ບານເຕະຄົນພິການຕາລາວ ຊະນະ ທີມຊາດຍີ່ປຸ່ນ 2-1 ລາຍການອຸ່ນເຄື່ອງນາໆຊາດ
ບານເຕະຄົນພິການຕາ ທີມຊາດລາວ ສ້າງຜົນງານໄດ້ຢ່າງໜ້າປະທັບໃຈ ລົງສະໜາມນັດທຳອິດເອົາຊະນະ ທີມຊາດຍີ່ປຸ່ນ ຊຸດ B ໄປດ້ວຍຄະແນນ 2-1 ໃນວັນທີ 11 ກຸມພານີ້ ການແຂ່ງຂັນບານເຕະລາຍການອຸ່ນເຄື່ອງລະດັບນາໆຊາດ ທີ່ປະເທດຍີ່ປຸ່ນ.
ເພື່ອພັດທະນາທີມນັກກິລາທີ່ຈະມາເປັນທີມຊາດຊຸດໃຫຍ່ ແລະ ທີມຊາດເຍົາວະຊົນ, ສະມາຄົມບານເຕະຄົນພິການຕາແຫ່ງປະເທດຍີ່ປຸ່ນ ຫລື JBFA ຈຶ່ງໄດ້ເຊີນທີມຊາດລາວມາແຂ່ງຂັນອຸ່ນເຄື່ອງລະດັບນາໆຊາດເປັນຄັ້ງທຳອິດ ລະຫວ່າງວັນທີ 11-12 ກຸມພານີ້ ທີ່ສະໜາມ ZOZOPARK HONDA FOOTBALL AREA ທີ່ເມືອງຈິບະ ແຂວງຈິບະ ປະເທດຍີ່ປຸ່ນ.
ທີມຊາດລາວຢູ່ອັນດັບ 39 ຂອງໂລກ ຫລັງໄດ້ຄວ້າຫລຽນເງິນມາຄອງໃນການແຂ່ງຂັນ ASEAN RARA GAMES ທີ່ຈັດຂຶ້ນໃນເດືອນກັນຍາ 2017, ຫລ້າສຸດລົງແຂ່ງຂັນກັບ ທີມຊາດຍີ່ປຸ່ນ ທີມ B ສາມາດເອົາຊະນະໄດ້ 2-1 ປະຕູ. ສ່ວນນັດຕໍ່ໄປຈະລົງແຂ່ງຂັນໃນເວລາ 14:00 ໂມງ ວັນທີ 11 ກຸມພານີ້ ພົບກັບ ທີມຊາດຍີ່ປຸ່ນ (ເຍົາວະຊົນ).
