ງເສີມໃຫ້ແກ່ SMEs.
ການດສຳມະນານີ້, ເປັນການກະຕຸ້ນໃຫ້ຜູ້ປະກອບການ SMEs ແລະ ທະນາຄານສາມາດສ້າງຄວາມເຂົ້າໃຈ ແລະ ກາຍເປັນຄູ່ຮ່ວມພັດທະນາທຸລະກິດ, ໂດຍສະເພາະການສະໜອງເງິນຈາກທະນາຄານເພື່ອພັດທະນາວິສາຫະກິດຂະໜາດນ້ອຍ ແລະ ກາງໃນລາວໃຫ້ເຕີບໃຫຍ່ເຂັ້ມແຂງ.
