ໄຟໄໝ້ເຮືອນປະຊາຊົນຢູ່ບ້ານຂຸນຕາຍ້ອນໄຟຟ້າລັດວົງຈອນ
ເຈົ້າໜ້າທີ່ຕຳຫລວດສະກັດກັ້ນ ແລະ ມອດໄຟນະຄອນຫລວງວຽງຈັນ ໃຫ້ຮູ້ວ່າ: ວັນທີ 3 ກຸມພານີ້, ໄດ້ເກີດເຫດໄຟໄໝ້ເຮືອນຂອງປະຊາຊົນຢູ່ບ້ານຂຸນຕາ ເມືອງສີໂຄດຕະບອງນະຄອນຫລວງວຽງຈັນ, ໄດ້ຮັບຄວາມເສຍຫາຍ 1 ຫລັງ, ຊຶ່ງເຈົ້າໜ້າທີ່ໄດ້ໃຊ້ເວລາກວ່າ 2 ຊົ່ວໂມງຈຶ່ງສາມາດສະກັດກັ້ນໄຟໄວ້ໄດ້, ຊຶ່ງຜ່ານການສືບສວນ-ສອບສວນ ເບື້ອງຕົ້ນສາເຫດຂອງການເກີດອັກຄີໄພດັ່ງກ່າວແມ່ນຍ້ອນໄຟຟ້າລັດວົງຈອນ, ເນື່ອງຈາກເປັນເຮືອນເກົ່າແກ່ສ້າງມາໄດ້ຫລາຍປີ ແລະ ລະບົບສາຍໄຟກໍບໍ່ຄ່ອຍຈະຮັບປະກັນ.
ຂ່າວໃຫ້ຮູ້ຕື່ມວ່າ: ໃນວັນທີ 2 ກຸມພານີ້, ກໍເກີດມີໄຟໄໝ້ເຮືອນປະຊາຊົນ 2 ຫລັງຢູ່ບ້ານຫາດກ້ຽງເມືອງໂພນໂຮງແຂວງວຽງຈັນ, ຊຶ່ງເຈົ້າໜ້າທີ່ໄດ້ໃຊ້ເວລາຫລາຍຊົ່ວໂມງຈຶ່ງສາມາດຄວບຄຸມໄຟໄວ້ໄດ້, ຊຶ່ງປັດຈຸບັນ, ເຈົ້າໜ້າທີ່ຍັງພວມສືບສວນ-ສອບສວນຫາສາເຫດຂອງການເກີດອັກຄີໄພດັ່ງກ່າວ.
