ບໍລິສັດຈາກຈີນໄດ້ຮັບເລືອກໃຫ້ດຳເນີນການກໍ່ສ້າງທາງດ່ວນນະຄອນຫລວງວຽງຈັນ-ວັງວຽງ
ກະຊວງໂຍທາທິການ ແລະ ຂົນສົ່ງ ໃຫ້ຮູ້ວ່າ: ກຸ່ມບໍລິສັດຢຸນໜານວິສະວະກຳ ແລະ ກໍ່ສ້າງຈາກ ສປຈີນ ເປັນຜູ້ຊະນະການປະມູນໂຄງການກໍ່ສ້າງເສັ້ນທາງດ່ວນຈາກນະຄອນວຽງຈັນຫາເມືອງວັງວຽງແຂວງວຽງຈັນ, ຊຶ່ງເປັນໂຄງການເຊື່ອມຕໍ່ເສັ້ນທາງຫລວງລະຫວ່າງລາວ-ຈີນໃນອະນາຄົດ. ໂຄງການດັ່ງກ່າວເປັນການລົງທຶນຮ່ວມລະຫວ່າງລາວ-ຈີນ, ໂດຍຝ່າຍຈີນຖືຮຸ້ນ 95% ແລະ ລາວຖືຮຸ້ນ 5% ໃນຮູບແບບ BOT ໝາຍວ່າບໍລິສັດເປັນຜູ້ລົງທຶນກໍ່ສ້າງ ແລະ ເກັບເອົາຜົນປະໂຫຍດຈາກຄ່າທຳນຽມທາງໃນໄລຍະສໍາປະທານ 30 ປີຈາກນັ້ນຈຶ່ງໂອນໃຫ້ລັດຖະບານຄຸ້ມຄອງຕໍ່ໄປ.
ການກໍ່ສ້າງຈະເລີ່ມແຕ່ສາມແຍກສີເກີດຫາເມືອງວັງວຽງໃນໄລຍະທາງ 113 ກິໂລແມັດ, ກວ້າງ 23 ແມັດ, ມີ 4 ຊ່ອງຈະລາຈອນ ແລະ ມີ 2 ແລວໄປ-ກັບ, ໃນນີ້ຈະໄດ້ເຈາະອຸໂມງລອດພູພະຍາວ 679 ແມັດ, ຊຶ່ງໄດ້ປະເມີນອັດຕາເກັບຄ່າບໍລິການເບື້ອງຕົ້ນ 400-500 ກີບຕໍ່ກິໂລແມັດ ຫລື ປະມານ 50.000 ກີບຮອດວັງວຽງ ແລະ ຄາດວ່າຈະກໍ່ສ້າງໃຫ້ສໍາເລັດໃນປີ 2021. .
ທ່ານ ບຸນຍະວັດ ນີລະໄຊຍ໌ ຜູ້ປະສານງານໂຄງການດັ່ງກ່າວ ໃຫ້ຮູ້ວ່າ: ໂຄງການດັ່ງກ່າວແມ່ນສ່ວນໜຶ່ງໃນໂຄງການທາງດ່ວນລາວ-ຈີນແຕ່ນະຄອນຫລວງວຽງຈັນຫາບໍ່ເຕັນແຂວງຫລວງນ້ຳທາ ແລະ ເຊື່ອມຕໍ່ຊາຍແດນ ສປຈີນ.
