ເພີ່ມທະວີສະກັດກັ້ນ ແລະ ຕ້ານອັກຄີໄພໃນລະດູແລ້ງໃຫ້ດີ
ກົມໃຫຍ່ຕຳຫລວດກະຊວງປ້ອງກັນຄວາມສະຫງົບ ໃຫ້ຮູ້ວ່າ: ໃນລະດູແລ້ງທີ່ຜ່ານມາ ຢູ່ປະເທດເຮົາໄດ້ມີອັກຄີໄພເກີດຂຶ້ນຢູ່ສຳນັກງານ-ອົງການ, ທີ່ພັກອາໃສ, ໂຮງຈັກ-ໂຮງງານ, ຫົວໜ່ວຍການຜະລິດ, ພຶ້ນຖານເສດຖະກິດ ວັດທະນະທຳ-ສັງຄົມ, ຕະຫລາດ, ປ່າໄມ້ ແລະ ບ່ອນຊຸມຊົນ ສ້າງຜົນເສຍຫາຍແກ່ຊີວິດ, ຊັບສິນຂອງລັດ-ລວມໝູ່ ແລະ ຂອງບຸກຄົນເປັນຈຳນວນຫລາຍ, ສາເຫດໄຟໄໝ້ສ່ວນຫລາຍແມ່ນຍ້ອນການເລິນເລີ້, ຂາດສະຕິ, ຂາດຄວາມຮັບຜິດຊອບ, ຄວາມຮູ້ເທົ່າບໍ່ເຖິງການ ແລະ ການກວດກາບໍ່ຮອບຄອບເປັນຕົ້ນແມ່ນການໃຊ້ໄຟເຂົ້າໃນການຜະລິດ, ການດຳເນີນທຸລະກິດ, ການດຳລົງຊີວິດປະຈຳວັນ, ການຈູດຂີ້ເຫຍື້ອ, ຈູດປ່າ, ຈູດໄຮ່, ໄຕ້ທູບທຽນບູຊາ ແລະ ອື່ນໆ, ເພື່ອເຮັດໜ້າທີ່ໃນການສະກັດກັ້ນອັກຄີໄພໃຫ້ມີປະສິດທິຜົນສູງ, ຫົວໜ້າກົມໃຫຍ່ຕຳຫລວດໄດ້ອອກແຈ້ງການດັ່ງນີ້: 1. ການນຳໃຊ້ໄຟຟ້າເຂົ້າໃນການຜະລິດ, ດຳລົງຊີວິດປະຈຳວັນ ຫລື ວຽກງານອື່ນໆ ຕ້ອງປະຕິບັດຕາມຂໍ້ກຳນົດ ຫລັກການຂອງບໍລິສັດໄຟຟ້າວາງອອກຢ່າງເຂັ້ມງວດ, ເອົາໃຈໃສ່ກວດກາລະ
ບົບໄຟຟ້າ, ອຸປະກອນ ເຄື່ອງໃຊ້ໄຟຟ້າຕ່າງໆໃຫ້ຢູ່ໃນສະພາບສົມບູນ, ຖ້າເຫັນວ່າເກົ່າແກ່ເປ່ເພບໍ່ຮັບປະກັນຕ້ອງປ່ຽນໃໝ່, ທຸກຄັ້ງທີ່ໃຊ້ອຸປະກອນເຄື່ອງໃຊ້ໄຟຟ້າສຳເລັດແລ້ວຕ້ອງປິດສະວິກ ແລະ ຖອດປັກສຽບອອກໃຫ້ລະອຽດ, 2. ຈັດມ້ຽນວັດຖຸສິ່ງຂອງເຄື່ອງໃຊ້ຕ່າງໆ ຢູ່ໃນສະຖານທີ່ທຳການຜະລິດ, ໃນບ້ານເຮືອນ, ບ່ອນເຮັດວຽກ ແລະ ທີ່ພັກອາໃສໃຫ້ເປັນລະບຽບຮຽບຮ້ອຍ, ບໍ່ປ່ອຍໃຫ້ຮົກເຮື້ອ, ຊະຊາຍ, ປົນເປກັນ, ຕ້ອງຈັດໄວ້ບ່ອນທີ່ມີຄວາມປອດໄພ, ຫ່າງຈາກແຫລ່ງໄຟທີ່ອາດເກີດໄໝ້ໄດ້ເຊັ່ນ: ເຕົາດັງໄຟແຕ່ງກິນ, ເຕົາໄຟຟ້າ, ເຕົາແກັສ, ເຕົາລີດ ຫລື ອຸປະກອນທີ່ມີຄວາມຮ້ອນອື່ນໆ, 3. ການໄຕ້ທູບທຽນບູຊາຕ້ອງຮັບປະກັນຄວາມປອດໄພ, ຮ້ານບູຊາຕ້ອງເຮັດດ້ວຍວັດຖຸທີ່ໄໝ້ຍາກ, ຫ່າງໄກຈາກບ່ອນທີ່ມີເຊື້ອໄຟ, ທຸກຄັ້ງທີ່ມີການໄຕ້ທູບທຽນບູຊາ ເມື່ອສຳເລັດຕ້ອງມອດໃຫ້ລະອຽດ, 