ບໍລິສັດ ພູເບ້ຍ ມາຍນິງ ສະໜັບສະໜູນການກໍ່ສ້າງອາຄານໂຮງຮຽນມັດທະຍົມປາຍ ແລະ ຫໍພັກຄູຢູ່ບ້ານນໍ້າໂມ້

ພິທີວາງສີລາເລີກໂຄງການກໍ່ສ້າງອາຄານໂຮງຮຽນມັດທະຍົມປາຍ ແລະ ຫໍພັກຄູຢູ່ບ້ານນໍ້າໂມ້ແຂວງໄຊສົມບູນ ໄດ້ມີຂື້ນເມື່ອທ້າຍເດືອນມັງກອນນີ້, ໂດຍການສະໜັບສະໜູນທຶນຈາກບໍລິສັດພູເບ້ຍມາຍນິງຈໍາກັດ (PBM) ໂຄງການກໍ່ສ້າງດັ່ງກ່າວແມ່ນສ່ວນໜຶ່ງຂອງທຶນພັດທະນາຊຸມຊົນຂອງບໍລິສັດ.

ອາຄານໂຮງຮຽນຫລັງໃໝ່ຈະມີຫ້ອງຮຽນທັງໝົດ 6 ຫ້ອງ, ປະກອບມີລະບົບໄຟຟ້າ ແລະ ໂຕະ, ຕັ່ງນັກຮຽນຄົບຊຸດ ເພື່ອຮອງຮັບການຮຽນ-ການສອນໃຫ້ນັກຮຽນແຕ່ ມ5-ມ7. ສ່ວນຫໍພັກຄູຈະຕັ້ງໃກ້ກັບໂຮງຮຽນດັ່ງກ່າວ, ສາມາດບັນຈຸຄອບຄົວພະນັກງານຄູໄດ້ 16 ຄົນທີ່ມາສິດສອນຢູ່ໂຮງຮຽນແຫ່ງນີ້ ແລະ ໃນສົກຮຽນ 2017 ຜ່ານມາ ມີນັກຮຽນຫລາຍກວ່າ 400 ຄົນໄດ້ສໍາເລັດການສຶກສາຂັ້ນມັດທະຍົມຕອນຕົ້ນຢູ່ໂຮງຮຽນບ້ານນໍ້າໂມ້.

ທ່ານ ອະນຸສອນ ທິບດວງໃຈ ຫົວໜ້າພະແນກພະລັງງານ ແລະ ບໍ່ແຮ່ ແຂວງໄຊສົມບູນ ກ່າວວ່າ: ໂຄງການກໍ່ສ້າງໂຮງຮຽນດັ່ງກ່າວຈະຊ່ວຍປັບປຸງຄຸນນະພາບການສຶກສາຂອງທ້ອງຖິ່ນດີຂຶ້ນ, ໂດຍສະເພາະແມ່ນການກະຕຸກຊຸກຍູ້ໃຫ້ນັກຮຽນສາມາດເຂົ້າເຖິງການສຶກສາເພີ່ມຂຶ້ນ ແລະ ຈະມີທີ່ພັກໃຫ້ພະນັກງານຄູຜູ້ຢູ່ເຂດຫ່າວໄກຊອກຫລີກອີກດ້ວຍ.

ທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍ ມາຍນິງ ກ່າວວ່າ: ບໍລິສັດຈະສືບຕໍ່ໃຫ້ບູລິມະສິດແກ່ການຊ່ວຍເຫລືອກໍ່ສ້າງໂຄງລ່າງພື້ນຖານ ແລະ ການສະໜັບສະໜູນການສຶກສາຂອງທ້ອງຖິ່ນໃຫ້ຫລາຍຂຶ້ນ, ເນື່ອງຈາກວ່າການສຶກສາແມ່ນພື້ນຖານສໍາຄັນໃນການປັບປຸງຊີວິດການເປັນຢູ່ຂອງປະຊາຊົນ, ຜ່ານການສະໜັບສະໜູນໂຄງການກໍ່ສ້າງພື້ນຖານເຫລົ່ານີ້ເປັນສ່ວນປະກອບສໍາຄັນໃນການປັບປຸງຊີວິດການເປັນຢູ່ຂອງຊຸມຊົນຜູ້ຢູ່ໃກ້ບໍລິສັດມີການປ່ຽນແປງດີຂຶ້ນຢ່າງໜ້າເພິ່ງພໍໃຈ.