ພະຍາດປາກເປື່ອຍລົງເລັບແຜ່ລະບາດຢູ່ 2 ແຂວງພາກເໜືອ

ເນື່ອງຈາກສະພາບດິນຟ້າອາກາດມີການປ່ຽນແປງ ແລະ ໜາວເຢັນກວ່າປົກກະຕິ ໂດຍສະເພາະຢູ່ແຂວງພາກເໜືອ ຈຶ່ງເຮັດໃຫ້ເກີດການລະບາດພະຍາດປາກເປື່ອຍລົງເລັບຂອງງົວ, ຄວາຍດັ່ງ ທ່ານ ສີແສງ ຂຸນສີ ຮອງຫົວໜ້າກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ພະຍາດດັ່ງກ່າວ ໄດ້ລະບາດໜັກຢູ່ 2 ແຂວງພາກເໜືອ ນັບແຕ່ທ້າຍປີ 2017 ເປັນຕົ້ນມາຄື: ເມືອງ ສົບເບົາ, ຊໍາໃຕ້ ແຂວງ ຫົວພັນ, ເມືອງ ຄອບ ແລະ ເມືອງ ບໍ່ແຕນ ແຂວງໄຊຍະບູລີ ແລະ ປັດຈຸບັນກໍສາມາດຄວບຄຸມໄດ້ແລ້ວ, ມີເມືອງ ບໍ່ແຕນ ຍັງສືບຕໍ່ລະບາດຢູ່ເລັກນ້ອຍ.

ພະຍາດປາກເປື່ອຍລົງເລັບ ເປັນພະຍາດສັດທີ່ມັກເກີດຂຶ້ນກັບ: ງົວ, ຄວາຍ, ໝູ, ແກະ ແລະ ແບ້) ແລະ ປັັດຈຸບັນມີຢູ່ 7 ຊະນິດຂອງເຊື້ອພະຍາດດັ່ງກ່າວ, ແຕ່ສ່ວນຫຼາຍທີ່ມັກເກີດຢູ່ປະເທດເຮົາແມ່ນຊະນິດ ໂອ, ເອ ແລະ ເອຊີວັນ, ສ່ວນເຊື້ອໂອ ແລະ ເອ ເກີດຂຶ້ນເມື່ອປະມານ 4-5 ປີຫຼັງ ແລະ ປີີນີ້ແມ່ນກວດພົບເຊື້ອໂອ ຊຶ່ງສາມາດປ້ອງກັນໄດ້ດ້ວຍການຄວບຄຸມການເຄື່ອນຍ້າຍສັດ ແລະ ສັກຢາປ້ອງກັນ.

ປັດຈຸບັນ ພາກສ່ວນກ່ຽວຂ້ອງ ໄດ້ລົງເຄື່ອນໄຫວສັກຢາ ແລະ ເຜີຍແຜ່ຄວາມຮູ້ກ່ຽວກັບພະຍາດດັ່ງກ່າວຢູ່ ຈໍາປາສັກ, ສະຫວັນນະເຂດ ແລະ ຊຽງຂວາງ ເພື່ອປະຊາຊົນຮັບຮູ້ ແລິ ມີວິທີສະກັດກັ້ນ.