4. ການຄຸ້ມຄອງ, ນຳໃຊ້, ຂົນສົ່ງ ແລະ ຈຳໜ່າຍວັດຖຸໄວໄຟ-ອາຍແກັສ-ທາດເຄມີ ຕ້ອງປະຕິບັດຕາມມາດຕະຖານຄວາມປອດໄພດ້ານອັກຄີໄພຢ່າງເຂັ້ມງວດ, 5. ການປຸກສ້າງອາຄານຕ່າງໆ, ປ້ຳບໍລິການນ້ຳມັນ, ສາງນ້ຳມັນ, ບ່ອນອັດ-ຈຳໜ່າຍອາຍແກັສ ແລະ ວັດຖຸໄວໄຟທຸກຊະນິດ ຕ້ອງມີລະບົບສະກັດກັ້ນ ແລະ ຕ້ານອັກຄີໄພ, 6. ບັນດາສຳນັກງານ-ອົງການ, ພຶ້ນຖານປະຊາຊົນ ແລະ ອຳນາດການປົກຄອງທ້ອງຖິ່ນຕ້ອງເພີ່ມທະວີຄວາມເອົາໃຈໃສ່ການຈັດຕັ້ງປ້ອງກັນເວນຍາມສະຖານທີ່ ທີ່ຕົນເອງຮັບຜິດຊອບໃຫ້ເຂັ້ມງວດ ແລະ ກຽມອຸປະກອນມອດໄຟມາປະຈຳໄວ້ໃຫ້ພຽງພໍ ພ້ອມທັງຈັດຕັ້ງຝຶກອົບຮົມວິທີການສະກັດກັ້ນ ແລະ ຕ້ານອັກຄີໄພ ໃຫ້ມີຄວາມຄ່ອງແຄ້ວ ແລະ ກຽມພ້ອມຕໍ່ສະພາບອັກຄີໄພທີ່ອາດເກີດຂຶ້ນໄດ້ທຸກເວລາ, 7. ການຈູດປ່າເຮັດໄຮ່, ເຮັດສວນ, ເຜົາຖ່ານ, ຈູດປ່າຫຍ້າ ຕ້ອງຮັບປະກັນບໍ່ໃຫ້ໄຟໄໝ້ລາມໃສ່ບ້ານເຮືອນ, ສຳນັກງານ-ອົງການ, ສາຍໄຟຟ້າ ແລະ ອື່ນໆ, 8. ຫ້າມຈູດຂີ້ເຫຍື້ອຊະຊາຍ, ໃກ້ເຮືອນ, ສາງ, ຕະຫລາດ, ບ່ອນຊຸມຊົນໜາແໜ້ນ, ສະຖານທີ່ທຳການຜະລິດ ແລະ ບ່ອນທີ່ມີວັດຖຸໄວໄຟຕ່າງໆ ທີ່ອາດເກີດໄຟໄໝ້ລາມໄດ້, 9. ຫ້າມນຳເອົານ້ຳມັນເຊື້ອໄຟ, ທາດເຄມີ, ວັດຖຸໄໝ້ລະເບີດ ມາເກັບໄວ້ເຮືອນ, ບ່ອນເຮັດວຽກ, ທີ່ພັກອາໃສ ຫລື ບ່ອນທີ່ມີຄວາມຮ້ອນສູງ, ເດັດຂາດບໍ່ໃຫ້ນຳເອົານ້ຳມັນໃສ່ແກ້ວ, ເພື່ອວາງຂາຍຕາມໜ້າບ້ານ, ຮ້ານຂາຍເຄື່ອງ, ຮ້ານສ້ອມແປງ, ສະເພາະຢູ່ສາງ ຫລື ປ້ຳນ້ຳມັນ ຕ້ອງມີການກວດກາການຮົ່ວໄຫລຂອງນ້ຳມັນ, ມີຂໍ້ກຳນົດກົດລະບຽບ ແລະ ວິທີການສະກັດກັ້ນອັກຄີໄພ ຢ່າງເຂັ້ມງວດ, 10. ເວລາມີໄຟໄໝ້ເກີດຂຶ້ນ ຢູ່ສະຖານທີ່ໃດໜຶ່ງ ຜູ້ຮັບຜິດຊອບສະນຖທີ່ຕ້ອງເຕົ້າໂຮມກຳລັງ, ພາຫະນະ-ອຸປະກອນມອດໄຟ ເຂົ້າມອດໄຟເບື້ອງຕົ້ນ ແລະ ແຈ້ງໃຫ້ກຳລັງຕຳຫລວດສະກັດກັ້ນ ແລະ ຕ້ານອັກຄີໄພ ທີ່ຢູ່ໃກ້ທີ່ສຸດ, ພ້ອມກັນນັ້ນ ທຸກຄົນມີໜ້າທີ່ເຂົ້າຮ່ວມມອດໄຟ, ປ້ອງກັນສະຖານທີ່ເກີດເຫດ ແລະ ໃຫ້ຄວາມຮ່ວມມືກັບເຈົ້າໜ້າທີ່ໃນການດຳເນີນສືບສວນ-ສອບສວນ ຄະດີອັກຄີໄພ.
